Tag: مشیر تجارت رزاق داؤد

اسلام آباد: وزیر اعظم کے مشیر برائے تجارت عبد الرزاق داؤد نے کہا ہے کہ آیندہ سیزن میں کھاد کی طلب و رسد میں کوئی فرق نہیں، حکومت ایک لاکھ ٹن کھاد درآمد کرے گی۔

تفصیلات کے مطابق مشیر تجارت نے کہا ہے کہ دسمبر تک ملک میں کھاد کی طلب و رسد کا تجزیہ کیا گیا ہے، آیندہ سیزن تک اس میں کوئی فرق نہیں ہے۔

رزاق داؤد کا کہنا تھا کہ حکومت ایک لاکھ ٹن کھاد درآمد کرے گی، حکومتی اقدامات سے درآمدات میں 6 ارب ڈالر کمی ہوئی، درآمدات میں کمی سے تجارتی خسارہ 5.9 ارب ڈالر کم رہا، جب کہ اس وقت ملک کا تجارتی خسارہ 31 ارب ڈالر ہے۔

مشیر تجارت نے کہا کہ کھاد کی قیمت بڑھانے کا فیصلہ جمعرات کو کریں گے، ملک میں کھاد کی قلت کا کوئی خدشہ نہیں، ہم نے قطر کو چاول کی برآمدات شروع کر دی ہے، ایران نے 5 لاکھ ٹن چاول کا آرڈر کیا جو آیندہ ماہ سے شروع ہوگا۔

مشیر تجارت نے کہا کہ برآمدات گزشتہ سال کے برابر ہیں، گزشتہ سال برآمدات 23 ارب ڈالر تھیں، اس سال بھی اتنی ہیں۔

یہ بھی پڑھیں:  چین کے ساتھ آزادانہ تجارتی معاہدے کے معاملات

انھوں نے بتایا کہ تیار ملبوسات کی برآمدات میں 33 فی صد اضافہ ہوا، باسمتی چاول کی برآمدات میں 30 فی صد اضافہ ہوا، جب کہ سیمنٹ 46، فارماسوٹیکل 26 اور فٹ ویئر ایکسپورٹ 27 فی صد بڑھی ہیں۔

خیال رہے کہ چین ایک ارب ڈالر مالیت کی پاکستانی مصنوعات درآمد کرنے کا عزم ظاہر کر چکا ہے، چینی اور چاول کے برآمدی اہداف مکمل کیے جا چکے ہیں، سوتی دھاگا بھی برآمد کیا جا رہا ہے۔

چین کے ساتھ آزادانہ تجارتی معاہدے پر معاملات جاری ہیں، جس کے بعد چین اپنے صنعتی یونٹ پاکستان منتقل کرے گا، چینی کمپنی پاکستان میں ٹیکسٹائل کی مصنوعات تیار کرے گی، ایک چینی کمپنی کی طرف سے ٹرک کے ٹائر کا پلانٹ لگانے کی بھی امید ہے۔

اسلام آباد: وزیر اعظم عمران خان کے مشیر برائے تجارت رزاق داؤد نے کہا ہے کہ پاکستان اسٹیل مل میں غیر ملکی کمپنیاں دل چسپی لے رہی ہیں۔

تفصیلات کے مطابق مشیر تجارت رزاق داؤد کا کہنا ہے کہ روسی، چینی، فلپائن اور کوریا کی کمپنیاں اسٹیل مل میں دل چسپی لے رہی ہیں۔

رزاق داؤد نے کہا کہ اسٹیل مل کی مشینری پرانی ہے جسے چلانے کے لیے پیسا خرچ کرنا ہوگا، اسٹیل مل کو لیز پر دینے کی تجویز بھی ہے۔

مشیر تجارت کا کہنا تھا کہ نج کاری کمیشن ٹرانزیکشن ایڈوائزر کا تقرر کرنے والا ہے، چینی کمپنی نے اسٹیل مل کی صورت حال کا جائزہ مکمل کر لیا ہے، ٹرانزیکشن ایڈوائزر کے تقرر کے بعد صورت حال واضح ہوگی۔

یہ بھی پڑھیں:  اسٹیل مل سندھ کا اثاثہ ہے، اسے سندھ حکومت کو سونپا جائے: آصف علی زرداری

خیال رہے کہ آج قائمہ کمیٹی برائے صنعت و پیداوار کے اجلاس میں پی پی کے شریک چیئرمین آصف علی زرداری نے کہا کہ اسٹیل مل سندھ کا اثاثہ ہے، اسے حکومت سندھ کے حوالے کیا جائے۔

آصف زرداری نے کہا کہ اسٹیل مل کی زمین کی ویلیو بڑھ چکی ہے، یہ پرائیویٹ پارٹنر شپ پر چل سکتی ہے، چینی کمپنیوں کے پاس سرمایہ ہے، وہ یہ کام کر سکتی ہیں، لیکن صوبائی حکومت اس کی مالک ہے، وہ ہی اس کے بارے میں کوئی فیصلہ کرے۔

سابق صدر نے کہا کہ اسٹیل مل چل رہی ہوتی، تو کئی گنا منافع میں چلی جاتی، مقامی کمپنیوں کے پاس اتنی سرمایہ کاری کی صلاحیت نہیں کہ اسے دوبارہ چلا سکے۔

اسلام آباد: مشیر تجارت عبد الرزاق داؤد نے کہا ہے کہ گزشتہ سال کی نسبت برآمدات میں 29 فی صد اضافہ ہوا جب کہ درآمدات گزشتہ سال کی نسبت 4 ارب ڈالر کم ہوئی ہیں۔

تفصیلات کے مطابق ملک میں تجارتی سرگرمیوں کے حوالے سے پریس کانفرنس کرتے ہوئے مشیر تجارت رزاق داؤد نے بتایا کہ اگلے سال درآمدات و برآمدات کے اعداد و شمار مزید بہتر ہوں گے۔

مشیر تجارت کا کہنا تھا کہ برآمدات نہیں بڑھیں گی جب تک مارکیٹ رسائی نہیں ہوگی، انڈونیشیا کے ساتھ ہماری تجارت پر بات چیت ہوئی ہے، انڈونیشیا حکومت نے مزید 20 اشیا پر ڈیوٹی فری رسائی دے دی ہے۔

انھوں نے کہا کہ مقدار کے لحاظ سے ہماری برآمدات 29 فی صد بڑھ گئی ہیں، گرے کلاس میں اضافہ ہوا، چین بھی پاکستان کی 313 مصنوعات کو ڈیوٹی فری کر رہا ہے، درآمدات میں بھی ہماری پوزیشن اچھی ہے۔

رزاق داؤد نے کہا کہ ملکی برآمدات میں اضافے کے لیے خصوصی اقدامات کر رہے ہیں، یقین ہے آئندہ سال برآمدات کی صورت حال بہت بہتر ہوگی، ٹیکسٹائل ہماری بہترین صنعت ہے اور اس میں بہتری آئی ہے، برآمدات بڑھانے کے لے ویلیو ایڈڈ سروسز کا جائزہ لینا پڑے گا، ہماری برآمدات پر ڈالر کی اونچ نیچ کا فرق نہیں پڑا تاہم ڈالر کے ریٹ کا جائزہ لینا ہوگا۔

مشیر تجارت کا کہنا تھا کہ امریکا چین تنازعے سے 7 فی صد برآمداتی اشیا کی قیمتیں کم ہوئی ہیں، معاشی لحاظ سے دنیا بھر میں 3 فی صد ٹریڈنگ کم ہوئی، دوسری طرف ہماری کاٹن کی برآمد میں 27 فی صد اضافہ ہوا ہے، یارن کی برآمدات میں 15 فی صد کمی ہوئی۔

معاون خصوصی برائے اطلاعات فردوس عاشق اعوان نے نیوز کانفرنس میں کہا کہ ملکی صنعت کو اپنے پاؤں پر کھڑا کرنا حکومت کی اوّلین ترجیح ہے۔