مسجد الحرام جہاں دنیا بھر کے مسلمان عبادت کے لئے آتے ہیں اور اللہ کے حضور سجدہ ریز ہوتے ہیں، سعودی حکومت کی جانب سے نمازیوں کے لئے بڑی تعداد میں خوبصورت سبز قالین بچھائے گئے ہیں۔
بین الاقوامی خبر رساں ادارے رپورٹ میں بتایا گیا ہے کہ مسجد الحرام میں بچھائے گئے قالینوں کو مکہ مکرمہ کی ایک بڑی خصوصی لانڈری میں دھو کر جراثیم سے محفوظ اور پاک کیا جاتا ہے۔
ان خوبصورت قالینوں کی دیکھ بھال، صفائی اور جراثیم سے پاک کرنے کا عمل مہارت سے کیا جاتا ہے، اسی لیے دونوں مقدس مساجد کی عمومی صدارت ان قالینوں کی صفائی پر خصوصی توجہ دیتی ہے۔ اس کام کے لیے جدید آلات کو استعمال میں لایا جاتا ہے۔
واضح رہے کہ مسجد الحرام کے مختلف حصوں میں کم سے کم 35 ہزار قالین موجود ہیں، اگر ان قالینوں کے کناروں سے کنارے ملا کر رکھے جائیں تو ان کی لمبائی ایک سو کلومیٹر بن جائے گی۔
رپورٹ کے مطابق سپروائزر، قالین لانڈری یونٹ صدارت عمومی امور حرمین محمد العتیبی کا اس حوالے سے کہنا ہے کہ جدید لانڈری میں ماہرین کی زیر نگرانی قالینوں کی روزانہ صفائی پانچ مراحل میں مکمل ہوتی ہے۔
پہلے مرحلے میں قالینوں کو مشین کے ذریعے جھاڑ کر مٹی صاف کی جاتی ہے۔ دوسرے مرحلے میں قالینوں کو شیمپو استعمال کر کے صاف پانی سے واش کیا جاتا ہے، تاکہ قالین مکمل طور پر پاک و پاکیزہ ہوجائیں۔
محمد العتیبی کا کہنا ہے کہ تیسرے مرحلے میں قالینوں کو مشین کے ذریعے خشک کیا جاتا ہے۔ چوتھے مرحلے میں انہیں مکمل سکھانے کے لیے سورج کی روشنی اور صاف ہوا میں پھیلا دیا جاتا ہے۔
پانچویں مرحلے میں قالین پر برش چلا کر عرق گلاب کا چھڑکاؤ ہوتا ہے۔جس کے بعد قالین پاک و کیزہ ہوکر خوشبوؤں سے معطر ہوجاتا ہے۔
