اسرائیل کی جانب سے فلسطین میں بربریت کا سلسلہ جاری ہے، شہداء کی تعداد 7 ہزار سے بھی تجاوز کرچکی ہے، ایسے میں امریکا نے مشرق وسطیٰ میں مزید 900 امریکی فوجی بھیجنے کا اعلان کردیا ہے۔
غیر ملکی ذرائع ابلاغ کے مطابق پینٹاگون نے کہا ہے کہ گزشتہ ہفتے عراق میں کم از کم 12 اور شام میں 4 حملے کئے گئے، اتحادی افواج کے ٹھکانوں پر حملوں میں 20 سے زائد فوجی زخمی ہوئے۔ نئی تعیناتی کا مقصد امریکی فورسز کی حفاظت اور فضائی دفاع کو تقویت دینا ہے۔
رپورٹس میں بتایا گیا ہے کہ امریکا کے فوجیوں کو اسرائیل نہیں بھیجا جائے گا، یہ تعیناتی خطے میں اسرائیل فلسطین جنگ مزید پھیلنے سے روکنے کا پیغام دینے کی کوشش ہے۔
دوسری جانب حزب اللہ نے واضح پیغام دیا ہے کہ دنیا کے تمام لڑاکا بحری بیڑے بھی آجائیں تو حزب اللہ کو حماس کی حمایت سے دستبردار نہیں کرایا جاسکتا۔
لبنانی میڈیا کا کہنا ہے کہ 20 روز کے دوران لبنان اور اسرائیل کے سرحدی علاقے میں 17 اسرائیلی فوجیو ں کو جہنم واصل کیا گیا جبکہ اسرائیلی میڈیا نے تصدیق کی ہے کہ 7 اکتوبر سے جاری آپریشن الاقصیٰ طوفان میں اسرائیل کے 309 فوجی ہلاک ہوچکے ہیں جبکہ 224 افراد تاحال یرغمال ہیں۔
حزب اللہ کے ساتھ ساتھ حماس نے بھی جمعرات کے روز اسرائیل کے شہر تل ابیب سمیت مختلف مقامات کو راکٹوں سے نشانہ بنایا۔ حماس اور حزب اللہ کے حملوں کے سبب سوا لاکھ سے زائد اسرائیلی آبادکاروں کو شمال سے جنوب کی جانب فرار ہونا پڑا ہے۔
