نئی دہلی: بالی ووڈ کے کنگ شاہ رخ خان کے گھر میں رات کے وقت 2 اجنبی افراد سیکیورٹی کو چکمہ دے کر اندر داخل ہوگئے، پولیس نے دونوں افراد کو گرفتار کرلیا۔
بھارتی میڈیا کے مطابق ممبئی کے علاقے باندرہ میں واقع شاہ رخ خان کی رہائش گاہ منت میں 2 اجنبی افراد داخل ہو گئے۔
یہ واقعہ جمعرات کی رات ساڑھے 9 بجے پیش آیا ہے جس کی تحقیقات مقامی پولیس کر رہی ہے۔
سورت سے تعلق رکھنے والے دونوں افراد نے سیکیورٹی گارڈز کو چکمہ دیا اور دیوار پھلانگ کر بنگلے میں داخل ہو گئے۔ بعد ازاں یہ افراد بنگلے کی تیسری منزل تک بھی پہنچ گئے۔
سیکیورٹی اہلکاروں کی نظر پڑنے کے بعد انہیں پکڑ کر ممبئی پولیس کے حوالے کر دیا گیا اور دونوں کے خلاف مقدمہ بھی درج کرلیا گیا۔
ابتدائی تفتیش کے دوران ملزمان نے پولیس کو بتایا کہ وہ گجرات سے آئے تھے اور شاہ رخ سے ملنا چاہتے تھے۔
دوسری جانب احتیاط کے طور پر شاہ رخ خان کے بنگلے کی سیکیورٹی میں اضافہ کردیا گیا ہے۔
