گوجرانوالہ: کامونکی میں قاتلانہ حملے میں جاں بحق مسلم لیگ ن کے ایم پی اے رانا شمشاد اور ان کے بیٹے کو آبائی قبرستان میں سپرد خاک کر دیا گیا۔
گذشتہ روز ٹارگٹ کلنگ کا نشانہ بننے والے مسلم لیگ ن کے ایم پی اے رانا شمشاد اور انکے بیٹے کی نماز جنازہ ادا کی گئی، نمازِ جنازہ میں صوبائی وزیر قانون رانا ثناء اللہ اور اسپیکر پنجاب اسمبلی رانا محمد اقبال سمیت مسلم لیگی اراکین پنجاب اسمبلی، سیاسی، مذہبی و سماجی رہنماؤں سمیت لوگوں کی ایک بڑی تعداد شریک ہوئی۔
صوبائی وزیرِ قانون رانا ثنا اللہ نے رانا شمشاد اور ان کے بیٹے کے قتل کی مذمت کرتے ہوئے کہا کہ قاتلوں تک پہنچ چکے ہیں، چوبیس گھنٹےمیں قاتل گرفتار کرلیے جائیں گے۔
یاد رہے کہ رانا شمشاد کو گذشتہ شب اس وقت نشانہ بنایا گیا، جب وہ اپنے بیٹے اور بھتیجے کے ہمراہ اپنے فارم ہاؤس سے واپس کامونکی آ رہے تھے، سابق گورنر پنجاب چوہدری سرور نے واقعے کو حکومت کی ناکامی قرار دیا ہے۔
دوسری جانب مختلف سیاسی جماعتوں کے رہنماوں کی جانب سے مذمتوں کا سلسلہ جاری ہے۔