اسلام آباد: یمن کی صورتحال پر غور کے لیے وزیرِاعظم کی صدارت میں مشاورتی اجلاس جاری ہے۔
وزیرِاعظم نواز شریف کی زیرِ صدارت اجلاس میں یمن کی صورتحال پر تبادلہ خیال کیا جا رہا ہے۔ وزیرِدفاع خواجہ آصف اور مشیرِخارجہ سرتاج عزیز دورہ سعودی عرب اور سعودی حکام سےملاقاتوں سے متعلق اجلاس کو بریفنگ دے رہے ہیں۔
اجلاس میں تینوں مسلح افواج کے سربراہ بھی شریک ہیں۔
ذرائع کے مطابق اجلاس میں سعودی عرب کی جانب سے تعاون کی درخواست پر پاک فوج کے دستے سعودی عرب بھیجنے اور یمن سے پاکستانیوں کے محفوظ انخلاء اور اس بارے میں دیگر امور کا جائزہ لیا جا رہا ہے۔
واضح رہے کہ اس سے قبل سعودی یمن تنازع سے متعلق حالات کا جائزہ لینے والا پاکستانی وفد وطن واپس پہنچ گیا، خواجہ آصف کا کہنا تھا کہ دورے سے یمن تنازع کو سمجھنے میں مدد ملی ہے۔
اعلی سطح کے وفد نے دورے کے حوالے سے رپورٹ وزیرِاعظم کو پیش کردی ہے، وزیرِدفاع خواجہ آصف نے وطن واپسی پر کہا کہ دورے سے یمن میں جاری تنازعے اور سعودیوں کے خدشات کو بہتر طور پر سمجھنےمیں مدد ملی ہے۔
سعودی حکام نے پاکستان سے فوجی اتحاد میں شامل ہونے کی درخواست کی ہے، جو یمن میں باغیوں سے جنگ کیلئے تشکیل دیا گیا ہے۔
اعلی سطح کے وفد نے سعودی وزیرِ دفاع شہزادہ محمد بن سلمان بن عبدالعزیز سے تبادلۂ خیال کیا۔
خصوصی وفدمیں خواجہ آصف،مشیربرائے امورِخارجہ اور قومی سلامتی سرتاج عزیزپاک فوج اور پاک فضائیہ کے آپریشن ڈائریکٹوریٹس کے افسران شامل تھے، اعلی سطح کے وفد کی رپورٹ پر پاکستان آئندہ کی حکمت عملی طے کرے گا۔
