Tag: مسلح افراد

پشاور: وزیر باغ میں انٹیلی جنس بیورو کے انسپکٹر عثمان گل فائرنگ سے جاں بحق ہوگئے۔ مسلح افراد نے ان پر 2 سے 3 فائر کیے جس کے بعد وہ موقع پر ہی دم توڑ گئے۔

حکام کے مطابق عثمان گل پر جس وقت فائرنگ کی گئی وہ اس وقت گھر سے دفتر جانے کے لیے نکلے تھے۔

فائرنگ کے واقعہ میں ایک بچہ بھی زخمی ہوا ہے، تاہم اس کی تصدیق نہیں ہوسکی کہ آیا وہ کوئی راہگیر بچہ تھا یا مقتول انسپکٹر کے ساتھ ان کے گھر سے نکلا تھا۔ بچے کو طبی امداد کے لیے لیڈی ریڈنگ اسپتال منتقل کردیا گیا۔

پولیس کے مطابق مسلح افراد نے عثمان گل پر 2 سے 3 فائر کیے۔ دہشت گردانہ کارروائی کے بعد ملزمان جائے وقوع سے فرار ہوگئے جن کی تلاش کے لیے شہر کی ناکہ بندی کردی گئی ہے۔

مقتول انسپکٹر کی لاش پوسٹ مارٹم کے لیے مردہ خانے منتقل کردی گئی ہے۔ پولیس کا کہنا ہے کہ ملزمان موٹر سائیکل پر سوار تھے، جائے وقوعہ سے شواہد اکٹھے کر لیے گئے ہیں اور مزید تفتیش جاری ہے۔

پشاور میں اس سے قبل بھی سیکیورٹی حکام اور پولیس کو کئی بار نشانہ بنایا جاچکا ہے۔ گذشتہ ہفتے چارسدہ بس اڈے کے قریب بم دھماکے کے نتیجے میں ٹریفک پولیس اہلکار سمیت 3 افراد زخمی ہوگئے تھے۔

چترال: چترال کی وادی بریر میں خوف کا راج جاری ہے اور مکینوں نے تیسرے روز بھی وہاں مشکوک سرگرمیوں کی شکایت کی ہے۔

تفصیلات کے مطابق چترال کی تحصیل دروش کے علاقے بریر میں چند مسلح افراد دیکھے گئے جو ممکنہ طور پر افغانستان سے آئے تھے۔ تاحال کسی جانی یا مالی نقصان کی اطلاع تو نہیں ملی لیکن چترال کے رہائشی سخت خوف و ہراس کا شکار ہیں۔

اب سے 2 روز قبل چترال کے علاقہ بمبورت میں 2 گلہ بانوں کو بھی قتل کردیا گیا تھا جبکہ اس سے اگلے ہی دن ایک اور کارروائی میں مسلح افراد ڈھائی ہزار بکریاں چرا کر اپنے ساتھ لے گئے۔

چترال میں آغا خان ایجوکیشن آفس میں آتشزدگی *

آج تیسرے روز بھی اسی قسم کی مشکوک سرگرمی دیکھی گئی۔

مقامی افراد کا کہنا ہے کہ مسلح افراد کے داخلے کی خبر سنتے ہی لوگوں کا ایک جم غفیر وہاں جا پہنچا اور انہوں نے مسلح افراد کو بھاگنے پر مجبور کردیا۔ انہوں نے متعلقہ حکام سے مطالبہ کیا ہے کہ وہ ان کارروائیوں کی روک تھام کے لیے سخت اقدامات اٹھائیں۔

مقامی افراد کا کہنا ہے کہ مسلح افراد برف سے ڈھکی پہاڑیوں سے اتر کر آتے ہیں جو افغانستان اور چترال کی سرحد کو ایک دوسرے سے علیحدہ کرتی ہیں۔ کچھ افراد نے خدشہ ظاہر کیا کہ یہ مسلح افراد کالعدم تنظیموں کے کارندے بھی ہوسکتے ہیں۔ چند دن قبل ان مسلح افراد کے چترال میں داخلے کی خبر پوری کیلاش وادی میں گردش کر رہی تھی۔

چترال میں قدرتی برف کا کاروبار عروج پر *

واقعہ کے بعد ایڈیشنل ڈی سی عبدالغفار نے جائے وقوع کا دورہ کیا۔ انہوں نے وہاں تعینات پولیس اہلکاروں اور قانون نافذ کرنے والے اداروں کو سختی سے ہدایات دیں کہ وہ اپنے فرائض نبھاتے ہوئے لوگوں کی جان و مال کا تحفظ کریں۔

بعض افراد کے مطابق یہ کارروائیاں ایک سازش کے تحت کی جارہی ہیں تاکہ کیلاشی اپنا قبیلہ اور گھر چھوڑ کر یہاں سے چلے جائیں۔ ان کا یہ بھی کہنا ہے کہ ایک ایسے موقع پر جب شندور فیسٹیول منعقد کیا گیا تاکہ پاکستان کا ایک مثبت تاثر اجاگر کیا جاسکے، ایسے واقعات ملک کو بدنام کرنے کی مہم کا حصہ ہیں۔