ARYNews.tv | Urdu – Har Lamha Bakhabar

Tag: مسافر

  • دوحا سے پشاور پہنچنے والے 30 مسافروں میں کرونا وائرس کی تصدیق

    دوحا سے پشاور پہنچنے والے 30 مسافروں میں کرونا وائرس کی تصدیق

    پشاور: صوبہ خیبر پختونخواہ کے دارالحکومت پشاور میں دوحا سے آنے والے 30 مسافروں میں کرونا وائرس کی تصدیق ہوگئی، مسافروں کو ضلعی انتظامیہ کی مدد سے قرنطینہ کے لیے اسپتال منتقل کر دیا گیا۔

    تفصیلات کے مطابق قطر کے دارالحکومت دوحا سے پشاور پہنچنے والے 30 مسافروں میں کرونا وائرس کی تصدیق ہوگئی، مسافر نجی ایئر لائن کی پرواز سے دوحا سے پشاور پہنچے تھے۔

    ذرائع کا کہنا ہے کہ پشاور ایئرپورٹ پر مسافروں کے ریپڈ ٹیسٹ کیے گئے، ریپڈ ٹیسٹ میں 30 مسافروں میں کرونا وائرس کی تشخیص ہوئی۔

    مسافروں کو ضلعی انتظامیہ کی مدد سے قرنطینہ کے لیے اسپتال منتقل کر دیا گیا۔

    یاد رہے کہ ملک بھر میں کووڈ 19 کے مجموعی کیسز کی تعداد 12 لاکھ 38 ہزار 668 ہوچکی ہے، این سی او سی کا کہنا ہے کہ گزشتہ 24 گھنٹوں کے دوران کرونا وائرس کے 1 ہزار 780 نئے کیسز رپورٹ ہوئے۔

    نیشنل کمانڈ اینڈ آپریشن سینٹر کے مطابق گزشتہ 24 گھنٹوں کے دوران کرونا وائرس کے 42 مریض انتقال کر گئے جس کے بعد کرونا وائرس سے مجموعی اموات کی تعداد 27 ہزار 566 ہوگئی۔

  • طیارے کے ساتھ سفر کرتی اڑن طشتری، مسافر نے ویڈیو بنا لی

    طیارے کے ساتھ سفر کرتی اڑن طشتری، مسافر نے ویڈیو بنا لی

    ہوائی جہاز میں سفر کرنے والے ایک مسافر نے دوران سفر ایک پراسرار شے کی ویڈیو بنائی ہے جس کے بارے میں اس کا دعویٰ ہے کہ یہ شکل بدلنے والی اڑن طشتری ہے۔

    مذکورہ ویڈیو یوٹیوب پر ایک ولاگر نے پوسٹ کی ہے جو اس نے طیارے میں دوران سفر بنائی ہے۔

    ویڈیو میں دیکھا جاسکتا ہے کہ سفید رنگ کی ایک پراسرار شے طیارے کے ساتھ سفر کر رہی ہے اور بار بار اپنی ہئیت بھی بدلتی ہے۔

    ولاگر کا کہنا تھا کہ شروع میں اسے لگا کہ یہ بادل کا چھوٹا سا ٹکڑا ہے، طیارہ اس وقت 10 سے 30 ہزار فٹ کی بلندی پر تھا اور یہ پراسرار شے طیارے کے ساتھ حرکت کر رہی تھی، بعد ازاں اس نے اپنی ہئیت بدل لی۔

    اس ویڈیو کو 50 ہزار سے زائد افراد نے دیکھا اور مختلف تبصرے کیے۔ بعض صارفین کا کہنا ہے کہ اس قدر بلندی پر اس طرح کے مناظر عام ہوتے ہیں، یہ برف کے ذرات ہوتے ہیں جو اپنی شکل بدلتے رہتے ہیں اور طیارے کے دہرے شیشے سے اسی طرح نظر آتے ہیں۔

    ایک اور صارف نے کہا کہ جس طرح یہ اپنی شکل بدل رہا ہے یوں لگتا ہے جیسے کوئی فرشتہ آسمان سے زمین کی طرف جارہا ہے۔

  • سعودی عرب: مسافروں کے ذاتی سامان پر کسٹم کی شرائط

    سعودی عرب: مسافروں کے ذاتی سامان پر کسٹم کی شرائط

    ریاض: سعودی حکام نے وضاحت کی ہے کہ 3 ہزار ریال کی مقررہ حد سے زیادہ ذاتی سامان لانے والے مسافروں کو ڈیوٹی ادا کرنا ہوگی۔

    تفصیلات کے مطابق سعودی محکمہ کسٹم و ٹیکس کے ٹوئٹر اکاؤنٹ پر ڈیوٹی کے حوالے سے کیے گئے استفسار کے جواب میں حکام نے کہا کہ تین ہزار ریال کی مقررہ حد سے زیادہ ذاتی سامان لانے والے مسافروں کو اس پر ڈیوٹی ادا کرنا ہوگی، تاہم استعمال شدہ سامان پر کسٹم ڈیوٹی عائد نہیں کی جاتی۔

    محکمہ کسٹم نے وضاحت کہ ذاتی استعمال کی ایسی اشیا جن کی مالیت 3 ہزار ریال سے زائد ہوگی، اس پر ڈیوٹی فی فرد کے حساب سے عائد کی جاتی ہے، خاندان کے حساب سے نہیں۔

    محکمے نے بتایا کہ استعمال شدہ ذاتی سامان پر کسٹم ڈیوٹی عائد نہیں کی جاتی، لایا جانے والا قیمتی سامان فیکٹری کی پیکنگ میں ہو اور استعمال شدہ نہ ہو اور اس کی مالیت تین ہزار ریال سے زائد ہو، تو اس پر ڈیوٹی ادا کرنا لازمی ہے۔

    اگر مسافروں کے پاس سامان کی قیمت پر مبنی رسید نہ ہو تو اس صورت میں کیا کیا جائے گا؟ محکمے نے کہا کہ ایسی اشیا جن کی مالیت کے سلسلے میں مسافروں کی جانب سے خریداری رسید مہیا نہ کی جائے، اس سامان کی مالیت کا تعین محکمہ کسٹم کی مخصوص کمیٹی کرے گی۔

    محکمے نے وضاحت کی کہ اس کمیٹی کی جانب سے متعین کی گئی قیمت کے حساب سے سامان پرڈیوٹی ادا کرنا مسافر کے ذمہ ہوتا ہے۔

  • ماسک نہ پہننے والے جوڑے کے ساتھ طیارے کے مسافروں نے کیا کیا؟

    ماسک نہ پہننے والے جوڑے کے ساتھ طیارے کے مسافروں نے کیا کیا؟

    کرونا وائرس کی وبا کے دوران کچھ چیزیں ہماری زندگی کا اہم حصہ بن گئی ہیں جن میں سے ایک ماسک پہننا بھی ہے، تاہم اب بھی کچھ افراد ماسک نہ پہننے پر بضد رہتے ہیں اور اپنی اور دوسروں کی زندگی خطرے میں ڈال دیتے ہیں۔

    ایسے افراد کی وجہ سے ان کے ارد گرد کے لوگ بھی پریشانی کا شکار رہتے ہیں اور ان کی وجہ سے ناخوشگوار واقعات بھی پیش آتے ہیں، ایسے ہی ایک واقعے کی ویڈیو سوشل میڈیا پر بے حد وائرل ہورہی ہے۔

    ویڈیو ایک طیارے کی ہے جہاں فلائٹ کا عملہ ایک جوڑے سے ماسک پہننے کی درخواست کر رہا ہے، تاہم مرد و عورت دونوں ہی ماسک پہننے سے انکاری ہیں۔

    اس موقع پر خاتون چیختی چلاتی بھی ہیں جبکہ مرد بھی عملے سے بحث کرتا دکھائی دیتا ہے، لیکن عملہ ماسک پہننے کا اصرار جاری رکھتا ہے۔

    بالآخر جوڑا اٹھ کھڑا ہوتا ہے اور باہر جانے کے لیے اپنا سامان نکالتا دکھائی دیتا ہے۔

    اس موقع پر طیارے میں بیٹھے دیگر افراد خوشی سے تالیاں بجاتے ہیں اور عملے کو سراہتے ہیں، جوڑے کے نیچے اتر جانے کے بعد ایک فلائٹ اٹینڈنٹ مسرور ہو کر رقص بھی کرتی ہے جس پر طیارہ دوبارہ تالیوں سے گونج اٹھتا ہے۔

    اس ویڈیو کو پہلے ٹک ٹاک پر اپ لوڈ کیا گیا بعد ازاں یوٹیوب پر بھی شیئر کردیا گیا جہاں اسے لاکھوں افراد نے دیکھا۔ صارفین نے فلائٹ کریو کی ذمہ داری اور فرض شناسی کی بے حد تعریف کی۔

  • ماسک پہننے کی تاکید پر طیارے کا مسافر آپے سے باہر ہوگیا

    ماسک پہننے کی تاکید پر طیارے کا مسافر آپے سے باہر ہوگیا

    برطانیہ میں ایک مسافر دوران سفر ماسک پہننے کی تاکید پر اس قدر سیخ پا ہوا کہ فلائٹ اٹینڈنٹ کو ٹکر دے ماری، طیارہ لینڈ ہونے پر مسافر کو گرفتار کرلیا گیا۔

    کرونا وائرس کی وبا کے آغاز سے ماسک پہننے کو اسے پھیلنے سے روکنے کے لیے نہایت ضروری قرار دیا گیا ہے، تاہم کچھ افراد غیر ذمہ دارانہ رویہ اپناتے ہوئے نہ صرف ماسک پہننے سے گریز کرتے ہیں بلکہ اس کی تاکید کیے جانے پر پرتشدد ہوجاتے ہیں۔

    ایسا ہی ایک واقعہ آئر لینڈ کی ریان ایئر کی فلائٹ میں پیش آیا جو انگلینڈ کے شہر مانچسٹر جارہی تھی۔

    25 سالہ مسافر ڈینیئل ہینڈری کو فلائٹ اٹینڈنٹ کی جانب سے ماسک پہننے کی تاکید کی گئی تو شراب کے نشے میں بدمست شخص ہتھے سے اکھڑ گیا، ڈینیئل نے پہلے اشتعال انگیز نازی سیلیوٹ کیا اس کے بعد فلائٹ اٹینڈنٹ کو ٹکر دے ماری۔

    اس دوران ڈینیئل نازیبا زبان کا بھی استعمال کرتا رہا جبکہ ایک ایئر ہوسٹس کا بازو بھی پکڑ کر کھینچا، اس کی حرکتوں سے طیارے میں خوف کی فضا پیدا ہوگئی۔

    کچھ دیر بعد طیارہ جیسے ہی اپنی منزل مانچسٹر ایئرپورٹ پر لینڈ ہوا اسے گرفتار کرلیا گیا۔

    حکام کا کہنا ہے کہ مسافر نے طیارے میں بے چینی پیدا کردی جس کی وجہ سے پائلٹ نے طیارے کی رفتار بڑھا دی اور مقرر کردہ وقت سے 25 منٹ پہلے لینڈ کرگیا، یہ کسی حادثے کا سبب بھی بن سکتا ہے۔

  • برطانیہ جانے والے مسافروں کے لیے اچھی خبر

    برطانیہ جانے والے مسافروں کے لیے اچھی خبر

    اسلام آباد: پاکستان انٹرنیشنل ایئرلائن (پی آئی اے) نے برطانیہ کے لیے فلائٹ آپریشن بحال کر نے کے لیے متبادل اتنظامات مکمل کر لیے۔

    تفصیلات کے مطابق برطانیہ جانے والے مسافروں کے لئے اچھی خبر ہے، پی آئی اے کا پرتگال کی فضائی کمپنی ہائی فلائی سے معاہدہ طے پاگیا۔

    ترجمان پی آئی اے کا کہنا ہے کہ پاکستان انٹرنیشنل ایئرلائن نے تمام قانونی تقاضے پورے کیے ہیں،تین سو نشتوں والا جدید طیارہ ائیر بس 330 A آپریٹ ہوگا۔

    ترجمان پی آئی اے عبداللہ خان کے مطابق بر طانیہ آپریشن میں پی آئی اے کے سلاٹ اور کال سائن استعمال ہوگا،ایئر بس 330 میں اکنا می کلاس میں آرام دہ نشستیں اور بزنس کلاس میں فلیت بیڈ نشستیں رکھی گئیں ہیں۔انہوں نے بتایا کہ طیارے میں سماجی فاصلے کا خیال رکھا جائے گا۔

    ترجمان کا کہنا تھا کہ پی آئی اے 14 اگست کو برطانیہ سے آپریشن شروع کرے گی،پرواز پی کے 9702 ..PK مانچسٹر سے 2500 سے زائد مسافروں کو لے کر اسلام آباد روانہ ہو گی، 15 اگست کو پرواز پی کے 9785 اسلام آباد سے مانچسٹر کے لیے روانہ ہو گی۔

    عبداللہ خان نے بتایا کہ پی آئی اے لاہور اور اسلام آباد سے لندن کے لیے بھی پروازیں آپریٹ ہوں گی،پی آئی اے کے مسافروں کو دوران پرواز ان فلائٹ انٹرٹینمنٹ کی سہولت میسر ہو گی۔

    خیال رہے کہ پی آئی اے نے اپنے مسافروں کو سہولیات فراہم کرنے کے لیے 14 اگست سے پروازوں چلانے کا فیصلہ کیا تھا۔

    پی آئی اے کی پروازوں کی معطلی کے بعد دیگر ائیر لائنز نے کرائے غیر معمولی طور پر بڑھا دیے تھے۔پی آئی اے کی پروازوں کے چلنے کے بعد کرائے واپس عام سطح پر آنا متوقع ہیں۔

  • 40 برس سے مسافروں کو کھانا کھلانے والا سعودی شہری

    40 برس سے مسافروں کو کھانا کھلانے والا سعودی شہری

    ریاض: سعودی عرب میں ایک شخص نے 40 برس سے مسافروں کو کھانا کھلا کر مثال قائم کردی، مذکورہ شخص کی بیٹھک ہر خاص و عام کے لیے کھلی ہے۔

    سعودی ویب سائٹ کے مطابق ایک سعودی شہری شیخ محمد بن جروح الشمری حائل الجو روڈ پر 40 برس سے مسافروں کو مفت کھانا کھلا رہا ہے۔

    سعودی شہری نے عجائب گھر نما بیٹھک بنا کر نیا ریکارڈ قائم کیا ہے، 40 برس سے وہ یہاں آنے جانے والوں کی ضیافت بھی کرتے ہیں اور انہیں عجائب گھر نما بیٹھک دیکھنے کا موقع بھی فراہم کر رہے ہیں۔

    سعودی شہری نے اپنی بیٹھک کو قہوے، خوشبو اور شیشے کے لیے استعمال ہونے والی خوبصورت اور نادر اشیا سے سجا رکھا ہے۔

    الشمری کا کہنا ہے کہ انہوں نے تقریباً 48 برس قبل بیٹھک قائم کی تھی، اس کا مقصد مہمانوں کی خدمت اور ان سے رشتے ناتے مضبوط کرنا تھا۔ بیٹھک قائم کرنے کا مقصد اس سے کچھ کمانا تھا اور نہ ہوگا۔

    وہ روزانہ یہاں پر مسافروں کی ضیافت بھی کرتے ہیں اور انہیں کھانا پیش کرتے ہیں۔

    الشمری کا کہنا تھا کہ وزارت سیاحت نے انہیں بیٹھک کو عجائب گھر میں تبدیل کرنے کی پیشکش کی تھی لیکن انہوں نے شکریے کے ساتھ وزارت کی پیشکش مسترد کردی۔

    وہ کہتے ہیں کہ ماضی کی طرح مستقبل میں بھی اپنی بیٹھک سیاحوں اور راہ گیروں کے لیے کھلی رکھیں گے۔

  • ماسک پہننے کی تاکید پر مسافروں کا بس ڈرائیور پر بہیمانہ تشدد، ڈرائیور ہلاک

    ماسک پہننے کی تاکید پر مسافروں کا بس ڈرائیور پر بہیمانہ تشدد، ڈرائیور ہلاک

    پیرس: فرانس میں ایک بس ڈرائیور مسافروں کے حملے سے زخمی ہو کر ہلاک ہوگیا، ڈرائیور اور مسافروں کے درمیان فیس ماسک پہننے کے معاملے پر جھگڑا ہوا۔

    59 سالہ فلپ کو گزشتہ ہفتے ساؤتھ ویسٹرن ٹاؤن میں حملے کا نشانہ بنایا گیا، فلپ نے بس میں چڑھنے والے کچھ مسافروں کو ماسک پہننے کا کہا جس پر مسافروں نے مشتعل ہو کر اسے بہیمانہ تشدد کا نشانہ بنایا۔

    2 دن اسپتال میں رہنے کے بعد فلپ دم توڑ گیا۔ فلپ کی بیٹی میری کے مطابق ڈاکٹروں نے انہیں دماغی طور پر مردہ قرار دے دیا تھا اور وہ لائف سپورٹ سسٹم پر تھے۔

    اہلخانہ نے ان کا لائف سسٹم سپورٹ بند کردینے کا فیصلہ کیا تھا اور بیٹی کے مطابق ان کے فیصلے کو ڈاکٹرز کی حمایت بھی حاصل تھی۔

    فرانسیسی وزیر اعظم جین کسٹکس نے فلپ کو خراج تحسین پیش کرتے ہوئے کہا کہ فلپ ایک مثالی شہری تھا اور قوم اسے کبھی فراموش نہیں کرے گی، انہوں نے حملے کو بزدلانہ قرار دیتے ہوئے کہا کہ حملہ آوروں کو سخت سے سخت سزا دی جائے گی۔

    فلپ کے اہلخانہ نے ان کی موت کے بعد ایک مارچ کا بھی اہتمام کیا جس کا آغاز اسی بس اسٹاپ سے کیا گیا جہاں فلپ پر حملہ ہوا تھا۔

    اب تک 2 مسافروں پر ارادہ قتل کی دفعات عائد کی گئی ہیں تاہم پولیس کا کہنا ہے کہ فلپ کی موت کے بعد ان پر قتل کی دفعات عائد کردی جائیں گی، 3 مزید افراد بھی پولیس کی حراست میں ہیں جن میں سے 2 پر فلپ کی مدد نہ کرنے جبکہ تیسرے پر حملہ آور کو پناہ دینے کا الزام ہے۔

    پولیس کا کہنا ہے کہ واقعے کے بعد فلپ کے دیگر ساتھیوں نے سیکیورٹی فراہم کیے جانے تک کام کرنے سے انکار کردیا تھا۔ ان کا مطالبہ تھا کہ طویل فاصلے کے روٹ پر انہیں سیکیورٹی ایجنٹس فراہم کیے جائیں جو بس میں موجود رہیں۔

  • کروناوائرس: مسافروں کے لیے نئی سفری ہدایات جاری

    کروناوائرس: مسافروں کے لیے نئی سفری ہدایات جاری

    کراچی: سول ایوی ایشن اتھارٹی نے مسافروں کے لیے نئی سفری ہدایات جاری کردیں، کرونا وائرس کے حامل مسافر کو ٹکٹ جاری کرنے سے روک دیا گیا۔

    تفصیلات کے مطابق سول ایوی ایشن اتھارٹی کی جانب سے نئی ٹریول ایڈوائزری سے متعلق جاری کردہ نوٹیفکیشن کے تحت تمام ائیر لائن کو کرونا وائرس کے حامل مسافر کو ٹکٹ جاری کرنے سے روک دیا گیا۔

    نوٹیفکیشن کے مطابق کرونا وائرس کے علامات میں نرلہ، کھانسی، زکام، بخار اور سانس لینے میں دشواری کے حامل مسافر کو آئیر لائن ٹکٹ جاری نہ کریں، ٹکٹ لینے کے بعد مسافر میں کرونا وائرس کی علامات ظاہر ہونے پر ایئرپورٹ نہیں آئیں، مسافر صرف اطلاع دینے کا پاپند ہوگا۔

    ’96 گھنٹوں کے اندر کرونا کلیئر کی رپورٹ کے حامل مسافروں کو ترجج دی جائے گی‘۔

    خیال رہے کہ کرونا کے پھیلاؤ روکنے کے لیے مذکورہ اقدام اٹھایا گیا ہے۔ کرونا وائرس کے خطرات کے پیش نظر مسافروں کا آئیر پورٹ پر ماسک کے ساتھ ساتھ سینٹائرز اور سماجی فاصلہ بھی ضروری ہے۔

  • طیارے میں مسافر نے جینا حرام کردیا

    طیارے میں مسافر نے جینا حرام کردیا

    طیارے میں سفر کرنے والے مسافر اپنے معیار کا بڑا خیال رکھتے ہیں، فضائی سروس فراہم کرنے والی کمپنی بھی اپنے صارفین کے معیار کو مدنظر رکھتے ہوئے اُن کے لیے مختلف سہولیات متعارف کراتی ہے۔

    کبھی کبھار طیارے میں ایسی عجیب وغریب حرکات سامنے آتی ہیں جو سوشل میڈیا کی غذا بن جاتی ہیں۔

    سماجی رابطے کی ویب سائٹ ٹوئٹر پر ایسی ویڈیو وائرل ہوئی جس میں جہاز کا مسافر اپنے پیچھے بیٹھے شخص کو چھیڑتا ہوا نظر آیا ہے۔ مذکورہ ویڈیو نے سوشل میڈیا پر ایک نئی بحث چھیڑ دی۔

    ویڈیو میں دیکھا جاسکتا ہے کہ شہری پچھلی سیٹ پر بیٹھے شخص کے ٹانگ کے بال کھینچ رہا ہے۔

    اسی نوعیت کی منفرد اور مزاحیہ ویڈیوز کئی بار سوشل میڈیا کی زینت بن چکی ہیں۔ کئی مرتبہ مسافر طیارے میں کسی غیر آدمی کا کھانا کھا جاتے ہیں تو کبھی متعدد بار ایک دوسرے سے لڑتے ہوئے بھی نظرآتے ہیں۔