Tag: مسٹر پرفیکشنسٹ

ممبئی: بالی ووڈ میں ’مسٹر پرفیکشنسٹ ‘کے نام سے جانے جانے والے اداکار عامر خان  نے انکشاف کیا ہے کہ انہیں یہ خطاب ایک معروف اداکارہ نے دیا تھا۔

بالی ووڈ سپر اسٹار عامر خان پہلی بار مشہور کامیڈین کپل شرما کے شو میں بطور مہمان شرکت کی، انہوں نے شو میں اپنی ذاتی اور پیشہ ورانہ زندگی سے متعلق دلچسپ گفتگو کی۔

شو کے دوران اداکار عامر خان نے انکشاف کیا کہ یہ جو ’مسٹر پرفیکشنسٹ‘ کا لیبل لگا اس کی ذمہ دار صرف و صرف ایک خاتون ہیں اور وہ شبانہ اعظمی جی ہے۔

بالی ووڈ کے تینوں ’خانز‘ ایک ساتھ فلم میں کب نظر آئیں گے؟ عامر خان کا انکشاف

عامر خان نے مزید کہا کہ جس وقت میں سینما میں نیا نیا آیا تھا تو اس وقت میں فلم ’دل‘ کی شوٹنگ کر رہا تھا، اسی دوران ایک دن فلم کے ڈائریکٹر اندر کمار، میں اور شبانہ اعظمی جی کیمرہ مین بابا اعظمی(شبانہ اعظمی کے بھائی) کے گھر موجود تھے، بابا اعظمی ٹاپ کے کیمرہ مین تھے، ہم اکثر ان کے گھر جایا کرتے تھے۔

عامر خان نے کہا کہ ایک دن ہم ہمیشہ کی طرح فلموں کے بارے میں گفتگو میں مصروف تھے، گفتگو بہت گہری ہوگئی ، اسی دوران شبانہ جی چائے لے آئیں اور مجھ سے پوچھنے لگیں کہ عامر آپ شکر کتنی لو گے؟

عامر خان نے کہا کہ میں بحث میں اتنا کھو گیا تھا کہ مجھے احساس نہیں ہوا کہ وہ کیا پوچھ رہی ہیں، میں نے مڑ کر ان کی طرف دیکھا، سوال سمجھنے اور جواب دینے میں مجھے 5 سیکنڈ لگے، پھر میں نے پوچھا گلاس کتنا بڑا ہے؟ جس کے بعد انہوں نے مجھے کپ دکھایا، میں ابھی تک اس بحث میں ہی کھویا ہوا تھا ، پھر میں نے پوچھا چمچہ کتنا بڑا ہے، انہوں نے مجھے چمچہ دکھایا اور پھر میں نے کہا ایک چمچ۔

عامر خان کے مطابق شبانہ اعظمی نے یہ کہانی ہر جگہ سنائی، انہوں نے ہر ایک سے کہا کہ اگر آپ اس (عامر ) سے پوچھیں کہ چینی کتنی لیں گے؟، تو وہ آپ سے کپ اور چمچ کا سائز پوچھے گا۔