کراچی: شہر قائد کے علاقے گلشن معمار میں ایک گھر کے واٹر ٹینک سے لڑکی کی لاش ملنے کے بعد معلوم ہوا کہ ممکنہ طور پر اسے مرگی کا دورہ پڑ گیا تھا اور وہ حادثے کا شکار ہو گئی۔
تفصیلات کے مطابق پولیس حکام نے کہا ہے کہ گلشن معمار میں گھر کے ٹینک سے ملنے والی لڑکی کی لاش دراصل مرگی کی ایک مریضہ کی ہے، جس کی شناخت آمنہ کے نام سے ہوئی ہے۔
پولیس کے مطابق اہل خانہ نے بیان دیا کہ دو روز سے لڑکی کی طبیعت زیادہ خراب ہو گئی تھی، آج جب لڑکی سوئی ہوئی تھی تو اہل خانہ کسی کام سے گھر سے باہر چلے گئے تھے۔
اہل خانہ کے بیان کے مطابق انھوں نے شبہ ظاہر کیا ہے کہ لڑکی کو مرگی کا دورہ پڑا ہوگا اور اس دوران وہ کھلے واٹر ٹینک میں گر گئی، جب اہل خانہ نے واپس آ کر اسے تلاش کیا تو وہ واٹر ٹینک ڈوبی ہوئی تھی۔
پولیس حکام کا کہنا ہے کہ لڑکی کی لاش اسپتال منتقل کر دی گئی ہے، جب کہ واقعے سے متعلق مزید تحقیقات کی جا رہی ہیں۔
