Tag: مسلمان سائنسدان

یہ عرب دنیا کے ایک فلسفی، مصنّف، محقق اور ماہرِ حیاتیات جاحظ کا تذکرہ ہے۔ محققین لکھتے ہیں کہ جاحظ ہی وہ مسلمان مفکر تھے جنھوں نے ڈارون سے ہزار برس قبل نظریۂ ارتقا پیش کیا۔ مطالعہ کا شوق اور علمی و تحقیقی کاموں کی لگن رکھنے والے جاحظ کی ناگہانی موت بھی کتابیں ہی بنی تھیں۔

جاحظ کا پورا نام ابو عثمان عمرو بحرالکنانی البصری تھا۔ محققین کے مطابق وہ 776 عیسوی میں بصرہ میں پیدا ہوئے۔ غریب خاندان کے جاحظ کے بارے میں کہا جاتا ہے کہ وہ بدہیئت تھے۔ ان کے دیدے بڑے اور آنکھیں باہر کی جانب گویا ابلی ہوئی تھیں۔ بچّے اور اکثر بڑے بھی ان کو دیکھ کر مذاق اڑاتے تھے۔ اسی نسبت سے وہ جاحظ مشہور ہوئے جس کا عربی میں ایک معنی عجیب الخلقت ہے یا ایسا شخص جس کی آنکھیں باہر کو ابلی ہوئی معلوم ہوں۔ جاحظ کو بچپن میں دریا سے مچھلیاں پکڑ کر بیچنے کا کام کرنا پڑا اور انھوں نے گزر بسر میں مشکلات کا سامنا کیا۔

جاحظ نے اپنی شکل و صورت اور غربت کو اپنے علمی ذوق و شوق کے سامنے ڈھیر ہونے پر مجبور کر دیا۔ چارلس ڈارون نے اپنے مشاہدات اور گہرے غور و فکر کے بعد نظریۂ ارتقا کو ٹھوس عقلی اور استدلالی بنیاد فراہم کی تھی جس پر آج تک تحقیق کا سلسلہ جاری ہے اور اس نظریۂ ارتقا کو بنیاد بنا کر سائنس داں زندگی کے بارے میں بہت کچھ جان رہے ہیں۔ لیکن جاحظ کئی صدیوں‌ پہلے یہ تصور پیش کر چکے تھے۔

جاحظ نے اس دور کے رواج کے مطابق تعلیم حاصل کرنے کے ساتھ فارغ اوقات میں مختلف علمی اور ادبی مجالس میں شرکت کرتے اور وہاں علماء اور اپنے وقت کی فاضل شخصیات کی تقاریر اور مباحثے سنا کرتے تھے۔ یہ وہ زمانہ تھا، جب عباسی عہد میں معتزلہ فرقہ جڑ پکڑ رہا تھا اور ہر طرف مذہب ہر مباحث، فلسفہ اور سائنس کے موضوعات پر دھواں دھار تقریریں ہوا کرتی تھیں۔ جاحظ نے اسی دور میں‌ اپنے اندر علمی ذوق و شوق کو پنپتا ہوا پایا اور وہ کتب خانوں میں‌ وقت گزارنے لگے جس سے انھیں اپنے نظریات کو وضع کرنے میں مدد ملی۔ عباسی سلطنت کے اس عروج کے دور میں‌ خلیفہ ہارون الرشید اور مامون الرشید کے بنوائے ہوئے کتب خانوں، اور علم و فنون کے لیے سازگار ماحول میں جاحظ نے بھی خود کو منوایا۔ نوجوان جاحظ نے مختلف و متنوع موضوعات پر ایک کے بعد ایک تصنیف پیش کی اور جلد ہی ان کی شہرت دور تک پھیل گئی۔ یہاں تک کہ عباسی خلیفہ مامون الرشید بھی ان کے قدردانوں میں شامل ہو گئے۔ بعد میں خلیفہ المتوکل نے انھیں اپنے بچوں کا استاد مقرر کیا۔

جاحظ نے سائنس، جغرافیہ، فلسفہ، صرف و نحو اور علم البیان جیسے کئی موضوعات پر قلم اٹھایا۔ ان کی کتابوں کی تعداد دو سو کے قریب بتائی گئی ہے، تاہم یہ سبھی تصانیف محفوظ نہیں رہ سکیں۔ ہم تک ان کی چند ہی کتابیں پہنچی ہیں اور ان میں ایک ‘کتاب البخلاء’ (بخیلوں کی کتاب) بھی ہے جو نویں صدی کے عرب معاشرے کا زندہ مرقع ہے جس میں انھوں نے متعدد لوگوں کی جیتی جاگتی تصویریں پیش کی ہیں۔

اگر جاحظ کی سب سے مشہور تصنیف کی بات کی جائے تو یہ زمین پر ارتقا کے سلسلے میں ‘کتاب الحیوان’ ہے۔ یہ ایک قسم کا انسائیکلوپیڈیا ہے جس میں جاحظ نے ساڑھے تین سو جانوروں کا احوال بیان کیا ہے۔ اسی کتاب میں جاحظ نے چند ایسے تصورات پیش کیے جو حیرت انگیز طور پر ڈارون کے نظریۂ ارتقا سے مشابہ ہیں۔

شاعر مشرق علامہ اقبال نے بھی جاحظ کا ذکر کیا ہے۔ اپنے خطبات کے مجموعے ‘ری کنسٹرکشن آف ریلیجیئس تھاٹ ان اسلام’ (اسلامی مذہبی فکر کی تشکیلِ نو) میں وہ لکھتے ہیں کہ ‘یہ جاحظ تھا جس نے نقلِ مکانی اور ماحول کی وجہ سے جانوروں کی زندگی میں آنے والی تبدیلیوں کی طرف اشارہ کیا ہے۔’

اس مسلمان مفکر کی موت کا سبب بھی یہی علمی شغف بنا۔ کہا جاتا ہے کہ سن رسیدہ جاحظ ایک روز کتابوں کی الماری سے کسی موضوع پر کوئی کتاب نکال رہے تھے کہ بھاری بھرکم الماری ان پر آ پڑی۔ بوڑھے جاحظ اس الماری کے نیچے دب کر ہلاک ہوگئے تھے۔

عالمِ اسلام میں کئی نام اپنے علمی و تحقیقی کاموں‌ کی بدولت ممتاز ہوئے اور آج جدید سائنس اور غیرمسلم بھی ان کے کارناموں‌ کا اعتراف کرتے ہیں۔ انسانی جسم میں دورانِ خون کا جدید نظریہ ولیم ہاروے سے منسوب کیا جاتا ہے، لیکن صدیوں پہلے ابن النفیس نے اس پر اپنی تحقیق کے بعد اپنا نظریہ پیش کیا تھا۔

انسانی جسم میں خون کی گردش کا نظریہ پیش کرنے والے ابن النفیس کا نام مسلمانوں‌ کے اُس سنہرے دور کی یاد بھی تازہ کر دیتا ہے جس میں علمیت کا اعلیٰ‌ معیار قائم ہوا اور ایجاد و دریافت کے ساتھ فلسفہ و فنون لطیفہ میں‌ بے مثال کام ہوا۔

محققین کے مطابق ابن النفیس کا انتقال 17 دسمبر 1288ء کو ہوا تھا۔ آج دنیائے طبّ کے اس عالم فاضل کا یومِ وفات ہے۔ تاہم یہ وہ شخصیت ہیں جن کی علمیت اور کام سے یہ دنیا پچھلی صدی میں‌ واقف ہوئی ہے۔ وہ دمشق میں سنہ 1210ء میں پیدا ہوئے تھے۔ ابن النفیس کو اپنے دور کا ماہر طبیب اور ایک محقّق ہی نہیں اصولِ فقہ، منطق اور صرف و نحو کا ماہر بھی تسلیم کیا گیا ہے۔ دمشق میں‌ بیمارستانِ نوری میں طبّ کی تعلیم حاصل کرنے والے ابن النفیس بعد میں قاہرہ چلے گئے جو اس دور میں عملی اور نظری طبّ کے اعلیٰ مرکز کے طور پر مشہور تھا۔ وہاں اس وقت طبّ و جراحی کے کئی ماہر اور حیاتیات کے مضمون میں عالم فاضل شخصیات موجود تھیں جن سے استفادہ کرنے والوں‌ میں ابن النفیس بھی شامل ہیں۔

ابن النفیس کی طبّ میں‌ دل چسپی اور ان کی غور و فکر کی عادت نے انھیں مسلسل تحقیق اور تجربات پر آمادہ کیا اور ایک وقت آیا جب انھیں “رئیس الاطباء “ کے خطاب سے سرفراز کیا گیا۔ بعد میں وہ بیمارستانِ ناصری سے منسلک ہوئے اور علاج معالجے کے ساتھ ساتھ وہاں طبّ کی تعلیم بھی دیتے رہے۔ ابن النفیس نے اپنے علم اور تجربات کو کتابی شکل میں بھی محفوظ کیا۔ ان کی سب سے بڑی تصنیف “الشامل فی الطبّ” ہے جو بدقسمتی سے مکمل نہیں ہو سکی، لیکن اس کا ایک ضخیم مخطوطہ دمشق میں محفوظ ہے۔ مسلمان ماہرِ طبّ ابن النفیس نے امراضِ چشم پر بھی تحقیق کی اور ایک تصنیف یادگار چھوڑی۔ کہتے ہیں کہ اس کا نسخہ بھی یورپ میں محفوظ ہے۔

مسلمان ماہرِ طبّ ابن النفیس کا چرچا پچھلی صدی میں اس وقت ہوا، جب ایک نوجوان عرب طبیب امین اسعد خیر اللہ نے اپنی تحقیق میں یہ انکشاف کیا کہ ابن النفیس نے اپنی شرح “تشریحِ ابن سینا” میں ابنِ سینا اور جالینوس سے اختلاف کیا تھا۔ اس کے ساتھ انھوں نے دورانِ خون سے متعلق چند اہم انکشاف بھی کیے تھے۔ مصنّف نے اپنے مقالے میں لکھا کہ خون کی گردش کا جو طبّی نظریہ صدیوں پہلے انھوں نے دیا تھا، اسی کو بنیاد بنا کر بعد میں مغربی سائنس دانوں نے مزید تحقیق کی، لیکن افسوس اس بات کا ہے کہ انھوں نے ابن النفیس کا نام نہیں‌ لیا۔ دنیا کو اس مسلمان ماہرِ طبّ کے نظریۂ دورانِ خون کا علم اس لیے بھی نہیں ہو سکا کہ ان کی اس شرح کے تراجم اُس دور میں نہیں‌ ہوئے تھے۔ کہا جاتا ہے کہ اس نظریے کی تفصیل لاطینی میں ترجمہ کی گئی تھی، لیکن یہ بہت ناقص ترجمہ تھا اور اسی لیے یہ ماہرین کی نظروں میں نہیں آ سکا تھا۔

طبیب و محقق ابن النفیس کی تصانیف میں غیر طبّی موضوعات پر کتب بھی شامل ہیں جن میں سے ایک الرسالہ الکاملیہ فی السیرہ النبویہ اور فاضل بن ناطق بھی شامل ہے۔ ایک جگہ ان کا حلیہ بیان کرتے ہوئے لکھا ہے کہ ابن النفیس طویل القامت اور دبلے پتلے تھے، لیکن صاحبِ مروّت اور علم و فن کی قدر دان مشہور تھے۔ انھوں نے شادی شدہ نہیں کی تھی اور اپنا گھر، ذاتی کتب خانہ اور اپنی جمع پونجی بھی طبّی تحقیق کے لیے دے دی تھی۔ ابن النفیس کا انتقال قاہرہ میں ہوا۔

یہ ان چند مسلمان سائنس دانوں اور ان کے علمی و تحقیقی کاموں کا تذکرہ ہے جن کے علم اور ایجادات سے آج تک دنیا فائدہ اٹھا رہی ہے اور عالمِ اسلام کی ان ناقابلِ فراموش شخصیات کو مغرب اور یورپ بھی عزّت اور احترام سے یاد کرتا ہے۔ یہ درست ہے کہ آج عالمِ اسلام علم و فنون اور سائنس کے میدان کے ایسے شہ سواروں سے محروم نظر آتا ہے، لیکن چند صدیوں پہلے تک مسلمانوں نے اپنا عروج دیکھا اور کئی لازوال کام کیے اور بے مثال کارنامے انجام دیے ہیں۔

اندلس کے عظیم مسلمان سائنس دان ابنِ رشد نے سورج کی سطح کے دھبوں (Sunspots) کو شناخت کیا تھا جو اس دور میں‌ کسی جدید آلے اور قابلِ بھروسا ٹیکنالوجی سے تہی ہونے کے باوجود ایک بڑا کارنامہ تھا۔ عمر خیام کی بات کی جائے تو انھوں نے شمسی کیلنڈر مرتب کیا تھا۔خلیفہ مامون الرشید کے زمانے میں زمین کے محیط کی پیمائش عمل میں آئی جن کے نتائج کی درستی آج بھی حیران کن ہے۔ سورج اور چاند کی گردش، سورج گرہن، علم المیقات (ٹائم کیپنگ) اور بہت سے سیاروں کے بارے میں غیر معمولی سائنسی معلومات دنیا کو البیرونی جیسے نامور مسلم سائنس دان کی بدولت حاصل ہوئیں۔ علم ہئیت اور فلکیات اور ستارہ شناسی کے ضمن میں اندلس کے مسلمان سائنس دانوں میں اگرچہ علی بن خلاق اندلسی اور مظفرالدّین طوسی کی خدمات بڑی اہمیت رکھتی ہیں، مگر ان سے بھی بہت پہلے تیسری صدی ہجری میں قرطبہ کے عظیم سائنس دان عباس بن فرناس نے اپنے گھر میں جو کمرہ تیار کر رکھا تھا، یہ دورِ جدید میں سیارہ گارہ (پلینٹیریم) کی بنیاد بنا۔ اس میں ستارے، بادل اور بجلی کی گرج چمک جیسے مظاہرِ فطرت کا بخوبی مشاہدہ کیا جا سکتا تھا۔ بعد ازاں البیرونی اور ازرقیل وغیرہ نے قطبین کے آلات کو وضع کیا اور اس شعبہ کو ترقی دی۔

قبلہ کے تعین اور چاند اور سورج گرہن کو قبل از وقت دریافت کرنے، حتیٰ کہ چاند کی گردش کا مکمل حساب معلوم کرنے کا نظام بھی البطانی ابن یونس اور ازرقیل جیسے مسلم سائنس دانوں نے وضع کیا تھا۔ اس سلسلے میں ان کے مرتب کردہ جدول موجود ہیں۔ الخوارزمی کا نام لیں تو وہ حساب، الجبرا اور جیومیٹری کے میدان میں اپنی گراں قدر خدمات کی وجہ سے آج بھی دنیا بھر میں مشہور ہیں۔ ان کی کتاب (الجبر و المقابلہ) سولہویں صدی عیسوی تک یورپ کی یونیورسٹیوں میں بنیادی نصاب کے طور پر پڑھائی جاتی رہی اور اسی سے مغرب میں الجبرا متعارف ہوا۔ اس میں لوگوں کی روزمرہ ضروریات اور معاملات کا حل جیسے میراث، وصیت، تقسیم، تجارت، خرید و فروخت، کرنسی کا تبادلہ، کرایہ وغیرہ کو خوبی سے بیان کیا گیا ہے۔

طبیعیات اور حرکیات میں‌ ابن سینا، الکندی، نصیرالدین طوسی اور ملا صدرا کی خدمات ابتدائی طور پر بہت اہمیت کی حامل ہیں۔ بعد میں اس میدان میں محمد بن زکریا، البیرونی اور ابوالبرکات البغدادی کا نام لیا جاتا ہے جنھوں نے اس شعبۂ علم کو مزید ترقی دی۔ ابن الہیثم نے زمان و مکاں، کششِ ثقل، وزن، پیمائش وغیرہ کے شعبے میں خوب کام کیا۔

دنیا جب ہمارے اہلِ‌ علم اور ان کے کار ہائے نمایاں‌ کا تذکرہ کرتی ہے تو ہم اس پر فخر محسوس کرتے ہیں، لیکن بدقسمتی ہماری یہ ہے کہ ہم نے علم اور عمل کو ترک کردیا ہے اور آج جستجو و سعیٔ مقدور سے دور ہوچکے ہیں۔ یاقوتُ الحموی ایک ایسا ہی نام ہے جن کو عالمِ اسلام کی ایک قابل و باصلاحیت شخصیت تسلیم کیا جاتا ہے۔ وہ ایک مؤرخ اور ماہرِ جغرافیہ تھے۔ آج یاقوت الحموی کی برسی ہے۔

اس مؤرخ اور ماہرِ‌ جغرافیہ کی مشہور کتاب معجمُ البلدان ہے جس کا بشمول اردو کئی زبانوں میں ترجمہ کیا جاچکا ہے۔ جغرافیہ داں یاقوتُ الحموی کی علمی و سائنسی موضوعات پر دیگر کتب بھی نہایت اہمیت کی حامل ہیں۔

اگرچہ اس مسلمان جغرافیہ کے خاندان اور حالاتِ زندگی بہت کم دست یاب ہیں تاہم محققین نے ان کا سنہ وفات 20 اگست 1229ء بتایا ہے۔ تاریخ کے اوراق میں ان کی پیدائش کا سنہ موجود نہیں‌ ہے یا اس پر اختلاف ہے۔ محققین کے مطابق ان کا اصل اور مکمل نام “شہابُ الدّین ابو عبد اللہ یاقوت بن عبد اللہ الحموی الرّومی البغدادی” تھا۔ خیال ہے کہ وہ ایک غلام تھے جن کو روم سے قیدی بنا کر بغداد لایا گیا تھا۔ یہاں انھیں ایک تاجر “عسکرُ الحموی” نے خرید لیا اور اسی نسبت سے یاقوتُ الحموی پکارے گئے۔ ان کے مالک نے انھیں اس غرض سے تعلیم دلوائی کہ وہ ان کے مالِ تجارت اور نفع نقصان کا حساب کتاب کرسکیں۔یاقوت نے اس دور کے نظامِ تعلیم کے مطابق صرف و نحو اور لغت کے دوسرے قاعدے بھی سیکھے اور جب وہ اپنے آقا کے ساتھ تجارت کی غرض سے کہیں‌ جاتے تو اس علاقہ اور شہر کے بارے میں جاننے کی سعی کرتے، اس کے جغرافیہ، تاریخ اور تمدن کو سمجھتے اور یہ شوق اور دل چسپی ان کے لیے مفید ثابت ہوئی۔ انھیں ایک روز آقا نے آزاد کر دیا جس کے بعد یاقوت نے علمی میدان کو وسیلۂ روزگار بنایا۔ کچھ عرصہ بعد وہ اپنے سابق آقا کے پاس لوٹ آئے اور تجارتی اسفار میں بطور نگران ان کی معاونت کرنے لگے۔اس دوران یاقوت الحموی نے کئی منفرد جغرافیائی معلومات اکٹھی کیں، پھر وہ حلب چلے گئے اور وہاں سے خوارزم پہنچے اور وہیں‌ قیام کیا۔ بعد میں دوبارہ حلب آئے اور وہیں وفات پائی۔

یاقوت الحموی کو جغرافیہ اور حساب کتاب سے خصوصی شغف تھا۔ انھوں نے جغرافیہ کے عنوان پر ایک معجم ترتیب دی جس کے مقدمے میں دیگر فنون کے علاوہ فنِ جغرافیہ پر انھوں نے خصوصی باب رقم کیے ہیں۔ یاقوت الحموی نے دور دراز کے اسفار کے دوران جن مختلف مقامات پر قیام کیا اور جو شہر اور قصبات دیکھے، وہاں‌ کے لوگوں کی مدد سے ان کی تفصیل لکھی اور اپنی جغرافیہ کی مہارت سے معلومات کو اس کے ساتھ درج کرکے کتابی شکل میں معجمُ البلدان میں محفوظ کردیا۔ اس مشہور کتاب میں انھوں‌ نے دیگر موضوعات کے ساتھ ساتھ زمین کے بارے میں بھی سائنسی تصورات کو بیان کیا ہے۔