بھارت سے تعلق رکھنے والے خاندان کو طوفانی بارش کے دوران مصری شہری حازم السوید نے ڈوبنے سے بچا لیا۔ جس کی ویڈیو بھی سوشل میڈیا پر گردش کررہی ہے۔
العربیہ کے مطابق حازم السوید جو بینک آف مصر کی برانچ میں فرائض انجام دیتے ہیں کا کہنا تھا کہ گھر جانے کے لیے نکلا تو البدع اسٹریٹ پرموجود ایک انڈرپاس میں پھنسے انڈین خاندان کو دیکھا جو مدد کیلئے چلا رہا تھا، ان کی گاڑی پانی میں تقریباً ڈوب چکی تھی۔
مصری شہری کے مطابق بھارت سے تعلق رکھنے والے خاندان کی زندگی بچانے کے لئے تیراکی کرتا ہوا ان تک پہنچا اور ان کی جان بچائی۔
ویڈیو میں دیکھا جاسکتا ہے کہ بھارتی فیملی گاڑی سے نکلنے کی کوششوں میں مصروف ہے مگر پانی اندر داخل ہونے کے سبب گاڑی کے دروازے لاک ہوگئے تھے۔
مدد کرنے والے مصری شہری نے کہا کہ بھارت سے تعلق رکھنے والا خاندان جو میاں بیوی اور ایک بچے پر مشتمل تھا انہیں ایک ایک کرکے گاڑی سے باہر نکالا۔
واضح رہے کہ مصر سے تعلق رکھنے والے فرشتہ صفت انسان 2002 سے امارات میں مقیم ہیں۔ انہیں امارات کا حصہ ہونے پر فخر ہے جسے وہ اپنا دوسرا گھر سمجھتے ہیں۔
