کراچی: مسقط ایئرپورٹ پر خرابی کے باعث ہنگامی لینڈنگ کرنے والا طیارہ بحالی کے بعد کراچی پہنچ گیا۔
تفصیلات کے مطابق مسقط میں 13 دن سے خراب پی آئی اے کے طیارے کی مرمت ہو گئی، جس کے بعد یہ طیارہ کراچی پہنچ گیا ہے۔
بوئنگ 777 طیارہ 6 مارچ کو مدینہ سے اسلام آباد آتے ہوئے فنی خرابی کا شکار ہوا تھا، جس کے باعث طیارے کو مسقط ایئرپورٹ پر ہنگامی لینڈنگ کرنی پڑی تھی، طیارے کی بحالی کے لیے پی آئی اے انجینئرنگ ٹیم ڈیڑھ ہفتے سے مسقط میں تھی۔
ترجمان پی آئی اے کے مطابق بوئنگ 777 طیارے کے لیے متبادل انجن سی 130 جہاز سے مسقط بھیجا گیا تھا، جہاز کے انجن کی تبدیلی کا کام دو دن پہلے مکمل کیا گیا، ذرائع کا کہنا ہے کہ اے پی بی ایچ وی رجسٹریشن کے طیارے کی مرمت پر خطیر اخراجات آئے ہیں۔
پی آئی اے ترجمان کا کہنا ہے کہ انجن تبدیلی کے بعد بوئنگ 777 کی ٹیسٹنگ بھی کی گئی ہے۔
