Tag: مشہور کامیڈین

جیک لیمن 8 سال کا تھا جب اس کے دل میں فلم میں کام کرنے کی امنگ پیدا ہوئی اور شہرت حاصل کرنے کی خواہش نے جنم لیا۔ وہ ہیرو بننے کا خواب دیکھنے لگا تھا۔

اس کا تعلق امریکا سے تھا، جہاں اس نے 8 فروری 1925ء کو آنکھ کھولی۔ اسکول گیا تو وہاں‌ نصابی اور ہم نصابی سرگرمیوں کے ساتھ ٹیبلو اور اسٹیج ڈراموں میں حصّہ لینا شروع کر دیا۔ اس طرح اسے اپنی صلاحیتوں کے اظہار کا موقع ملا اور اس کا اعتماد بھی بڑھا۔ جب اس نے ہاورڈ کالج میں‌ قدم رکھا، تو وہاں ڈرامیٹک کلب کا وائس پریذیڈنٹ بنا دیا گیا۔ بعد کے برسوں میں اسے ہالی وڈ فلم انڈسٹری میں قدم رکھنے کا موقع ملا اور اس کے بچپن کا خواب پورا ہوا۔ آج اسے ہلکی پھلکی مزاحیہ فلموں کے شان دار ہیرو کے طور پر پہچانا جاتا ہے۔

جیک لیمن کی فلمیں کلاسیک میں شمار کی جاتی ہیں۔ اس مشہور اور باکمال اداکار کی فلمیں سوشل کامیڈی پر مبنی ہوتی تھیں۔ اس نے برطانیہ اور امریکا میں شائقین کو نہ صرف اپنی پرفارمنس سے محظوظ اور متاثر کیا بلکہ ہالی وڈ کو بھی متعدد باکمال فن کار دیے۔ اسے مزاحیہ فن کاروں کی فہرست میں‌ نمایاں مقام حاصل ہے جن کی پرفارمنس سے بعد میں‌ آنے والوں کو بہت کچھ سیکھنے کا موقع ملا۔

لائف ٹائم اچیومنٹ ایوارڈ سمیت جیک لیمن نے ہالی وڈ کے کئی اعزازات اپنے نام کیے۔ 1959ء میں Some Like It Hot منظرِ عام پر آئی اور باکس آفس پر دُھوم مچا دی، یہ جیک لیمن کے کیریئر کی کام یاب ترین کامیڈی فلم تھی۔

جیک کی ایک اور ایوارڈ یافتہ فلم ’’دی اپارٹمنٹ‘‘ 1960ء میں ریلیز ہوئی جو امریکی کامیڈی فلم تھی۔ اس فلم میں جیک سولو ہیرو کی حیثیت سے پردے پر نظر آیا اور اس میں ہیروئن کا کردار فلم اسٹار شرلے میکلین نے نبھایا تھا جو نہایت خوب صورت اور باصلاحیت فن کار تھی۔

جیک کی اس فلم نے دس اکیڈمی ایوارڈز کے لیے نام زدگی حاصل کی اور اس میں سے پانچ ایوارڈ لے اڑی۔ اس کے علاوہ جیک لیمن کی چند مشہور فلموں میں مسٹر رابرٹ، دی اپارٹمنٹ، اوڈ کپل شامل ہیں۔ اس فن کار کی ڈائیلاگ ڈلیوری بہت زبردست تھی اور اس حوالے سے جیک کو بہت سراہا جاتا تھا۔

کامیڈی فلموں اس ہیرو کی آخری فلم 1991ء میں ریلیز ہوئی تھی۔ وہ 29 جون 2001ء کو دنیا سے رخصت ہوگیا۔

جیری لیوس کو ہالی وڈ کا صفِ اوّل کا مزاحیہ اداکار کہا جاتا ہے۔ وہ ایک ایسا فن کار تھا جو موقع شناس تھا اور اس کی ایک خوبی بَروقت فیصلہ کرنا تھا۔ جیری نے جہاں اداکاری کے شعبے میں‌ اپنی صلاحیتوں کی بنا پر نام کمایا، وہیں اپنی شخصی خوبی کی بنیاد پر مالی فوائد بھی حاصل کیے۔

جیری لیوس نیو جرسی میں 1926ء کو پیدا ہوا۔ اوائلِ زمانہ میں اس نے ڈین مارٹن کے ساتھ اپنے فن کا مظاہرہ شروع کیا۔ ڈین مارٹن ایک سنگر اور کامیڈین تھا اور یہ دونوں نائٹ کلبس کے علاوہ ریڈیو اور ٹیلی ویژن پر اپنے فن کا مظاہرہ کرنے لگے۔ ان کی جوڑی شائقین میں مقبول ہوتی چلی گئی اور ایک وقت آیا جب وہ فلم نگری تک پہنچ گئے۔ اس جوڑی کی پہلی فلم ’’مائی فرینڈ ارما‘‘ ریلیز ہوئی تو خود ان کے وہم و گمان میں‌ نہ تھا کہ وہ راتوں رات اسٹار بن جائیں گے۔ اس فلم نے زبردست بزنس کیا۔

اس فلم کے بعد جیری لیوس اور ڈین مارٹن کے لیے ہالی وڈ سے آفرز کا گویا ڈھیر لگ گیا اور ان کی مزید فلمیں باکس آفس پر کام یابی سے ہمکنار ہوئیں۔ لیوس اور مارٹن خوب رُو اور باصلاحیت فن کار تھے۔ یہ جوڑی آٹھ سال تک برقرار رہی اور پھر جیری لیوس نے اپنا راستہ جدا کرلیا اور کامیڈی فلمیں پروڈیوس کرنے لگا۔

وہ نہایت باصلاحیت تھا اور اس نے جان لیا تھاکہ وہ خود ہی نہ صرف شائقین کو متوجہ رکھ سکتا ہے بلکہ فلمی دنیا سے مالی فائدہ بھی اٹھا سکتا ہے۔ 1956 میں‌ مارٹن سے الگ ہونے کا فیصلہ کرنے کے بعد جیری اپنی فلمیں لکھنے کے علاوہ ہدایت کار بھی بن گیا اور باکس آفس سے فلم کی آمدنی کا ساٹھ لینا شروع کردیا۔ فلم ساز اس کی مقبولیت کے سبب اس کے ناز نخرے برداشت کرتے تھے۔ جیری لیوس کا نام ہی گویا کام یابی کی ضمانت تھا۔

جیری نے اپنی فلموں‌ میں‌ کامیڈی رول نبھانے کا سلسلہ جاری رکھا اور ناٹی پروفیسر، بیل بوائے جیسی کام یاب فلمیں ہالی وڈ کو دیں۔ فلم اور ٹیلی ویژن کی دنیا میں متعدد اعزازات اپنے نام کرنے والے جیری لیوس نے زندگی کی 91 بہاریں‌ دیکھیں۔

فلموں کا یہ مشہور کامیڈین، کام یاب فلم ڈائریکٹر، پروڈیوسر، اسکرین رائٹر اور گلوکار 2017 میں ہمیشہ کے لیے یہ دنیا چھوڑ گیا۔