کراچی: امیگریشن ذرائع کا کہنا ہے کہ کراچی ایئرپورٹ پر امریکی شہری سمیت 24 ملکوں کے 44 مسافر آف لوڈ کیے گئے ہیں۔
تفصیلات کے مطابق کراچی کے جناح انٹرنیشنل ایئرپورٹ پر چوبیس ممالک کے چوالیس مسافروں کو مختلف وجوہ پر پروازوں سے آف لوڈ کیا گیا۔
امیگریشن ذرائع کے مطابق امریکا اور میانمار کے شہری وطن واپس جاتے ہوئے پاکستانی ویزا ختم ہونے پر آف لوڈ کیے گئے، امارات، مالدیپ، تنزانیہ ازبکستان، سعودی عرب، اور زمبابوے کے 6 ورک ویزا ہولڈر بھی آف لوڈ کیے گئے۔
بحرین، ہانگ کانگ، آذربائیجان اور تنزانیہ کے وزٹ ویزوں کے حامل 9 مسافر آف لوڈ کیے گئے، بحرین، کینیا، لائبیریا، کابو وردے کے وزٹ ویزوں پر 6 مسافروں کو بھی سفر سے روک لیا گیا۔
امیگریشن کے مطابق عراق، مڈغاسکر، فلپائن، کمبوڈیا اور انڈونیشیا وزٹ ویزوں کے 10 مسافر بھی آف لوڈ کیے گئے، اسی طرح امارات اور بوسٹوانہ کے رہائشی ویزوں کے 2، عمرہ کے 5 مسافر آف لوڈ کیے گئے، کوریا، ازبکستان اور ترکیہ کے اسٹڈی ویزا کے 3 مسافروں کو آف لوڈ کیا گیا۔
8 ممالک سے مزید 40 پاکستانی بے دخل، کون کون سا ملک شامل ہے؟
دوسری طرف امیگریشن ذرائع کا کہنا ہے کہ کوریا اور سینیگال سمیت 8 ممالک سے مزید 40 پاکستانی بے دخل کر دیے گئے، قبرص، کوریا، عمان اور ماریشس کی امیگریشن نے 6 پاکستانیوں کو ناپسندیدہ کہہ کر واپس بھیجا، سعودی عرب، متحدہ عرب امارات، اور عمان میں 4 پاکستانیوں کو بلیک لسٹ ہونے پر امیگریشن نے انٹری نہیں دی۔
یو اے ای سے ترکش رہائشی پرمٹ زائد المیعاد ہونے اور دیگر الزامات پر 3 پاکستانی واپس کر دیے گئے۔ سعودی عرب میں سزا پوری ہونے اور دیگر الزامات پر 21 پاکستانی بے دخل کر دیے گئے، ویزے ختم ہونے پر عمان اور قطر سے 2 پاکستانی واپس بھیجے گئے، سینیگال میں انسانی اسمگلنگ کے لیے پہنچے 3 پاکستانیوں کو بے دخل کیا گیا۔
