آرمی چیف جنرل سید عاصم منیر نے کہا ہے کہ اسلام امن و آشتی کا مذہب ہے، اسلام میں انتہا پسندی کی کوئی جگہ نہیں۔
آئی ایس پی آر کے مطابق آرمی چیف جنرل سید عاصم منیر سے چرچ آف پاکستان اور بشپ آف رائیونڈ کے ناظم و صدر ڈاکٹر آزاد مارشل کی سربراہی میں مسیحی برادری کے 13 رکنی وفد نے جی ایچ کیو میں ملاقات کی۔
آرمی چیف عاصم منیر نے دو ٹوک الفاظ میں واضح کیا کہ مہذب معاشرے میں کسی کو قانون اپنے ہاتھ میں لینے کی اجازت نہیں دی جا سکتی۔
آرمی چیف جنرل سید عاصم منیر نے قومی ترقی میں مسیحی برادری کے کردار کو سراہا، انھوں نے بالخصوص معیاری تعلیم، صحت عامہ اور فلاحی خدمات سمیت مادر وطن کے دفاع کے لیے مسیحی برادری کے شاندار کردار کی تعریف کی۔
عاصم منیر نے مسیحی برادری کے لیے بھرپور احترام کا اظہار کرتے ہوئے قائداعظم کے متحد اور ترقی پسند پاکستان کے حقیقی وژن پر عمل کرنے کے لیے معاشرے میں بین المذاہب ہم آہنگی کو فروغ دینے کی ضرورت پر زور دیا۔
انھوں نے واضح کیا کہ اسلام امن و آشتی کا مذہب ہے، اسلام اور اسلامی معاشرے میں عدم برداشت اور انتہا پسندی کی کوئی جگہ نہیں ہے۔ انھوں نے کہا کہ مہذب معاشرے میں کسی کو قانون اپنے ہاتھ میں لینے کی اجازت نہیں دی جا سکتی۔
مسیحی برادری کے ارکان نے دہشت گردی سے نمٹنے اور ملک میں اقلیتوں کو محفوظ ماحول فراہم کرنے کے حوالے سے پاک فوج کی کاوشوں کا سراہا۔
انھوں نے آرمی چیف کی جانب سے اقلیتوں کو زیادہ سے زیادہ فعال بنانے اور ایک مربوط اور روادار معاشرے میں ان کا اعتماد بحال کرنے کے لیے اٹھائے گئے اقدامات کو سراہا۔
