صوبہ خیبر پختونخوا کا بجٹ اگر منظور نہ ہوتا تو اس صورت میں کیا ہوتا یہ انکشاف مشیر اطلاعات بیرسٹر سیف نے کیا ہے۔
خیبر پختونخوا میں بانی پی ٹی آئی کی رضامندی کے بغیر اگلے مالی سال کے بجٹ کی منظوری اس وقت موضوع بحث اور اس کو کچھ لوگ بانی پی ٹی آئی کو مائنس کرنے سے تعبیر کر رہے ہیں۔ تاہم کے پی کے مشیر اطلاعات بیرسٹر سیف نے وہ اہم وجہ بتا دی جس کی وجہ سے کے پی کا بجٹ منظور کیا گیا۔
مشیر اطلاعات بیرسٹر سیف نے ایبٹ آباد میں میڈیا سے گفتگو کرتے ہوئے کہا کہ بجٹ کے حوالے سے بے بنیاد باتیں پھیلائی جا رہی ہیں۔ عمران خان نے بجٹ پر مشاورت کرنے کا کہا تھا۔ اگر بجٹ پاس نہ ہوتا تو صوبے کو نقصان ہوتا اور خیبر پختونخوا میں معاشی ایمرجنسی لگ سکتی تھی۔
بیرسٹر سیف نے کہا کہ عوامی مفاد اور قانونی تقاضے پورے کرتے ہوئے بجٹ پاس کیا۔ بانی پی ٹی آئی اگر بجٹ میں تبدیلی لانا چاہیں تو کسی وقت بھی تبدیلی کر سکتے ہیں۔ یہ ان کا اختیار ہے۔ عمران خان کو پارٹی سے مائنس کرنے کا واویلا بے بنیاد ہے اور اس حوالے سے پی ٹی آئی کارکنوں کو بھی اپنی غلط فہمی ختم کرنی چاہیے۔
انہوں نے یہ بھی کہا کہ عمران خان کی رہائی کیلئےاحتجاجی تحریک کبھی روکی ہی نہیں۔ بڑی تحریک کی تیاریاں جاری تھیں کہ پہلے پاک بھارت جنگ اور پھر ایران اسرائیل کا مسئلہ ہوگیا۔
مشیر اطلاعات کے پی نے پی ٹی آئی میں بغاوت کی خبروں کی سختی سے تردید کرتے ہوئے کہا کہ صرف پارٹی عہدیدار کی جانب سے بیان ہی پارٹی کا بیان ہو سکتا ہے۔ میرے لیے جیل کا دروازہ اس لیے کھلتا ہے کہ مجھ پر اعتماد ہے۔
بیرسٹر سیف نے کہا کہ پنجاب میں صرف وزیراعلیٰ کے کچن پر ڈیڑھ کروڑ روپے خرچہ ہوا جب کہ پی ٹی آئی نے کرپشن کا انسداد کیا اور احتساب کمیشن اور کمیٹی بنائی۔ اس کے پہلے کیس میں ہی ایک وزیر کو مستعفی ہونا پڑا۔
انہوں نے بتایا کہ بانی پی ٹی آئی عمران خان کی ہدایت پر کے پی کے بجٹ میں تعلیم، صحت اور موسمیاتی تبدیلی کے لیے بجٹ زیادہ رکھا۔ شادی ہال کاروبار ہے۔ پراپرٹی اور دیگر فیسوں میں کمی کی ہے۔
واضح رہے کہ صوبہ خیبر پختونخوا میں پاکستان تحریک انصاف کی حکومت ہے لیکن صوبے کا اگلے مالی سال کے لیے بجٹ کو بانی پی ٹی آئی عمران خان کی رضامندی کے بغیر ہی منظور کر لیا گیا۔
کے پی اسمبلی کے اس اقدام پر عمران خان کی ہمیشرہ علیمہ خان نے میڈیا سے گفتگو کرتے ہوئے کہا تھا کہ ایسا لگتا ہے کہ مائنس بانی پی ٹی آئی ہو گیا ہے۔
