اسلام آباد : وزیرمملکت پیٹرولیم مصدق ملک نے واضح کیا ہے کہ روسی تیل آنے سے ملک میں تیل کی قیمتیں کم نہیں ہوں گی۔
تفصیلات کے مطابق وزیرمملکت پیٹرولیم مصدق ملک نے روسی تیل پاکستان آنے سے پیٹرول سستا ہونے کی خبروں پر ردعمل دیتے ہوئے کہا کہ روسی تیل آنے سے ملک میں تیل کی قیمتیں کم نہیں ہوں گی۔
مصدق ملک کا کہنا تھا کہ روسی تیل کے زیادہ کارگوزآئیں گے توقیمت کم ہوگی، روسی تیل دو ہفتوں میں پاکستان پہنچے گا ، دنیا میں جہاں بھی سستا تیل ملے گا ہم خریدیں گے۔
وزیر مملکت نے کہا کہ کوشش ہے پابندیوں سے بچیں اور توانائی ضرورتیں پوری کریں، سمندر میں تیل وگیس کی تلاش پردوبارہ کام شروع کررہے ہیں۔
انھوں نے مزید بتایا کہ حکومت گیس کے بند کنوؤں کو دوبارہ کھولنے پر غور کررہی ہے، کوشش ہے بند کنوؤں کی بحالی کے لئے کچھ رعایت دیں۔
خیال رہے پاکستان میں پیٹرول کی قیمت جو 282 روپے فی لیٹر کی ریکارڈ بلند ترین سطح پر پہنچ چکی تھی، اس وقت 272 روپے فی لیٹر ہے۔
