Tag: مشعال ملک

اسلام آباد : حریت رہنما یاسین ملک کی اہلیہ مشعال ملک کا کہنا ہے کہ کشمیریوں کو نومنتخب حکومت اور عمران خان سے بہت توقعات ہیں۔ دعا ہے کہ نومنتخب حکومت کشمیریوں کی توقعات پر پورا اترے۔

تفصیلات کے مطابق اسلام آباد میں شجرکاری مہم کی افتتاحی تقریب سے خطاب کرتے ہوئے مشعال ملک نے کہا کہ چنار کا درخت جنت نظیر وادی کی پہچان ہے، قوم کو شجرکاری مہم میں بڑھ چڑھ کر حصہ لینا چاہیے، سبز ہلالی پرچم کی طرح پاکستان کو سرسبز بنائیں گے۔

مشعال ملک کا کہنا تھا کہ مقبوضہ کشمیر کی طرح پاکستان کو سرسبز دیکھنے کی خواہش ہے، ہندوستان پانی روک کر پاکستان کو بنجر کرنا چاہتا ہے۔

انھوں نے کہا کہ دنیا ماحولیاتی آلودگی کے خاتمے سے متعلق پاکستانی کوششوں کو تسلیم کر رہی ہے، پاکستان کو جنت نظیر کشمیر جیسا سرسبز و شاداب ملک بنائیں گے۔ وادی کشمیر میں ہر گھڑی پاکستان زندہ باد کی صدائیں گونجتی ہیں۔

حریت رہنما یاسین ملک کی اہلیہ کا کہنا تھا بھارت نے مقبوضہ کشمیر کی سرسبز وادی کو لہو میں رنگ دیا ہے۔ مودی سرکار جان لے لاشیں گرا کر امن نہیں لایا جا سکتا، امید ہے کشمیریوں کو جلد آزادی کی صبح دیکھنا نصیب ہوگی۔

انھوں نے کہا کہ پاکستانیوں کا کشمیریوں سے رشتہ لازوال اور اٹوٹ ہے۔ پاکستانی قوم کشمیریوں کی لازوال جدوجہد کو سلام پیش کرتی ہے۔

مشعال ملک نے مطالبہ کیا کہ نئی حکومت مسئلہ کشمیر پر خصوصی توجہ دیتے ہوئے عالمی سطح پر لابنگ تیز کرے اور کشمیر کی موجودہ صورتحال پر اے پی سی بلائے، خواہش ہے کہ نئی حکومت مسئلہ کشمیر پر ٹھوس پالیسیاں مرتب کرے۔

ان کا مزید کہنا تھا کہ کشمیری مسئلہ کشمیر کے اہم فریق ہیں، کشمیریوں کی شمولیت کے بغیر مسئلہ کشمیر کا حل ممکن نہیں، مسئلہ کشمیر سے متعلق ہر فیصلہ کشمیریوں کی مشاورت سے ہونا چاہیئے۔ حق خودارادیت کشمیریوں کا پیدائشی بنیادی حق ہے۔ بھارت کو کشمیریوں کو حق خودارادیت دینا ہوگی۔

اہلیہ یاسین ملک نے کہا بھارت بدترین ظلم و جبر کے باوجود کشمیریوں کو نہیں دبا سکا۔بھارت مقبوضہ کشمیر میں شکست تسلیم کر چکا ہے۔

انکا کہنا تھا کہ مسئلہ کشمیر حل کئے بغیر جنوبی ایشیاء میں قیام امن ممکن نہیں۔ خطے کا پائیدار امن مسئلہ کشمیر کے حل سے مشروط ہے۔ عالمی برادری مسئلہ کشمیر کے پرامن حل سے متعلق اپنا کردار بروقت ادا کرے، مسئلہ کشمیر اقوام متحدہ کی قرار دادوں کے مطابق حل ہونا چاہیئے۔

اسلام آباد : حریت رہنماء یاسین ملک کی اہلیہ مشعال ملک کا کہنا ہے کہ کشمیریوں کے لئے آواز اٹھانے پر بھارت انکی جان کا دشمن بن چکا ہے، دورہ ناروے کے دوران جہاز سمیت متعدد مقامات پر حراساں کرنے کی کوشش کی گئی ۔

تفصیلات کے مطابق دورہ ناروے کے بعد اسلام آباد میں نیوز کانفرنس کے دوران مشعال ملک نے کہا کہ ناروے کی ملکہ اورسابق وزیر اعظم سمیت اراکین پارلیمنٹ اور سول سوسائٹی سے ملاقاتوں میں مسئلہ کشمیر کو بھرپور اجاگر کیا، نارویجن سیاستدانوں اور عوام کو مسئلہ کشمیر سمیت مقبوضہ کشمیر میں بھارتی فورسز کے کشمیریوں پر انسانیت سوز مظالم سے آگاہ کیا۔

مشعال ملک کا کہنا تھا کہ انہیں بتایا کہ پیلٹ گنز کی وجہ سے ہزاروں کشمیری بینائی سے محروم ہو چکے ہیں جبکہ سینکڑوں قتل اور زخمی ہیں، کشمیریوں پر بھارتی مظالم بارے سن کر نارویجن شہری زار و قطار رو پڑے ۔

حریت رہنماء یاسین ملک کی اہلیہ نے کہا کہ ناروے میں منعقدہ امن کانفرنس میں کشمیر کا مقدمہ بھرپور انداز میں پیش کیا جبکہ ایمنسٹی انٹرنیشنل سمیت عالمی تنظیموں سے ملاقاتوں میں بھارت کا مکروہ چہرہ بے نقاب کیا، نارویجن شہریوں کو آگاہ کیا کہ مسئلہ کشمیر پر مذاکرات سے انکاری ہندوستان متعدد کوششوں کے باوجود مذاکرات کی میز پر نہیں آ رہا ۔

ان کا کہنا تھا کہ نارویجن سیاستدانوں اور سول سوسائٹی نے مسئلہ کشمیر میں خصوصی دلچسپی ظاہر کی جبکہ سابق نارویجن وزیراعظم نے مسئلہ کشمیر کے حل کیلئے ثالث کا کردار ادا کرنے کی پیشکش کی ۔

مشعال ملک نے کہا کہ کشمیریوں کے لئے آواز اٹھانے پر ہندوستان انکا جانی دشمن بن چکا ہے، بھارتی ایجنٹوں نے دورہ ناروے کے دوران جہاز سمیت متعدد مقامات پر انہیں حراساں کیا۔

انکا کہنا تھا کہ گزشتہ چند روز میں مقبوضہ کشمیر کی صورتحال مزید گھمبیر ہو گئی ہے، گزشتہ روز چھ نوجوانوں کو شہید کیا گیا یے۔بھارتی فورسز نے یاسین ملک کو شدید تشدد کا نشانہ بنانے کے بعد گرفتار کر کے جیل منتقل کر دیا ہے، مقبوضہ کشمیر کے اسکولوں میں بھارتی فوج نے مورچے بنا رکھے ہیں ،،،جس پر کشمیری بچے اپنے بستے جلا کر احتجاج کر رہے ہیں۔

مشعال ملک نے کہا کہ آصفہ کا بیہمانہ قتل ہندوستان کے منہ پر طمانچہ ہے ۔آصفہ کے قتل پر بے جی پی کی ہٹ دھرمی افسوسناک ہے ۔

پریس کانفرنس میں ان کا کہناتھا کہ مسئلہ کشمیر پاکستان انڈیا کا مسئلہ نہیں، کشمیری مسئلے کے اصولی فریق ہیں، مذاکراتی عمل پر یقین رکھنے والے کشمیریوں کو ہندوستان پر اعتماد نہیں ، کشمیری مسئلہ کشمیر کا پر امن حل چاہتے ہیں، مسئلہ کشمیر پر مذاکراتی عمل میں کسی عالمی ضامن کی موجودگی اور مسئلے کے حل کیلئے مذاکراتی عمل کاباقاعدہ ٹائم فریم چاہتے ہیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

اسلام آباد : حریت رہنما یاسین ملک کی اہلیہ مشعال ملک کا کہنا ہے کہ بھارت دنیا کا سب سے بڑادہشت گرد ہے، مقبوضہ کشمیرمیں بھارت نے ریاستی دہشتگردی کی انتہاکردی ہے۔

تفصیلات کے مطابق حریت رہنما یاسین ملک کی اہلیہ مشعال ملک نے مقبوضہ کشمیرمیں نہتے کشمیریوں کے قتل عام کی مذمت کرتے ہوئے کہا کہ مقبوضہ کشمیرمیں بھارت نےریاستی دہشتگردی کی انتہاکردی ہے،سرچ آپریشن کے نام پرنہتے کشمیریوں کوشہید کیا جارہا ہے۔

مشعال ملک کا کہنا تھا کہ بھارت دنیاکا سب سے بڑادہشت گردہے، بھارتی فوج کے ہاتھوں کشمیریوں کی زندگی غیرمحفوظ ہے۔

انھوں نے حکومت پاکستان سے مسئلہ کشمیر اور بھارتی مظالم کوعالمی اداروں میں اٹھانے کامطالبہ کیا اور کہا کہ اقوام متحدہ بھارت کی وحشیانہ کارروائی کا فوری نوٹس لے۔

دنیا کو آنکھیں اور کان کھول کر کشمیریوں اور فلسطینیوں کا ساتھ دینا ہوگا

گذشتہ روز حریت رہنماء یاسین ملک کی اہلیہ مشعال ملک نے نہتے فلسطینیوں پر اسرائیلی فورسز کی حالیہ جارحیت کی شدید مذمت کرتے ہوئے مطالبہ کیا تھا کہ دنیا کو آنکھیں اور کان کھول کر کشمیریوں اور فلسطینیوں کا ساتھ دینا ہوگا۔

مشعال ملک کا کہنا تھا کہ اسرائیل اور ہندوستان کا رومانس بڑھتا جا رہا ہے، دونوں ممالک کی پالیسیاں ایک جیسی ہیں، فلسطین اور کشمیر کے حوالے سے دنیا اندھی ،بہری اور بے حس ہو چکی ہے، جس پر افسوس ہے ۔

انہوں نے کہا کہ دنیا کی سب سے بڑی ریاستی دہشتگردی مقبوضہ کشمیر میں جاری ہے، دنیا کو دہشتگردی کے خلاف جنگ انڈیا کے خلاف لڑنی چاہئے، کشمیریوں کے جنازوں پر شیلنگ اور فائرنگ کی جا رہی ہیں جبکہ سرچ آپریشنز کے نام پر کشمیریوں کو بے عزت کیا جاتا ہے۔

حریت رہنماء یاسین ملک کی اہلیہ کا کہنا تھا کہ مسلمانوں پر مظالم کے بعد مذمت کرنا عالمی فیشن بن گیا ہے۔ عالمی اداروں نے مسئلہ کشمیر اور فلسطین کو مذاق سمجھ لیا ہے، انسانی حقوق کی عالمی تنظیمیں ڈرامے بازی کر رہی ہیں، کشمیریوں اور فلسطینیوں کی لاشیں نہ دیکھ سکنے والی انسانی حقوق کی گونگی بہری عالمی تنظیموں کو بند کردینا چاہئے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔