پاکستان نے بھارتی وزیراعظم نریندر مودی کے اشتعال انگیز اور من گھڑت الزامات کو مسترد کر دیئے ہیں۔
تفصیلات کے مطابق ترجمان دفتر خارجہ نے بھارتی وزیراعظم مودی کے الزامات مسترد کرتے ہوئے کہا کہ بھارتی وزیراعظم کے اشتعال انگیز، من گھڑت الزامات کو یکسر مسترد کرتے ہیں، مودی کا بیان خطے میں امن و استحکام کی کوششوں کو خطرے میں ڈالنے کے مترادف ہے۔
ترجمان نے کہا کہ مودی کا بیان غلط معلومات، سیاسی مفاد پرستی ،عالمی قوانین کی کھلی خلاف ورزی ہے، بھارت جھوٹے بیانیے سے جارحیت کو جواز دینے کی کوشش کر رہا ہے جبکہ پاکستان سیز فائر معاہدے، خطے میں استحکام کیلئے اقدامات پر اب بھی قائم ہے۔
ترجمان دفتر خارجہ کا کہنا تھا کہ سیز فائر کئی دوست ممالک کی سہولت کاری سے ممکن ہوا ہے اور پاکستان پر مایوسی، ناکامی میں سیز فائر مانگنے کا الزام سراسر جھوٹ ہے اس کے علاوہ پہلگام حملے کو بغیر ثبوت پاکستان کو بدنام کرنے کیلئےاستعمال کیا جا رہا ہے۔
انہوں نے کہا کہ بھارت دہشتگردی کا بہانہ بنا کر فوجی مہم جوئی کو جواز دے رہا ہے، بھارت اندرونی ناکامی سے توجہ ہٹانے کیلئے بیرونی خطرے کا جھوٹا بیانیہ بنارہا ہے، پاکستان نے بھارت کی بلااشتعال فوجی جارحیت کے باوجود تحمل کا مظاہرہ کیا ہے۔
معرکہ حق کے دوران شہدا اور زخمیوں کی تفصیلات جاری کر دی گئیں
پاک بھارت کشیدگی سے متعلق تمام خبریں
ترجمان دفتر خارجہ نے کہا کہ بھارت نے پاکستانی فوجی اڈوں کو نشانہ بنا کر خطرناک صورتحال پیدا کی، بھارت کی حرکتوں سے خطے میں امن کو شدید خطرات لاحق ہو گئے ہیں، بھارتی اقدامات جنوبی ایشیا میں اسٹریٹجک استحکام کو ختم کرنے کی کوشش ہیں۔
ترجمان نے کہا کہ بھارت خواتین، بچوں سمیت معصوم شہریوں کے قتل کو معمول بنانے کی کوشش کررہا ہے لیکن پاکستان اپنی خود مختاری، علاقائی سالمیت، شہریوں کے تحفظ کا ہر صورت دفاع کرےگا، بھارت کے اقدامات پر پاکستان اور عالمی برادری گہری نظر رکھے ہوئے ہیں۔
دفتر خارجہ کی جانب سے جاری بیان میں کہا گیا کہ پاکستان کی جوابی کارروائی فوجی اہداف کیخلاف تھی اور مکمل طور پر جائز تھی، پاکستان نے بھارتی فوجی صلاحیت کو نشانہ بنا کر اپنی طاقت کا مظاہرہ کیا اور بھارتی پروپیگنڈا پاکستان کی عسکری کامیابیوں پر پردہ نہیں ڈال سکتا۔
سندھ طاس معاہدہ
ترجمان دفتر خارجہ نے کہا کہ بھارت سندھ طاس جیسے کئی بین الاقوامی معاہدوں کی خلاف ورزی کر رہا ہے لیکن پاکستان سندھ طاس معاہدے کے تحت حقوق کے تحفظ کیلئے تمام اقدامات کرے گا۔
ترجمان نے مزید کہا کہ پاکستان خود دہشتگردی کا شکار ہے جس کے پیچھے بھارت کا ہاتھ ہے، پاکستان کی انسداد دہشتگردی میں قربانیاں اور کردار عالمی سطح پر تسلیم شدہ ہے۔
مسئلہ کشمیر
ترجمان نے کہا کہ یواین قراردادوں اور کشمیریوں کی خواہشات کے مطابق مسئلہ کشمیر کا پُرامن حل چاہتے ہیں، پاکستان امریکی صدر ٹرمپ کی مسئلہ کشمیر کے حل کی کوششوں کی مکمل حمایت کرتا ہے، امن ہی اصل طاقت ہے جبکہ فوجی نمائشی اقدامات خطے اور دنیا کے مفاد میں نہیں۔
” پاکستان کی امن کی خواہش کو کمزوری نہ سمجھیں، ہر جارحیت کا بھرپور جواب دینگے، بھارت کو چاہیے علاقائی استحکام اور اپنے عوام کی فلاح کو ترجیح دے”
