Tag: مشہور سنگر

18 نومبر 1994ء کو کینیڈا میں مقیم معروف گلوکار ایم کلیم زندگی کی بازی ہار گئے تھے۔ آج متعدد فلمی گیتوں‌ کو اپنی آواز دے کر یادگار بنا دینے والے اس فن کار کی برسی ہے۔ پاکستان کے اس معروف گلوکار کا اصل نام حفیظ اللہ تھا، وہ آل انڈیا ریڈیو سے بطور ٹیکنیشن وابستہ تھے اور قیامِ پاکستان کے بعد ریڈیو پاکستان میں‌ ملازمت اختیار کر لی تھی۔

1924ء میں پیدا ہونے والے ایم کلیم نے کراچی میں‌ ریڈیو پاکستان سے وابستگی کے دوران دوست احباب کی فرمائش پر ان کے سامنے غزل اور گیت تو‌ سنائے، لیکن اسے شوق سے زیادہ اہمیت کبھی نہیں‌ دی تھی۔

کہتے ہیں‌ ایم کلیم کی آواز مشہور گلوکار کے ایل سہگل سے مشابہ تھی، ریڈیو پاکستان میں جب ان کے ساتھیوں نے انھیں‌ سنا تو گلوکاری پر سنجیدگی سے توجہ دینے پر اصرار کیا۔ ریڈیو پر نام ور موسیقاروں اور گائیکوں کا آنا جانا لگا رہتا تھا اور وہ بھی انھیں‌ سنتے تو تعریف کرتے اور اس میدان میں‌ قسمت آزمانے کا مشورہ دیتے۔ اس ہمّت افزائی اور مسلسل اصرار پر ایم کلیم نے 1957ء میں پہلا نغمہ "ناکام رہے میرے گیت” ریکارڈ کروایا۔ یہ نغمہ ریڈیو پاکستان سے نشر ہوا اور اسی پہلے گیت سے ان کی شہرت کا سفر بھی شروع ہو گیا۔

ایم کلیم کی آواز میں سُروں کا رچاؤ بھی تھا اور گلے میں سوز و گداز بھی۔ وہ ایک اچھے موسیقار بھی ثابت ہوئے اور اس فن میں بھی اپنی صلاحیتوں‌ کا مظاہرہ کیا۔ ایم کلیم کی آواز میں‌ ایک اور گیت سامعین میں‌ مقبول ہوا جس کے بول تھے: "گوری گھونگھٹ میں شرمائے۔”

ان کی آواز میں‌ ایک غزل بھی بہت مقبول تھی، جس کا مطلع ہے۔

ان کے آنسو سرِ مژگاں نہیں دیکھے جاتے
سچ تو یہ ہے وہ پشیماں نہیں دیکھے جاتے

پاکستان کے اس معروف گلوکار کو وفات کے بعد کینیڈا ہی میں سپردِ خاک کیا گیا۔‌

استاد نزاکت علی خان کا نام فن و ثقافت کی دنیا میں کسی تعارف اور حوالے کا محتاج نہیں۔ آج پاکستان کے اس نام ور کلاسیکی موسیقار اور گلوکار کی برسی منائی جارہی ہے۔

نزاکت علی خان 14 جولائی 1983 کو راولپنڈی میں وفات پاگئے تھے۔ ان کا تعلق ضلع ہوشیار پور کے چوراسی نامی قصبے سے تھا جو سُروں اور راگنیوں کے ماہر اور موسیقی کے شیدائیوں کے لیے مشہور ہے۔

1932 کو پیدا ہونے والے نزاکت علی خان کا سلسلہ نسب استاد چاند خان، سورج خان سے ملتا ہے جو دور اکبری کے نام ور گلوکار اور تان سین کے ہم عصروں میں شامل تھے۔

استاد نزاکت علی خان کے والد استاد ولایت علی خان بھی اپنے زمانے کے نام ور موسیقار تھے اور انھوں‌ نے والد ہی سے گائیکی سیکھی اور موسیقی کی تعلیم حاصل کی۔

تقسیمِ ہند کے بعد استاد نزاکت علی خان ملتان آگئے اور بعد میں لاہور کو اپنا مستقر ٹھہرا لیا۔

جلد ہی ان کا شمار پاکستان کے نام ور موسیقاروں اور گلوکاروں میں ہونے لگا۔ استاد نزاکت علی خان کو اس فن کی خدمت کے اعتراف میں‌ صدارتی تمغہ برائے حسن کارکردگی اور ستارہ امتیاز دیا گیا۔

بدلتے ہوئے طرزِ زندگی نے رسم و رواج، فنون و ثقافت اور ہمارے ذوقِ طبع، شوق اور تفریح کے رنگ ڈھنگ اور رجحانات کو بھی بدل دیا۔ کلاسیکی موسیقی اور راگ راگنیاں سمجھنا تو دور کی بات، اسے سننے اور محظوظ ہونے والے بھی کہاں رہے۔ اسی طرح ساز ہیں تو سازندے نہیں رہے اور کتنے ہی آلاتِ موسیقی تو معدوم ہوچکے ہیں۔

آپ نے راگ درباری کا نام تو سنا ہو گا۔ یہ ہندوستان بھر میں مشہور اور عوام و خواص میں مقبول راگ ہے۔ سیکڑوں شعرا کا کلام اس راگ سے آراستہ ہوا اور ہزاروں غزلیں اور گیت راگ درباری میں بنے۔ کہتے ہیں یہ راگ گانے میں آسان ہے اور اس کی پہچان بھی، مگر نزاکتیں سمجھنا اور اسے مخصوص رچاؤ سے اساتذہٴ فن ہی نبھا سکتے ہیں۔

تاریخ بتاتی ہے کہ یہ راگ مشہور موسیقار، سُر اور آواز کے ماہر تان سین کی اختراع تھا، جو دربارِ اکبری میں نمایاں مقام رکھتا تھا اور اسے دربار میں گانے کے لیے خاص طور پر اختراع کیا تھا۔ ماہرین کے مطابق اس راگ میں خاص گمبھیرتا ہے جس نے اسے بارعب، با وقار ہی نہیں نہایت متین اور پُر اثر راگ بنا دیا۔ اس راگ کو صرف درباری بھی کہا جاتا ہے۔

اس راگ میں بندشوں کے علاوہ غزلیں اور گیت بھی آپ نے سنے ہوں گے۔

کُو بہ کُو پھیل گئی بات شناسائی کی
اس نے خوش بُو کی طرح میری پزیرائی کی

ہنگامہ ہے کیوں برپا، تھوڑی سی جو پی لی ہے
ڈاکہ تو نہیں ڈالا، چوری تو نہیں کی ہے۔۔۔

اور گیت کا یہ بول دیکھیے

آ میرے پیار کی خوش بُو، منزل پہ تجھے پہنچاؤں