اسلام آباد: ملک کے دارالحکومت اسلام آباد کے تھانہ کھنہ کی حدود میں کنویں کی صفائی کے دوران ایک مزدور جاں بحق ہو گیا۔
تفصیلات کے مطابق اسلام آباد میں کنویں کی صفائی کے دوران ایک مزدور کی جان چلی گئی، ریسکیو حکام کا کہنا ہے کہ مزدور کنویں کی صفائی کے دوران زہریلی گیس کا شکار ہوا۔
نور زاد گل کی لاش کنویں سے نکال کر پمز اسپتال منتقل کر دی گئی ہے، مزدور کے لواحقین نے کنویں کے مالک کے خلاف قتل کے مقدمے کی درخواست دے دی۔
درخواست میں کہا گیا ہے کہ کنویں کے مالک کو علم تھا کہ کنویں میں گیس ہے، مگر اس نے یہ بات چھپائی، واضح رہے کہ پچھلے سال بھی کنوئیں کی صفائی کے وقت گیس سے ایک مزدور انتقال کر گیا تھا۔
اسلام آباد ائیرپورٹ کو شہید بے نظیر بھٹو کے نام سے منسوب کرنے کی قرارداد منظور
ادھر شیخوپورہ میں ایک نجی پیپر فیکٹری میں زہریلی گیس پھیلنے سے 4 مزدور جاں بحق ہو گئے ہیں، ریسکیوحکام کے مطابق زہریلی گیس کے باعث 5 مزدوروں کی حالت غیر ہے جنھیں ڈی ایچ کیو اسپتال منتقل کیا گیا ہے، جاں بحق مزدوروں میں 40 سالہ عباس، 19 سالہ بلال، 30 سالہ علی حیدر، اور 20 سالہ شعیب شامل ہیں۔
ایک اور افسوس ناک حادثے میں قصور کے علاقے الہ آباد میں ایک بچہ نہر میں نہاتے ہوئے ڈوب کر جاں بحق ہو گیا، مقامی افراد نے طلحہ کی لاش کو نہر سے تلاش کر کے نکالا، محنت کش عبدالجبار کا بیٹا طلحہ تیسری کلاس کا طالب علم تھا، واضح رہے کہ حکومت کی جانب سے ضلع قصور میں نہر میں نہانے پر دفعہ ایک سو چوالیس نافذ ہے لیکن اس پرعمل درآمد نہیں کرایا جاتا۔
