اکثر مسافر چھٹیوں پر جانے سے قبل پریشان رہتے ہیں کہ سوٹ کیس میں کون سے کپڑے رکھے جائیں؟ لیکن اگر آپ جاپان ایئرلائنز میں سفر کر رہے ہیں تو آپ کا یہ مسئلہ بھی حل ہوگیا ہے۔
امریکی نشریاتی ادارے سی این این کے مطابق جاپان کی قومی ایئرلائن مسافروں کو ٹکٹ کے ساتھ ساتھ کپڑے بُک کرنے کا آپشن بھی دے رہی ہے۔
جاپان ایئرلائنز نے یہ سروس ایک سال کے لیے شروع کی ہے اور یہ سروس اگست 2024 تک جاری رہے گی۔
اگر آپ جاپان ایئرلائنز سے چھٹیوں کے دوران اپنے کپڑے بُک کرواتے ہیں تو ہوٹل پہنچتے ہی آپ کے کپڑے آپ کے کمرے میں ڈیلیور کر دیے جائیں گے۔
مسافروں کی چھٹیاں ختم ہونے کے بعد ان کے استعمال شدہ کپڑوں کو واپس دھویا جائے گا اور پھر وہ کپڑے دیگر مسافروں کے لیے دستیاب ہوں گے۔
اس آئیڈیا کی خالق میہو موریا کا کہنا ہے کہ مجھے سفر میں رہنے سے محبت ہے اور میں کئی ممالک جا چکی ہوں لیکن میں ہمیشہ سامان ساتھ لے جانے سے کتراتی تھی۔‘
انہوں نے مزید کہا کہ دورانِ سفر تین چیزیں انتہائی اہم ہوتی ہیں، رہنے کی جگہ، کھانا اور کپڑے۔ جب ہم کسی دوسرے ملک جاتے ہیں تو وہاں ہوٹل ہوتے ہیں جو آپ کے رہنے اور کھانے کا مسئلہ حل کر دیتے ہیں لیکن کپڑوں کا مسئلہ وہیں رہتا ہے۔
