Tag: مشہور لائبریری

براعظم افریقا اور اس کے صحرا دنیا بھر میں مشہور ہیں۔ اس براعظم کے مختلف قدیم اور تاریخی شہر صدیوں‌ سے تجارت اور خرید و فروخت کا مرکز رہے ہیں اور یہاں کی منڈیوں میں قریب اور دور دراز کے مقامات سے لوگوں کی آمد و رفت کا سلسلہ جاری رہا ہے۔

اسی براعظم کے ایک صحرا کے درمیان "شنقیط” بھی صدیوں سے آباد ہے اور موریطانیہ کے اس شہر میں ہزاروں سال سے تاجروں کا آنا جانا لگا ہوا ہے۔

آج کے دور میں تو یہ شہر اور ایسی کئی بستیاں جدید سہولیات اور سڑکوں یا عمارتوں سے بھر چکی ہیں، مگر شنقیط وہ شہر ہے جو ہزاروں برس پہلے بھی علم و فنون اور ثقافتی سرگرمیوں کا مرکز تھا۔ اس کا ثبوت یہاں موجود قدیم لائبریریاں ہیں جو آج موریطانیہ کا خوب صورت ثقافتی ورثہ مانی جاتی ہیں۔

ان کتب خانوں میں ہزار برس پرانے تحریری نسخے اور دیگر قدیم دستاویزات آج بھی محفوظ ہیں۔ تاہم ان قدیم نسخوں، مقدس اوراق اور مختلف کتب کو چند برسوں کے دوران صحرا کی ریت نے برباد کرنا شروع کر دیا ہے۔

تاریخ کے اوراق کھنگالیں تو معلوم ہوگا کہ یہ علاقہ ایک اہم گزر گاہ رہا ہے اور شنقیط سے ماضی بعید میں حج کے لیے قافلے روانہ ہوتے تھے۔ حج کے دوران لوگ جو مذہبی کتب، مقدس نسخے اور اشیا اپنے ساتھ لاتے ان میں سے کچھ یہاں موجود کتب خانوں میں رکھ دیتے تاکہ طالب علم اور مقامی لوگ استفادہ کرسکیں۔

چند برس قبل تک شنقیط کی ایسی چند لائبریریوں میں قرونِ وسطیٰ سے لے کر موجودہ دور کی تقریباً سات سو کتابیں اور مخطوطات موجود تھے۔

ماہرین کے مطابق اس شہر کی لائبریریوں میں نویں صدی عیسوی تک کی تحاریر بھی محفوظ ہیں۔

شنقیط کی ان لائبریریوں کی عمارتیں پتھر سے تعمیر کی گئی ہیں اور یہ اس دور کے کاری گروں کی مہارت کا نمونہ ہیں۔ تاہم ان کی مکمل دیکھ بھال اور مرمت کے ساتھ ان کو صحرا کی ریت سے بچانے کی ضرورت ہے جو ان نوادر اور قدیم نسخوں کو آہستہ آہستہ نگل رہی رہی ہے۔

آئیے سوئٹزرلینڈ کی ایک قدیم اور پُرشکوہ عمارت کی سیر کو چلتے ہیں۔

اس عمارت میں‌ ایک کتب خانہ ہے جو ایبے لائبریری کے نام سے مشہور ہے۔ عمارت کا منفرد طرزِ تعمیر، خوب صورتی اور سجاوٹ دیکھ کر آپ دم بخود رہ جائیں گے۔ یہی نہیں بلکہ اندر جاکر آپ خوف زدہ بھی ہوسکتے ہیں۔ اگر داخل ہونے سے پہلے آپ یہ جان لیں‌ کہ اس عظیم الشان عمارت میں چند حنوط شدہ جسم بھی رکھے ہوئے ہیں تو فیصلہ کرسکتے ہیں‌ کہ اندر داخل ہونا ہے یا نہیں، مگر ہمیں یقین ہے کہ تجسس خوف پر غالب آجائے گا اور آپ سوئٹزر لینڈ کے علاقے سینٹ گالیں‌ کی اس لائبریری کے اندر  ضرور جائیں گے۔

یہ کتب خانہ قدیم رسائل، نوادر اور حیرت انگیز موضوعات پر کتابوں سے بھرا ہوا ہے۔ یہاں کئی مخطوطات اور قدیم نقشے بھی محفوظ ہیں۔ صدیوں پہلے یہاں ایک معبد قائم کیا گیا تھا اور بعد کے ادوار میں یہاں کتب خانہ بنا دیا گیا۔ آج اس دو منزلہ کتب خانے کی شہرت دنیا بھر میں ہے۔

یہ کتب خانہ ایک بڑے ہال پر مشتمل ہے جس میں ہر طرف لکڑی کی الماریوں میں کتابیں محفوظ ہیں۔ یہاں کے در و دیوار سے اس عمارت کی شان و شوکت اور اس کا حسن جھلکتا ہے۔ یہاں لکڑی کا کام نہایت نفیس اور باریکی سے کیا گیا ہے۔ الماریوں کے علاوہ زینے اور چھت کو جس مہارت سے منقش اور مزین کیا گیا ہے اس کی نظیر کم ہی ملتی ہے۔

یہ عمارت فنِ تعمیر کا ایک شاہ کار بھی مانی جاتی ہے جس میں ہوا اور روشنی کی آمدورفت کا خاص اہتمام کیا گیا ہے جب کہ اس کے ہال کی بناوٹ بھی ایک خاص پیمائش اور ڈھب سے کی گئی ہے۔ 1983 میں اسے عالمی ورثہ قرار دیا گیا تھا۔

اب چلتے ہیں لائبریری میں موجود حنوط شدہ لاشوں کی طرف۔ کہتے ہیں کہ یہ لگ بھگ تیرہ سو برس پہلے حنوط کیے گئے جسم ہیں جو مرکزی ہال میں کتابوں کی الماریوں کے درمیان رکھے ہوئے ہیں۔