لاہور: امریکی فنڈ سے تاریخی مسجد وزیر خان بحال اور محفوظ کر دی گئی۔
لاہور میں تعینات امریکی قونصل جنرل کرسٹین ہاکنز نے تاریخی مسجد وزیر خان کے محفوظ اور بحال ہونے والے جنوبی حصے کا افتتاح کر دیا۔
اس منصوبے پر 2 لاکھ امریکی ڈالر لاگت آئی ہے، جس کے لیے فنڈنگ یو ایس ایمبیسڈر فنڈ سے کی گئی، امریکی قونصل جنرل نے بحال اور محفوظ ہونے والے جنوبی حصے کا تفصیلی دورہ کیا۔
محفوظ اور بحال ہونے والے حصے میں سترہویں صدی کے امام ضامن کا مقبرہ، 6 حجرے، مرکزی حصہ اور مسجد کے جنوب مشرقی مینار شامل ہیں۔
واضح رہے کہ محفوظ اور بحال کیے گئے حصے پر آنے والی کل لاگت دو لاکھ امریکی ڈالر ہے، گزشتہ 20 برس میں امریکی ایمبیسڈر فنڈ کے ذریعے 32 ثقافتی ورثہ سائٹس کو بحال اور محفوظ کیا جا چکا ہے۔
دورے کے بعد امریکی سفیر کا کہنا تھا کہ ثقافتی ورثے کی بحالی خوش آئند اقدام ہے، یہ ورثہ شراکت کی بنیاد پر بحال کیا گیا ہے، امریکا پاکستان میں ثقافتی ورثے کی بحالی میں دل چسپی رکھتا ہے۔
وزیر خان مسجد 17 ویں صدی کی ہے، اس مسجد کو مغل شہنشاہ شاہ جہاں کے دور میں تعمیر کیا گیا تھا، وزیر خان مسجد کی تعمیر 1634 عیسوی میں شروع ہوئی اور 1641 میں مکمل ہوئی۔ یہ مسجد شہر لاہور میں دہلی دروازہ، چوک رنگ محل اور موچی دروازہ سے تقریباً ایک فرلانگ کی دوری پر واقع ہے۔
