Tag: مشہور غزلیں

اردو شاعری بالخصوص غزل گوئی میں‌ انور مرزا پوری کا نام کلاسیکی اور روایتی موضوعات کے سبب معروف ہوا۔ وہ 1960 کی دہائی کے دوران مشاعروں کے مقبول شاعر رہے ہیں۔ انور مرزا پوری کا تعلق ہندوستان سے تھا۔ ان کی ایک مشہور غزل ملاحظہ کیجیے جسے معروف گلوکاروں‌ نے گایا ہے۔

غزل
میں نظر سے پی رہا ہوں یہ سماں بدل نہ جائے
نہ جھکاؤ تم نگاہیں کہیں رات ڈھل نہ جائے

مرے اشک بھی ہیں اس میں یہ شراب ابل نہ جائے
مرا جام چھونے والے ترا ہاتھ جل نہ جائے

ابھی رات کچھ ہے باقی نہ اٹھا نقاب ساقی
ترا رند گرتے گرتے کہیں پھر سنبھل نہ جائے

مری زندگی کے مالک مرے دل پہ ہاتھ رکھنا
ترے آنے کی خوشی میں مرا دَم نکل نہ جائے

مجھے پھونکنے سے پہلے مرا دل نکال لینا
یہ کسی کی ہے امانت مرے ساتھ جل نہ جائے

ترقّی پسند ادب کے نمایاں اور اہم شعرا میں‌ جاں نثار اختر کا نام بھی شامل ہے جنھیں ہندوستان کی فلم نگری میں ان کے خوب صورت اور سدا بہار نغمات نے شہرت اور مقبولیت کی بلندیوں‌ پر پہنچایا۔

اردو کے اس ممتاز شاعر کا تعلق خیر آباد (یوپی) سے تھا۔ جاں نثار اختر نے شاعری کا ذوق وراثت میں پایا تھا۔ ان کی ادبی زندگی کا آغاز اور تربیت و فکری نشوونما علی گڑھ میں ہوئی۔ فلم نگری میں اپنی شاعری کی بدولت شہرت اور مقبولیت حاصل کرنے والے جاں نثار اختر نے ادب کے علاوہ متعدد فلمی ایوارڈ بھی اپنے نام کیے۔

یہاں ہم ان کی مشہور غزل باذوق قارئین کے لیے پیش کررہے ہیں۔ ملاحظہ کیجیے۔

آہٹ سی کوئی آئے تو لگتا ہے کہ تم ہو
سایہ کوئی لہرائے تو لگتا ہے کہ تم ہو

جب شاخ کوئی ہاتھ لگاتے ہی چمن میں
شرمائے لچک جائے تو لگتا ہے کہ تم ہو

صندل سے مہکتی ہوئی پُرکیف ہوا کا
جھونکا کوئی ٹکرائے تو لگتا ہے کہ تم ہو

اوڑھے ہوئے تاروں کی چمکتی ہوئی چادر
ندی کوئی بَل کھائے تو لگتا ہے کہ تم ہو

جب رات گئے کوئی کرن میرے برابر
چپ چاپ سی سو جائے تو لگتا ہے کہ تم ہو

عزم الحسنین عزمی کا تعلق پنجاب کے شہر گجرات کے ایک گاؤں ڈوڈے سے ہے۔ وہ درس و تدریس سے وابستہ ہیں۔ اردو ادب سے لگاؤ رکھنے والے اس نوجوان نے شاعری کا آغاز کیا تو غزل کو اپنے خیالات اور جذبات کے اظہار کا وسیلہ بنایا۔ ان کا کلام مختلف ادبی جرائد میں شایع ہوتا رہتا ہے۔ یہاں‌ ہم عزم الحسنین عزمی کی ایک غزل اپنے باذوق کی نذر کررہے ہیں۔ ملاحظہ کیجیے۔

غزل
دستبردار نہیں ہوں میں رہا ہونے سے
قید گھٹتی نہیں زندان بڑا ہونے سے

اتنی مہلت نہ ملی خود کو سمیٹوں سارا
رہ گیا اس میں، میں عجلت میں جدا ہونے سے

ہیں بیک وقت کئی عشق سو معلوم نہیں
دل پریشاں ہے بھلا کس کے خفا ہونے سے

اتنا کافی ہے مری رہ گئی ہے بات یہاں
سر تو جاتا ہے نا مٹی میں انا ہونے سے

دل بھی مل جائیں تو ہمسائیگی رشتہ ہے میاں
ورنہ کیا فرق پڑے گھر کے ملا ہونے سے

مجھ سے پہلے تھے ابھی کتنے مناظر اوجھل
کتنے الفاظ تھے محروم صدا ہونے سے

محسن بھوپالی کا شمار اردو کے مقبول شعرا میں ہوتا ہے۔ ان کے متعدد اشعار کو ضربُ المثل کا درجہ حاصل ہے۔ یہاں ہم محسن بھوپالی کی ایک غزل آپ کے ذوقِ مطالعہ کی نذر کررہے ہیں، جسے پاکستان کی معروف گلوکارہ گلبہار بانو نے گایا اور یہ غزل بہت مشہور ہوئی۔

چاہت میں کیا دنیا داری، عشق میں کیسی مجبوری
لوگوں کا کیا سمجھانے دو ان کی اپنی مجبوری

میں نے دل کی بات رکھی اور تُو نے دنیا والوں کی
میری عرض بھی مجبوری تھی ان کا حکم بھی مجبوری

روک سکو تو پہلی بارش کی بوندوں کو تم روکو
کچّی مٹی تو مہکے گی ہے، مٹّی کی مجبوری

ذات کدے میں پہروں باتیں اور ملیں تو مہر بلب
جبرِ وقت نے بخشی ہم کو اب کے کیسی مجبوری

جب تک ہنستا گاتا موسم اپنا ہے سب اپنے ہیں
وقت پڑے تو یاد آ جاتی ہے مصنوعی مجبوری

مدت گزری اک وعدے پر آج بھی قائم ہیں محسنؔ
ہم نے ساری عمر نباہی اپنی پہلی مجبوری

پروفیسر ڈاکٹر شریف کنجاہی دنیائے ادب کا ممتاز اور نہایت معتبر نام ہے جنھیں اردو اور پنجابی زبان میں ان کی تخلیقات کی وجہ سے ہمیشہ یاد رکھا جائے گا۔ وہ ادیب، شاعر، ماہرِ لسانیات، محقق، مترجم اور معلم کی حیثیت سے پہچانے جاتے ہیں۔

ان کی ایک غزل آپ کے ذوق کی نذر ہے۔

غزل
تلاش جن کی ہے وہ دن ضرور آئیں گے
یہ اور بات سہی ہم نہ دیکھ پائیں گے

یقیں تو ہے کہ کُھلے گا، نہ کُھل سکا بھی اگر
درِ بہار پہ دستک دیے ہی جائیں گے

غنودہ راہوں کو تَک تَک کے سوگوار نہ ہو
ترے قدم ہی مسافر اِنہیں جگائیں گے

لبوں کی موت سے بدتر ہے فکر و جذب کی موت
کدھر ہیں وہ جو اِنہیں موت سے بچائیں گے

طویل رات بھی آخر کو ختم ہوتی ہے
شریفؔ ہم نہ اندھیروں سے مات کھائیں گے