کراچی: ترجمان محکمہ صحت کا کہنا ہے کہ بلوچستان سے کانگو وائرس میں مبتلا ایک اور مریض کراچی میں انتقال کر گیا۔
تفصیلات کے مطابق کوئٹہ سے کراچی علاج کے لئے آنے والا ایک اور 35 سالہ کانگو وائرس کا مریض انتقال کرگیا، متاثر شخص کو علاج کے لیے سندھ انسٹیٹیوٹ آف انفیکشیس ڈیزیز اسپتال منتقل کیا گیا تھا۔
محکمہ صحت کا کہنا ہے کہ مریض کو آج صبح انتہائی تشویشناک حالت میں اسپتال میں داخل کیا گیا تھا، ڈاکٹرز نے مریض کو وینٹی لیٹر پر منتقل کیا مگر جانبر نہ ہوسکا۔
واضح رہے کہ کوئٹہ کے سول اسپتال کے ڈاکٹروں میں بھی کانگو وائرس کی تصدیق ہوئی جس کے بعد محکمہ صحت سندھ نے ایڈوائزری جاری کی جس میں صوبے کے تمام اسپتالوں کو کانگو وائرس سے بچاؤ اور حفاظتی اقدامات کرنے کی ہدایت کی گئی ہے۔
کانگو وائرس سے ہر سال بلوچستان میں لوگوں کی ایک بڑی تعداد نہ صرف متاثرہوتی ہے بلکہ اس سے ہلاکتیں بھی ہوتی ہیں۔
حالیہ دنوں میں یہ وائرس حکومت بلوچستان کے لیے بہت زیادہ پریشانی اور طبی عملے میں تشویش کا باعث بن گیا اور اس کی وجہ کوئٹہ کانگو وائرس کا اچانک پھیلاو ہے، جس سے نہ صرف بلوچستان کے دوسرے بڑے سرکاری اسپتال کے عملے کے لوگ متاثر ہوئے بلکہ ایک نوجوان ڈاکٹر کی موت بھی ہو گئی۔
