Tag: مسلم لیگ ن

لاہور: پاکستان مسلم لیگ ن کے رہنما رانا ثنا اللہ کے خلاف منشیات برآمدگی کیس میں آج بھی فرد جرم عائد نہ ہو سکی۔

اے آر وائی نیوز کے مطابق رانا ثنا اللہ نے موجودہ حکومت کو کرونا قرار دیتے ہوئے کہا کہ اگر یہ 6 ماہ مزید رہ گئے تو لوگ بھوک سے مارے جائیں گے۔

قبل ازیں، رانا ثنا اللہ آج انسداد منشیات عدالت میں پیش ہوئے، عدالت نے آج فرد جرم عائد کرنی تھی مگر رانا ثنا اللہ کے وکلا کی درخواست پر آج بھی کارروائی نہ ہو سکی، جس پر عدالت نے سماعت 5 دسمبر تک ملتوی کرتے ہوئے وکلا کو فرد جرم پر بحث مکمل کرنے کی ہدایت کر دی۔

رانا ثنا اللہ نے عدالت کو بتایا کہ اے این ایف نے ان کی گاڑی سے پرسنل بیگ نکالا جس میں صرف کپڑے تھے۔

رانا ثنا اللہ نے سماعت کے بعد میڈیا سے گفتگو کرتے ہوئے موجودہ حکومت کو کرونا حکومت قرار دیا، انھوں نے کہا کہ ملک میں کرونا سے اموات 2 فی صد ہیں جب کہ حکومتی کرونا سے سو فی صد۔

ان کا کہنا تھا حکومتی کرونا آٹا چینی کھا گیا، عوام حکومتی کرونا کے خلاف باہر نکلیں اگر یہ 6 ماہ مزید رہ گئے تو ملک کو کھا جائیں گے۔

پشاور میں پی ڈی ایم جلسے کی اجازت نہیں دیں گے، مقدمات درج کیے جائیں گے: شوکت یوسفزئی

انھوں نے مزید کہا ہم حکومت کے خلاف تحریک اس سے پوچھ کر نہیں چلا رہے، پشاور جلسہ ہر صورت ہوگا، ہمیں حکومتی اجازت کی ضرورت نہیں۔

رانا ثنا کا کہنا تھا کہ تحریک کا اگلا فیز کتنا سخت ہوگا اور اس میں کیا آپشن استعمال کیے جائیں گے یہ پی ڈی ایم کی قیادت فیصلہ کرے گی۔

لاہور: پاکستان مسلم لیگ ن کے رہنما طلال چوہدری بیان ریکارڈ کرنے کے لیے آنے والی پولیس کے پہنچنے سے قبل ہی اسپتال سے روانہ ہو گئے، ذرایع کا کہنا ہے کہ طلال چوہدری کو اسپتال سے قریبی ساتھی نے فرار کرایا۔

تفصیلات کے مطابق طلال چوہدری کی جانب سے لیگی ایم این اے عائشہ رجب کو ہراساں کرنے کے معاملے میں پنجاب پولیس طلال چوہدری کا بیان ریکارڈ کرنے نیشنل اسپتال لاہور پہنچ گئی لیکن پولیس کے آنے سے پہلے طلال چوہدری اسپتال کا بل ادا کیے بغیر جلد بازی میں چلے گئے۔

طلال چوہدری اسپتال کے پچھلے دروازے سے روانہ ہوئے، ان کو اسپتال سے قریبی ساتھی نے فرار کرایا۔

ادھر اے ایس پی عبدالخالق نے میڈیا سے بات کرتے ہوئے کہا کہ طلال چوہدری اسپتال سے ڈسچارج ہو چکے ہیں، اسپتال انتظامیہ نے بتایا کہ ایک گھنٹہ پہلے طلال چوہدری کو ڈسچارج کیاجا چکا ہے۔

عائشہ رجب سے تنازع طلال چوہدری کو مہنگا پڑ گیا

ڈی ایس پی کا کہنا تھا کہ طلال چوہدری سے جلد رابطہ کر کے ان کا بیان ریکارڈ کیاجائے گا۔ ایک سوال پر انھوں نے کہا کہ اسپتال کی جانب سے انھیں ڈسچارج سلپ نہیں دکھائی گئی۔

یاد رہے کہ طلال چوہدری گزشتہ رات سے نیشنل اسپتال لاہور میں داخل ہیں، لیگی ایم این اے عائشہ رجب کے گھر پر گزشتہ روز ان پر خاتون کے بھائیوں نے تشدد کیا تھا جس کی وجہ انھیں فریکچر آئے تھے۔

آج اس کیس کے سلسلے میں پنجاب پولیس نے 4 رکنی فیکٹ فائنڈنگ کمیٹی بنائی تھی، جس کے چیئرمین ڈی ایس پی عبدالخالق ہیں، اس کمیٹی نے عائشہ رجب اور طلال چوہدری کے بیانات قلم بند کرنے ہیں، اور پھر تین روز میں انکوائری رپورٹ پیش کرے گی۔

ادھر پولیس نے کہا ہے کہ گزشتہ روز طلال چوہدری رات 2 بجکر 40 منٹ پر عبداللہ گارڈن پہنچے تھے، کالونی گیٹ پر روکے جانے پر طلال کی گارڈ سے تلخ کلامی ہوئی، گارڈ نے کہا اہل خانہ سے بات کرائیں لیکن طلال زبردستی گئے، ڈرائیور بھی ان کے ہمراہ ھا لیکن گھر میں داخل ہوتے ہی مار پڑ گئی۔

علاقہ مکینوں کا کہنا ہے کہ طلال نے پٹائی کے بعد گھر سے نکل کر گارڈز کو پکارا تھا، ان کی ایک سال سے اس گھر میں آمد و رفت تھی، طلال چوہدری ہمیشہ رات 12 بجے سے پہلے آتے تھے۔

قبل ازیں، ڈی ایس پی عبد الخالق نے میڈیا سے بات کرتے ہوئے کہا تھا کہ عائشہ رجب اسلام آباد میں ہیں، اگر بیان لینے کے لیے جانا پڑا تو جائیں گے۔ ان کا کہنا تھا کہ طلال فون کال پر عائشہ رجب کے گھر گئے تھے، اس کال کے بوگس ہونے سے متعلق بھی تحقیقات کی جا رہی ہیں۔

لاہور: پاکستان مسلم لیگ ن کے صدر میاں شہباز شریف نے انتخابی اصلاحات کے لیے بلایاگیا اجلاس مسترد کر دیا۔

تفصیلات کے مطابق پاکستان پیپلز پارٹی کے چیئرمین بلاول بھٹو کے بعد شہباز شریف نے بھی انتخابی اصلاحات کے لیے اسپیکر قومی اسمبلی کی جانب سے بلایا گیا اجلاس مسترد کر دیا ہے۔

واضح رہے کہ اسپیکر قومی اسمبلی اسد قیصر نے گلگت بلتستان انتخابات کے معاملے پر 28 ستمبر کو اجلاس طلب کر رکھا ہے۔ شہباز شریف نے مؤقف اختیار کیا ہے کہ اسپیکر کو گلگت بلتستان کے انتخابی امور میں مداخلت کا کوئی اختیار نہیں ہے۔

اپوزیشن لیڈر کا کہنا تھا کہ گلگت بلتستان حساس قومی معاملہ اور کشمیر کاز سے جڑا ہوا ہے، موجودہ حکومت اس معاملے کو اپنی سیاست کی بھینٹ نہ چڑھائے، اور وفاقی حکومت جی بی میں شفاف انتخابات کے عمل میں رکاوٹ نہ بنے۔

گلگت بلتستان الیکشن: پیپلز پارٹی کا اسپیکر کے طلب کردہ اجلاس کے بائیکاٹ کا فیصلہ

شہباز شریف نے کہا فسطائی اور آمرانہ رویہ دیکھتے ہوئے کوئی تعاون نہ کرنے کا فیصلہ کیا گیا ہے، اے پی سی کے نمائندہ اجلاس میں منظور قرارداد اور فیصلوں کی پاسداری کریں گے، حکومت نے ہر تعاون کو ٹھوکر ماری اور اپنی سیاسی ڈراما بازی کے لیے استعمال کیا۔

یاد رہے کہ گزشتہ روز پاکستان پیپلز پارٹی نے بھی گلگت بلتستان میں الیکشن سے متعلق اسپیکر اسد قیصر کے طلب کردہ اجلاس کے بائیکاٹ کا فیصلہ کیا تھا، بلاول بھٹو نے اپنے ٹویٹر اکاؤنٹ پر پیغام میں کہا کہ قومی اسمبلی اسپیکر اور وفاقی وزرا کاگلگت بلتستان الیکشن سے کوئی لینا دینا نہیں ہے، ہم گلگت بلتستان الیکشن میں وفاقی حکومت کی مداخلت کی مذمت کرتے ہیں۔

لاہور: لاہور ہائی کورٹ نے مسلم لیگ ن کے صدر اور اپوزیشن لیڈر شہباز شریف کی ضمانت میں پیر تک توسیع کر دی۔

تفصیلات کے مطابق لاہور ہائی کورٹ میں میاں شہباز شریف کی منی لانڈرنگ کیس میں عبوری ضمانت کی درخواست پر سماعت ہوئی۔ جسٹس سردار احمد نعیم کی سربراہی میں دو رکنی بینچ نے درخواست ضمانت پر سماعت کی۔شہباز شریف عدالت میں پیش ہوئے۔

اپوزیشن لیڈر کے وکیل نے سماعت کے دوران دلائل دیتے ہوئے کہا کہ حکومت کے مشیر اعلان کر رہے ہیں کہ ہم شہباز شریف کو جیل میں ڈال کر نشان عبرت بنائیں گے۔ یہ طے کر کے بیٹھے ہیں کہ شہباز شریف جیل جانے کے لیے اپنے کپڑے ساتھ لائیں۔

امجد پرویز نے کہا کہ نیب پہلے دن سے شہباز شریف کو گرفتار کرنے کا دماغ بنا چکا ہے، جب ریفرنس فائل ہو چکا ہے تو پھر گرفتاری کی کیا ضرورت ہے؟

قائد حزب اختلاف کے وکیل نے کہا کہ شہباز شریف قومی اسمبلی میں اپوزیشن لیڈر ہیں، ان کی آئینی ذمہ داریاں ہیں، شہباز شریف کا نام ای سی ایل میں ڈالا گیا جسے عدالت نے کالعدم قرار دیا۔

شہباز شریف نے عدالت میں بیان دیا کہ جس دن سنا تھا کہ کورونا کی وجہ سے فلائٹس بند ہو رہی ہیں،آخری فلاٸٹ تھی جس کے ذریعے ملک واپس آیا اور نیب کی کارروائی کا سامنا کیا۔

بعدازاں لاہور ہائی کورٹ نے منی لانڈرنگ اور آمدن سے زائد اثاثہ جات کیس میں شہباز شریف کی عبوری ضمانت میں 28 ستمبر تک توسیع کر دی۔