اسلام آباد : سابق وزیراعظم نوازشریف کا کہنا ہے کہ الیکشن قریب ہیں، یہ ضروری ہے سب کے لیے یکساں مواقع ہوں، ایسا نہیں ہونا چاہیے کہ کسی کوبند گلی میں دھکیلا جا رہا ہے اورکسی کوکھلی چھٹی دی جا رہی ہے۔

تفصیلات کے مطابق احتساب عدالت میں پیشی کے بعد میڈیا سے گفتگو کرتے ہوئے مسلم لیگ ن کے قائد نوازشریف کا کہنا تھا کہ کہا جا رہا ہے کہ پنجاب کی کارکردگی اچھی نہیں ہے۔

نوازشریف کا کہنا تھا کہ عوام جانتے ہیں پنجاب حکومت کی کارکردگی کیسی ہے، عام شخص بھی بتائے گا بہترین کارکردگی پنجاب حکومت کی ہے۔

مسلم لیگ ن کے قائد کا کہنا تھا کہ چیف جسٹس نے کچھ دن پہلےجوڈیشل مارشل لاء کے خلاف بیان دیا، اس قسم کے بیانات کے بعدعملی مظاہرہ بھی دکھائی دینا چاہیے۔

سابق وزیراعظم کا کہنا تھا کہ جو کچھ ہو رہا ہے اس پر تحفظات ہیں، ہمارے سینیٹرز کے ساتھ جو سلوک ہوا، یہ بھی درست نہیں تھا۔

نوازشریف کا کہنا تھا کہ پلیئنگ فیلڈ سب کے لیے ہونی چاہیے، انتخابات کو گیوں آگے لے جایا جائے اور کون ہے جو اس طرح کی سوچ رکھتا ہے۔

مسلم لیگ ن کے قائد کا کہنا تھا کہ الیکشن میں سب کے لیے یکساں مواقع ہونے چاہئیں، ایسا نہیں ہونا چاہیے کہ کسی کو بند گلی میں دھکیلا جائے، اگر ایسا کیا گیا تو یہ پری پول دھاندلی ہوگی۔

پاناما کیسزکی وجہ سے ملک میں غیریقینی کی صورت حال ہے‘ نوازشریف

خیال رہے کہ اس سے قبل احتساب عدالت میں صحافیوں سے غیررسمی گفتگو کرتے ہوئے مسلم لیگ ن کے قائد نوازشریف کا کہنا تھا کہ پاناما فیصلے کی وجہ سے ترقی کرتا پاکستان تنزلی کی طرف جا رہا ہے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

اسلام آباد: مسلم لیگ ن کے قائد نوازشریف کا کہنا ہے کہ چیف جسٹس نے کل کہا انتخابات ملتوی ہونےکی گنجائش نہیں ہے، مجھے چیف جسٹس پاکستان کی باتیں اچھی لگیں۔

تفصیلات کے مطابق اسلام آباد میں احتساب عدالت کے باہر میڈیا سے گفتگو کرتے ہوئے سابق وزیراعظم نے کہا کہ میں نے کرپشن کی ہوتی تویہاں نہ کھڑا ہوتا۔

نوازشریف کا کہنا تھا کہ عمران خان نے تو اقبال جرم کیا لیکن رعایت پررعایت دی جا رہی ہے، مجھے سزا دی گئی، میں نے قبول کیا اورعدالتوں کا سامنا کررہا ہوں، یہ درست نہیں کسی کے ہاتھ پاؤں باندھ دیےجائیں، کسی کوچھوڑدیا جائے۔

سابق وزیراعظم کا کہنا تھا کہ مجھے بیٹےسے تنخواہ نہ لینے کے جرم میں نکال دیا گیا، جے آئی ٹی نے پتہ نہیں کہاں سے چیزیں جوڑ دی ہیں۔

مسلم لیگ ن کے قائد کا کہنا تھا کہ عوام سےکہا تھا کہ میری آواز پر آپ لبیک کہیں، میری تحریک کسی کے خلاف نہیں، ووٹ کی عزت کے لیے ہے۔

نوازشریف کا کہنا تھا کہ ہمارے بیانیے کولوگ سمجھ رہے ہیں اور ہمارے ساتھ چل رہے ہیں، ہم اپنے موقف سے ہٹے اورنہ ہی کوئی یوٹرن لیا۔

سابق وزیراعظم کا کہنا تھا کہ حلقہ این اے 120 میں ہمارے لوگوں کو اٹھایا، ورکرز نے آکرخود بتایا کہ رات کے اندھیرے میں انہیں اٹھایا گیا اور انہیں چھوڑا بھی رات کے اندھیرے میں گیا۔

مسلم لیگ ن کے قائد کا کہنا تھا کہ وزیراعظم شاہدخاقان عباسی سے کہا تھا کہ اٹھائے جانے والے کارکنوں کے معاملے کی انکوائری کریں۔

نوازشریف کا کہنا تھا کہ بلوچستان اسمبلی میں جو کچھ ہوا اور سینیٹ انتخابات میں جو بندر بانٹ کہ گئی سپریم کورٹ کو اس کا ازخود نوٹس لینا چاہیے۔

سابق وزیراعظم کا کہنا تھا کہ احتساب عدالت میں زیرسماعت مقدمے کا اوپن ٹرائل ہونا چاہیے تاکہ عوام کو بھی پتہ چلے کہ مقدمے میں ہو کیا رہا ہے، حقائق قوم کے سامنے آنے چاہیے۔

مسلم لیگ ن کے قائد نوازشریف کا کہنا تھا کہ ہم انتخابات کسی صورت ملتوی نہیں ہونے دیں گے، مجھے جیل میں ڈالنا ہے تو ڈال دیں۔

سابق صدر آصف علی زرداری کے چیلنج سے متعلق سابق وزیراعظم نوازشریف کا کہنا تھا کہ زرداری صاحب چیف منسٹری چھیننے سے پہلے حلقوں سے ووٹ تو لے لیں، پنجاب کے حلقوں میں ان کے پاس 4 یا 5 سو ووٹ نکلتے ہیں۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

اسلام آباد : مسلم لیگ ن کے قائد نوازشریف کا کہنا ہے کہ ضمنی ریفرنس بنانے کی کیا ضرورت تھی جب 3 ماہ میں کچھ نہیں نکلا، سزا دینا مقصود ہے تو میرا نام این ایل سی، ای او بی آئی میں ڈال لیں۔

تفصیلات کے مطابق اسلام آباد میں صحافیوں سے غیررسمی گفتگو کرتے ہوئے سابق وزیراعظم نوازشریف نے کہا کہ کسی جگہ کرپشن یا بدعنوانی سامنے آئی تووہ پیش کیوں نہیں کررہے، اثاثےاثاثے کررہے ہیں، کرپشن کا الزام لگایا ہے تو ثابت کریں۔

نوازشریف نے کہا کہ نیب کا کوئی ایسا ریفرنس بتائیں جس میں کرپشن کا الزام نہ ہو؟ پھرمیرے والے ریفرنس کودیکھ لیں کہاں کرپشن کا الزام ہے؟ تمام کیس صرف ہماری فیملی کے کاروبارکے ارد گرد گھوم رہا ہے۔

پرویزمشرف کے خلاف غداری بینچ ٹوٹنے کے سوال پرمسلم لیگ ن کے قائد نوازشریف نے جواب دیا کہ اس طرح تو ہوتا ہے اس طرح کے کاموں میں، انہوں نے کہا کہ ایک بات جانتا ہوں مشرف کا ٹرائل اپنے منطقی انجام کوپہنچے گا۔

سابق وزیراعظم کا کہنا تھا کہ صرف حقیقت پربات کررہا ہوں، احتساب ہرصورت سب کا ہوگا، اب وقت وہ نہیں رہا اور حالات بھی وہ نہیں رہے۔

مسلم لیگ ن کے قائد نوازشریف کا کہنا تھا کہ بے شک پیش نہ ہومفرور رہے، ایک دن کٹہرے میں کھڑا ہونا پڑے گا۔

نوازشریف کا کہنا تھا کہ چیف جسٹس نے فریادی والی بات کی تھی تواس پرقائم رہنا چاہیے تھا، فریادی جیسے الفاظ چیف جسٹس یا کسی کو زیب نہیں دیتے، یہ بھی کہنا کہ وزیراعظم میرے پاس آئے تھے زیب نہیں دیتا۔

وزیراعظم چیف جسٹس ملاقات سے میرے بیانیےکودھچکا نہیں لگا‘ نوازشریف

یاد رہے کہ گزشتہ روز سابق وزیراعظم نوازشریف کا کہنا تھا کہ چیف جسٹس کے بیان پر وزیراعظم شاہد خاقان عباسی مناسب سمجھیں تو وضاحت مانگ سکتے ہیں۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پرشیئر کریں۔