مشتاق احمد یوسفی الفاظ کا مزاج پہچانتے ہیں اور ایسے زباں داں ہیں جن کی تحریر سے لطف اندوز ہونے کے ساتھ ہم مطالعے کی وسعت اور ان کی نثر کی داد دیے بغیر بھی نہیں رہ سکتے۔ انھیں اپنے عہد کا سب سے بڑا مزاح نگار کہا جاتا ہے اور آنے والے برسوں میں شاید ہی کسی کو یہ مقام کسی کو نصیب ہو سکے۔
مشتاق احمد یوسفی کی تحریریں قاری سے غور و خوض اور تدبّر کا تقاضا بھی کرتی ہیں۔ ان کی عبارات سے لطف اٹھانے کے لیے کئی بار پڑھنے کی ضرورت محسوس ہوتی ہے۔ اردو طنز و مزاح میں انھیں اپنے عہد کا سب سے بڑا مزاح نگار کہا جاتا ہے۔ اپنی کتاب سے متعلق ایک وضاحت کرتے ہوئے انھوں نے 1971ء کی جنگ میں کراچی پر بمباری کا ذکر بھی کیا ہے۔ ملاحظہ کیجیے:
"ایک زمانے میں یہ دستور تھا کہ امرا و رؤسا عمارت تعمیر کراتے تو اس کی ’نیو‘ میں اپنی حیثیت اور مرتبے کے مطابق کوئی قیمتی چیز رکھ دیا کرتے تھے۔ ”
"نواب واجد علی شاہ اپنی ایک منہ چڑھی بیگم، معشوق محل سے آزردہ ہوئے، تو اس کی حویلی ڈھا کر ایک نئی عمارت تعمیر کرائی۔ معشوق محل ذات کی ڈومنی تھی۔ اس نسبت سے اس کی تذلیل و تضحیک کے لیے نیو میں طبلہ سارنگی رکھوا دیے۔ میں نے اس کتاب کی بنیاد اپنی ذات پر رکھی ہے۔ جس سے ایک مدت سے آزردہ خاطر ہوں کہ ”پیشہ سمجھے تھے جسے ہو گئی وہ ذات اپنی۔“ کم و بیش 20 سال پرانی یادوں اور باتوں کی پہلی قسط 1972ء میں مکمل ہوگئی تھی۔”
"یاد پڑتا ہے کہ اس کے دو باب دسمبر 1971ء میں موم بتی کی روشنی میں ان راتوں کو لکھے گئے، جب کراچی پر مسلسل بم باری ہو رہی تھی اور راکٹوں اور اک اک گنز کے گولوں نے آسمان پر آتشیں جال سا بن رکھا تھا۔ ہماری تاریخ کا ایک خونچکاں باب رقم ہو رہا تھا۔ ہجوم کار اور طبیعت کی بے لطفی نے تین سال تک نظرِ ثانی کی اجازت نہ دی۔ ستمبر 1975ء میں جب معدے سے خون آنے لگا اور ڈیڑھ مہینے تک نقل و حرکت بستر کے حدود اربعہ تک محدود ہوکر رہ گئی، تو بارے یک سُو ہو کر زندگی کی نعمتوں کا شمار و شکر ادا کرنے کی سعادت نصیب ہوئی۔ مسوّدے پر نظرِ ثانی کا مرحلہ بھی لیٹے لیٹے طے ہوگیا۔ اپنی تحریر میں کاٹ چھانٹ کرنے اور حشو و زوائد نکالنے کا مسئلہ بڑھا ٹیڑھا ہوتا ہے۔ یہ تو ایسا ہی عمل ہے جیسے کوئی سرجن اپنا اپنڈکس آپ نکالنے کی کوشش کرے۔”
(زرگزشت سے ماخوذ)
