Tag: مشہور اردو شاعر

معروف شاعر محسن بھوپالی 17 جنوری 2007ء کو دنیا سے رخصت ہوگئے تھے۔ آج ان کی برسی ہے۔ ان کا اصل نام عبدالرّحمٰن تھا جن کا خاندان تقسیمِ ہند کے بعد بھوپال سے ہجرت کرکے پاکستان کے شہر لاڑکانہ میں سکونت پذیر ہوا۔

29 ستمبر 1932ء میں پیدا ہونے والے محسن بھوپالی نے کراچی کے این ای ڈی انجینئرنگ کالج سے سول انجینئرنگ میں ڈپلوما کورس کے بعد حکومتِ‌ سندھ کے محکمہ تعمیرات میں‌ ملازمت حاصل کی۔ اسی دوران جامعہ کراچی سے اردو میں ایم اے کیا۔

محسن بھوپالی نے 1948ء میں شاعری کا آغاز کیا۔ وہ اپنے ہم عصر شعرا میں اپنی فکر اور شعری اسلوب کے سبب پہچان بناتے چلے گئے۔ انھوں نے اردو ادب کو اپنی تخلیقات کے علاوہ ایک صنفِ سخن نظمانے بھی دی۔ ان کے شعری مجموعوں میں‌ شکستِ شب، جستہ جستہ، نظمانے، ماجرا، گردِ مسافت شامل ہیں‌جب کہ قومی یک جہتی میں ادب کا کردار، حیرتوں کی سرزمین، جاپان کے چار عظیم شاعر بھی ان کی تصانیف ہیں۔

محسن بھوپالی کے اوّلین شعری مجموعے کی تقریبِ رونمائی حیدرآباد سندھ میں منعقد ہوئی جس کی صدارت زیڈ اے بخاری نے انجام دی۔ محسن بھوپالی اردو کے ایک مقبول شاعر تھے جن کے کئی قطعات اور اشعار ضرب المثل کا درجہ رکھتے ہیں۔

ان کا یہ شعر آج بھی تحریر سے تقریر تک خیالاتِ پریشاں کو سمیٹنے اور حالاتِ سیاست پر تبصرہ کرنے کے لیے لکھا اور پڑھا جاتا ہے۔

نیرنگیٔ سیاستِ دوراں تو دیکھیے
منزل انہیں ملی جو شریک سفر نہ تھے

محسن بھوپالی کراچی میں پاپوش نگر کے قبرستان میں آسودۂ خاک ہیں۔

بیسویں صدی کے نصف اوّل میں برصغیر میں شاعری کے میدان چند ایسے تخلیق کار سامنے آئے جنھوں نے غزل میں اپنے تخیّل اور خیالات و تجربات کو نہایت منفرد اور جداگانہ انداز سے ڈھالا اور جہانِ‌ سخن میں ممتاز ہوئے۔ شکیب جلالی انہی شعرا میں‌ شمار ہوتے ہیں۔ انھوں نے 12 نومبر 1966 کو یہ دنیا چھوڑ دی تھی۔

ان کا اصل نام سید حسن رضوی تھا اور شکیب تخلص۔ وہ یکم اکتوبر 1934ء کو اتر پردیش کے شہر علی گڑھ کے ایک قصبے میں پیدا ہوئے۔ شکیب تقسیم کے بعد پاکستان چلے آئے تھے جہاں 32 برس کی عمر میں انھوں‌ نے اپنی زندگی کا خاتمہ کرلیا۔

برصغیر کی تقسیم کے بعد پاک و ہند میں جن غزل گو شعرا نے اپنے منفرد لب و لہجے اور فکرِ تازہ کے ساتھ ہم عصروں سے ہٹ کر اظہار کا سلیقہ اپنایا، ان میں یہ جواں‌ مرگ شاعر بھی شامل ہے۔

اردو کے صاحبِ اسلوب شاعر شکیب جلالی نے بلاشبہ غزل کو ایک نیا لہجہ اور نیا آہنگ دیا۔ ان کا شعری مجموعہ روشنی اے روشنی 1972ء میں شائع ہوا جب کہ 2004ء میں ان کا کلیات بھی منظرِ‌ عام پر آیا۔

شکیب جلالی کی غزلوں‌ نے جہاں‌ انھیں ہم عصروں‌ میں‌ ممتاز کیا، وہیں شعروسخن کا عمدہ ذوق رکھنے والا ہر قاری ان سے متاثر نظر آیا اور ان کے اشعار زباں زدِ‌ عام ہوئے۔ اردو غزل کے حوالے سے شکیب کا نام ہمیشہ یاد رکھا جائے گا اور ان کا کلام ندرتِ خیال اور منفرد اسلوب کے سبب ہمیشہ تازہ رہے گا۔

شکیب جلالی کے یہ اشعار پڑھیے۔

شکیبؔ اپنے تعارف کے لیے یہ بات کافی ہے
ہم اس سے بچ کے چلتے ہیں جو رستہ عام ہو جائے

جہاں تلک بھی یہ صحرا دکھائی دیتا ہے
مری طرح سے اکیلا دکھائی دیتا ہے
نہ اتنی تیز چلے، سَر پھری ہوا سے کہو
شجر پہ ایک ہی پتّہ دکھائی دیتا ہے

موت کے درندے میں اک کشش تو ہے ثروتؔ
لوگ کچھ بھی کہتے ہوں خود کُشی کے بارے میں

9 ستمبر 1996 کو کراچی میں اردو کے معروف شاعر ثروت حسین ٹرین کے ایک حادثے میں زندگی سے محروم ہوگئے۔ یہ بھی کہا جاتا ہے کہ انھوں‌ نے خود کُشی کی تھی۔ ثروت حسین 9 نومبر 1949 کو کراچی میں پیدا ہوئے تھے۔ ان کے والد بدایوں‌ سے ہجرت کرکے کراچی میں‌ آبسے جہاں‌ تعلیم مکمل کرنے کے بعد ثروت حسین نے شعبہ تدریس سے عملی زندگی کا آغاز کیا۔ زندگی کے آخری دنوں‌ میں‌ وہ گورنمنٹ ڈگری بوائز کالج ملیر میں اپنے فرائض‌ انجام دے رہے تھے۔

ثروت حسین کو اردو زبان میں‌ ان کے جداگانہ اسلوب اور غزل جیسی صنفِ سخن کو ایک نئے مزاج، خوب صورت طرز اور لفظیات سے روشناس کرانے والا شاعر مانا جاتا ہے۔ انھوں‌ نے نثری نظم کو بھی اعتبار بخشا۔

ثروت حسین کا پہلا مجموعہ آدھے سیارے پر 1989 میں شائع ہوا تھا جسے ادبی حلقوں میں بڑی پذیرائی ملی تھی۔ دوسرا مجموعہ کلام خاک دان ان کی موت کے بعد 1998 میں شایع ہوا۔

ثروت حسین کی ایک غزل آپ کے ذوقِ مطالعہ کی نذر ہے۔

غزل
لہر لہر آوارگیوں کے ساتھ رہا
بادل تھا اور جَل پریوں کے ساتھ رہا
کون تھا میں، یہ تو مجھ کو معلوم نہیں
پُھولوں، پتّوں اور دِیوں کے ساتھ رہا
مِلنا اور بچھڑ جانا کِسی رستے پر
اک یہی قصّہ آدمیوں کے ساتھ رہا
وہ اک سُورج صبح تلک مرے پہلو میں
اپنی سب ناراضگیوں کے ساتھ رہا
سب نے جانا بہت سبک، بے حد شفّاف
دریا تو آلودگیوں کے ساتھ رہا

فانیؔ بدایونی یوں تو مشرقی تہذیب کے بڑے دلدادہ تھے، لیکن انھیں اردو رسمُ الخط سے سخت چڑ تھی۔

اس کے برعکس وہ رومن رسمُ الخط کے بڑے حامی تھے چنانچہ اپنی غزلیں انگریزی ٹائپ رائٹر پر ٹائپ کرتے تھے۔ اس موضوع پر ان میں اور مولوی صاحب (مولانا ابوالخیر مودودی) میں خوب خوب بحثیں ہوتی تھیں۔ مولوی صاحب سے فانی کی دلیلوں کو جواب نہ بن پڑتا تو غصہ میں آپے سے باہر ہو جاتے اور فانی کو جی بھر کر برا بھلا کہتے مگر فانی ہنستے رہتے تھے۔

فانی کو مولوی صاحب کو چھیڑنے میں بہت مزہ آتا تھا۔ چناں چہ مولوی صاحب سے ملنے جاتے تو تین چار غزلیں رومن رسم الخط میں ٹائپ کر کے ضرور ساتھ لے جاتے تھے۔

مولوی صاحب فانی سے بڑی محبت سے ملتے۔ ادھر ادھر کی باتوں کے بعد تان لامحالہ فانی کی شاعری پر ٹوٹتی۔ مولوی صاحب کہتے کوئی نئی چیز لکھی ہو تو سناؤ۔ فانی مسکرا کر ٹائپ شدہ غزلیں جیب سے نکالتے اور مولوی صاحب کی طرف بڑھا دیتے اور مولی صاحب ان کاغذوں کو یوں اٹھا کر پھینک دیتے گویا اچانک بچھو نے ڈنک مار دیا ہو۔

فانی ہنستے ہوئے تمام کاغذ فرش سے اٹھا لیتے اور غزلیں سنانے لگتے۔ غزلیں سن کر مولوی صاحب کا غصہ فرو ہو جاتا تھا۔

(اقتباس از شہرِ نگاراں مصنف سبطِ حسن)

احمد فراز اپنے عہد کے مقبول ترین شاعروں میں سے ایک ہیں جن کی آج برسی منائی جارہی ہے۔

احمد فراز کا رومانوی کلام اور مزاحمتی شاعری ان کی وجہِ شہرت ہے۔ ان کے مقبولِ عام کلام سے چند اشعار باذوق قارئین کی نذر ہیں۔

سنا ہے لوگ اسے آنکھ بھر کے دیکھتے ہیں
سو اس کے شہر میں کچھ دن ٹھہر کے دیکھتے ہیں

سنا ہے ربط ہے اس کو خراب حالوں سے
سو اپنے آپ کو برباد کر کے دیکھتے ہیں

سنا ہے درد کی گاہک ہے چشمِ ناز اس کی
سو ہم بھی اس کی گلی سے گزر کے دیکھتے ہیں

سنا ہے اس کو بھی ہے شعر و شاعری سے شغف
سو ہم بھی معجزے اپنے ہنر کے دیکھتے ہیں

سنا ہے بولے تو باتوں سے پھول جھڑتے ہیں
یہ بات ہے تو چلو بات کر کے دیکھتے ہیں

سنا ہے رات اسے چاند تکتا رہتا ہے
ستارے بام فلک سے اتر کے دیکھتے ہیں

سنا ہے دن کو اسے تتلیاں ستاتی ہیں
سنا ہے رات کو جگنو ٹھہر کے دیکھتے ہیں

سنا ہے حشر ہیں اس کی غزال سی آنکھیں
سنا ہے اس کو ہرن دشت بھر کے دیکھتے ہیں

سنا ہے اس کی سیہ چشمگی قیامت ہے
سو اس کو سرمہ فروش آہ بھر کے دیکھتے ہیں

سنا ہے اس کے لبوں سے گلاب جلتے ہیں
سو ہم بہار پہ الزام دھر کے دیکھتے ہیں

سنا ہے آئنہ تمثال ہے جبیں اس کی
جو سادہ دل ہیں اسے بن سنور کے دیکھتے ہیں

سنا ہے اس کے بدن کی تراش ایسی ہے
کہ پھول اپنی قبائیں کتر کے دیکھتے ہیں

بس اک نگاہ سے لٹتا ہے قافلہ دل کا
سو رہروانِ تمنا بھی ڈر کے دیکھتے ہیں

سنا ہے اس کے شبستاں سے متصل ہے بہشت
مکیں ادھر کے بھی جلوے ادھر کے دیکھتے ہیں

رکے تو گردشیں اس کا طواف کرتی ہیں
چلے تو اس کو زمانے ٹھہر کے دیکھتے ہیں

کہانیاں ہی سہی سب مبالغے ہی سہی
اگر وہ خواب ہے تعبیر کر کے دیکھتے ہیں

اب اس کے شہر میں ٹھہریں کہ کوچ کر جائیں
فرازؔ آؤ ستارے سفر کے دیکھتے ہیں

اسرار الحق مجاز کی شاعری میں‌ انقلاب کی دھمک، رومان کی ترنگ، کیف و مستی، درد و غم، رنج و الم سبھی کچھ ملتا ہے۔

اردو زبان کے اس مشہور شاعر نے جہاں‌ زندگی کی رعنائیوں‌ کو اپنے کلام میں‌ سمیٹ کر داد وصول کی، وہیں اس رندِ بلا خیر کے جنون اور رومان نے اسے‌ "آوارہ” اور "رات اور ریل” جیسی نظموں کا خالق بھی بنایا جنھوں‌ نے اس دور میں‌ ہر خاص و عام کو متاثر کیا۔ اپنی نظموں‌ سے شہرت پانے والے مجاز اپنی چند عادات کی وجہ سے بھی اپنے حلقہ احباب میں‌ خوب یاد کیے جاتے تھے۔

مشہور ہے کہ اسرار الحق مجاز رات گئے گھر جاتے تھے اور اسی لیے انھیں گھر میں "جگن” کہا جاتا تھا۔

وہ ہاکی کے اچھے کھلاڑی مانے جاتے تھے۔ پڑھائی کی بات کی جائے تو اکثر امتحانی کاپی سادہ چھوڑ دیا کرتے تھے۔ زود رنج اور حساس ایسے کہ ایک فساد کے دوران کسی آدمی کو مرتا دیکھا اور تین دن تک کھانا نہ کھا سکے۔

زمانہ طالبِ علمی میں جہا‌ں کالج کی لڑکیوں میں‌ ان کی شاعری کو بہت پسند کیا جاتا تھا، وہیں ان کے عشق کی سچی جھوٹی کہانیاں، ان کے جنون اور کثرتِ شراب نوشی کا بھی بہت چرچا تھا۔

اردو زبان کے اس مشہور شاعر کی زندگی پر تین فلمیں بھی بن چکی ہیں۔