Tag: مصر

  • مصر میں جاسوسی کے شبہے میں روبوٹ خاتون گرفتار

    مصر میں جاسوسی کے شبہے میں روبوٹ خاتون گرفتار

    قاہرہ: مصر میں جاسوسی کے شبہے میں ایک آرٹسٹ خاتون روبوٹ کو گرفتار کر لیا گیا۔

    تفصیلات کے مطابق دو ہفتے قبل ایک خصوصی نمائش کے لیے قاہرہ پہنچنے والی خاتون آرٹسٹ روبوٹ اے-ڈا (Ai-Da) کو کسٹمز حکام نے حراست میں لے لیا، کیوں کہ انھیں شبہ تھا کہ اس روبوٹ کو مصر کے خلاف جاسوسی میں استعمال کیا جائے گا۔

    ’اے-ڈا‘ بالکل کسی خاتون کی طرح نظر آنے والی ایک روبوٹ ہے، جو مصنوعی ذہانت استعمال کرتے ہوئے، اپنے مشینی ہاتھوں سے تصویریں بنانے کے علاوہ مجسمہ سازی بھی کر سکتی ہے۔

    اس روبوٹ کو ’مستقبل کے ایک وژن‘ کے طور پر پیش کیا گیا ہے، جو اس دور کے دیگر تجریدی آرٹسٹس کی طرح ہر لحاظ سے اپنے کام میں اچھی ہے، لیکن اے ڈا جو کہ دنیا کی پہلی الٹرا رئیلسٹک روبوٹ آرٹسٹ ہے، نے اپنی تازہ ترین نمائش سے قبل اس وقت ایک عارضی رکاوٹ کا سامنا کیا جب مصری سیکیورٹی فورسز نے اسے 10 اکتوبر کو کسٹمز میں حراست میں لے لیا۔

    تاہم برطانوی وزارتِ خارجہ کی مسلسل دس دن کی کوششوں کے بعد مصری حکام نے بالآخر اسے آزاد کر دیا اور یوں اگلے روز وہ مصوری کی نمائش میں اپنے فن پاروں کے ساتھ شریک ہوگئی۔

    اے ڈا کی آنکھوں میں کیمرے لگائے گئے ہیں، جن کی وجہ سے سیکیورٹی کے خدشات کے باعث روبوٹ اور اس کے مجسمہ ساز کو کسٹمز میں 10 دنوں تک رکھا گیا، جس سے سفارتی جھگڑا بھی پیدا ہوا۔

    اس روبوٹ کو مختلف برطانوی اداروں نے باہمی تعاون و اشتراک سے تیار کیا ہے تاکہ مصوری اور مجسمہ سازی جیسے پیچیدہ فنونِ لطیفہ بھی روبوٹس کی دسترس میں لائے جا سکیں، انیسویں صدی کی مشہور برطانوی ریاضی داں خاتون ایڈا لولیس کے نام پر اس روبوٹ کا نام ’اے-ڈا‘ رکھا گیا ہے۔

    دراصل اے ڈا کو اہرام مصر کے سامنے مصوری کی پہلی نمائش میں حصہ لینا تھا جو 21 اکتوبر کو شروع ہوئی ہے، غزہ کے عظیم ہرم (ہرمِ خوفو) کے دامن میں یہ نمائش 7 نومبر تک جاری رہے گی۔

  • میرے بیٹے کو سر عام پھانسی دی جائے: ماں کا مطالبہ

    میرے بیٹے کو سر عام پھانسی دی جائے: ماں کا مطالبہ

    قاہرہ: مصر میں ایک ماں نے اپنے ہی بیٹے کو سرِعام پھانسی دینے کا مطالبہ کر دیا ہے۔

    مصری میڈیا کے مطابق ایک مصری خاتون نے سوشل میڈیا پر اپنے بیٹے کو انسانیت سوز جرم کی پاداش میں سرعام پھانسی دینے کا مطالبہ کر کے پورے معاشرے کو سخت حیرانی میں مبتلا کر دیا ہے۔

    مصری جریدے ’الاہرام‘ سمیت ملک کے تمام اخبارات و رسائل اور ذرائع ابلاغ نے اس واقعے کی تفصیلات جاری کی ہیں، خاتون کے بیٹے نے اپنی بہن کا سر تن سے جدا کر دیا تھا۔

    نیوز رپورٹس کے مطابق ملزم نشے کا عادی ہے، واردات کے دن وہ اپنی بہن کے گھر گیا اور قرض کے طور پر رقم طلب کی، بہن کو معلوم تھا کہ وہ نشے کے لیے رقم مانگ رہا ہے، پہلے بھی مانگتا رہا تھا، اس لیے اس نے پیسے دینے سے انکار کر دیا۔

    طیش میں آ کر ملزم نے اپنی بہن پر حملہ کیا اور اس پر تشدد کرنے لگا، بہن کو زد و کوب کر کے وہ باورچی خانے سے چھری لے آیا اور اس کی گردن اور پیٹ پر تابڑ توڑ وار کیے، رپورٹس کے مطابق بہن امید سے تھی، وہ خون میں لت پت ہو کر گر گئی اور جان کی بازی ہارگئی۔

    عینی شاہدین کا کہنا ہے کہ یہ نوجوان محلے کے تمام لوگوں میں نشئی کے طور پر مشہور تھا، وہ ہمیشہ بہن سے نشے کے لیے رقم مانگتا رہتا تھا۔ ماں کو جیسے ہی واردات کا علم ہوا انھوں نے سوشل میڈیا پر مطالبہ کیا کہ ان کے بیٹے کو سرعام پھانسی دے دی جائے۔

    واضح رہے کہ قاہرہ سیکیورٹی فورس کے اہل کاروں نے ملزم کو گرفتار کر لیا ہے اور اب اس کے خلاف قانونی کارروائی کی جا رہی ہے۔

  • مصر: معمولی جھگڑے نے خاندان اجاڑ دیا

    مصر: معمولی جھگڑے نے خاندان اجاڑ دیا

    قاہرہ: مصر میں میاں بیوی کے درمیان معمولی تکرار نے پورے خاندان کو اجاڑ دیا۔

    تفصیلات کے مطابق مصر میں ایک ڈینٹسٹ نے اپنی اہلیہ کو بچوں کے سامنے قتل کر دیا، قاتل نے چاقو کے گیارہ وار کیے جو جاں لیوا ثابت ہوئے۔

    العربیہ نیوز کے مطابق یہ افسوس ناک واقعہ مصر کے شمالی علاقے کی کمشنری الدقھلیہ میں پیش آیا، جہاں 29 سالہ دندان ساز محمود عبدالہادی نے اپنی 26 سالہ اہلیہ لیڈی ڈاکٹر یاسمین سلیمان کو تین بچوں کے سامنے انتہائی بے دردی سے قتل کر دیا۔

    قتل کی یہ ہول ناک واردات عیدالاضحیٰ کے دنوں میں ہوئی، میاں بیوی کے درمیان معمولی سے خانگی امور پر تنازع ہوا، جو بڑھتے بڑھتے انتہائی حد تک پہنچ گیا، اور میاں نے بیوی کو چاقو کے پے در پے وار سے قتل کر دیا، بچوں کے چیخنے پر قاتل آلہ قتل کو نعش پر ہی پھینک کر فرار ہوگیا۔

    رپورٹس کے مطابق قاتل نے انتہائی طیش کی حالت میں اہلیہ پر چاقو کے گیارہ وار کیے جس سے وہ موقع پر ہی ہلاک ہو گئیں۔

    ماں کو خون میں لت پت دیکھ کر تینوں بچوں نے چیخنا شروع کر دیا تھا، جس سے گھبرا کر قاتل موقع واردات سے فرار ہو گیا، جب کہ پڑوسی وہاں پہنچ گئے۔

    پولیس کے مطابق پڑوسیوں نے فوری طور پر سیکیورٹی حکام کو طلب کیا، جس پر اہل کاروں نے جائے واردات پہنچ کر نعش اور آلہ قتل اپنی تحویل میں لے لیا، حکام کی جانب سے مفرور قاتل کی گرفتاری کے وارنٹ بھی جاری کر دیے گئے۔

  • بھائی کی شادی میں رقص کرتے نوجوان کی اچانک موت

    بھائی کی شادی میں رقص کرتے نوجوان کی اچانک موت

    قاہرہ: مصر میں ایک شادی کے دوران دولھے کا بھائی رقص کرتے کرتے اچانک گر گیا اور اس کی موت واقع ہو گئی۔

    تفصیلات کے مطابق مصر کے شہر المنزلہ میں بھائی کی شادی کی تقریب کے دوران نوجوان رقص کرتے ہوئے گر پڑا اور موقع پر اس کی موت واقع ہو گئی۔

    مقامی میڈیا رپورٹس کے مطابق دولھے کے جوان بھائی کی اچانک موت کی وجہ سے شادی کی تقریب میں صف ماتم بچھ گئی، نوجوان شادی میں آئے دیگر مہمانوں کے ساتھ رقص کر رہا تھا، اچانک دل کا دورہ پڑنے سے گر پڑا۔

    27 سالہ نوجوان محمد محمود رشد موت کی آہٹ سے بے خبر بھائی کی شادی کی خوشی میں رقصاں تھا، اچانک بے ہوش ہو کر گر پڑا، کچھ دیر تک تو لوگوں نے اس کی طرف توجہ بھی نہیں دی، لیکن پھر تشویش میں مبتلا ہو کر جب اسے اٹھانا چاہا تو وہ بے حس و حرکت تھا۔

    نوجوان کو بے ہوشی کی حالت میں فوری طور پر قریبی اسپتال پہنچایا گیا تاہم ڈاکٹرز نے معائنے کے بعد افسوس ناک خبر سنا دی کہ نوجوان دل کا دورہ پڑنے سے فوت ہو چکا ہے۔

    موت کی خبر پہنچنے پر شادی کے گھر میں کہرام مچ گیا، دولھے کی ماں اپنے جواں سال بیٹے کی اچانک موت پر صدمے سے بے ہوش ہو گئیں۔

    یہ خبر سن کر المنزلہ شہر کے سیکڑوں لوگ نوجوان کی موت پر تعزیت کے لیے اہل خانہ کے ہاں آئے، جہاں شادی کے لیے لگائے گئے ٹینٹس تعزیتی جلسہ گاہ کا روپ دھار گئے تھے۔

  • موت کا ڈرامہ رچانے والی یوٹیوبر ایک سال بعد آنے والی اپنی موت سے بے خبر

    موت کا ڈرامہ رچانے والی یوٹیوبر ایک سال بعد آنے والی اپنی موت سے بے خبر

    قاہرہ: مصر کی ایک مشہور یوٹیوبر خاتون اپنی موت کا ڈرامہ رچا کر بہت سے لائیکس اور ویوز اکٹھے کرنے کے بعد ٹھیک ایک سال بعد اسی روز سچ مچ چل بسیں۔

    بین الاقوامی میڈیا کے مطابق ام زیاد نامی یہ خاتون ڈائری آف ام زیاد کے نام سے اپنا یوٹیوب چینل چلا رہی تھیں، ایک سال قبل انہوں نے اپنے چینل سے اپنی جعلی موت کی ایک ویڈیو نشر کی تھی۔

    ویڈیو میں دیکھا جاسکتا ہے کہ وہ اپنے شوہر کے ساتھ بیٹھ کر کھانا کھا رہی ہیں، اس دوران اچانک ان کی طبیعت خراب ہوئی اور وہ بے دم ہو کر گر گئیں جس کے بعد ان کے بچے ان کے گرد بیٹھ کر ان کے ہاتھ پاؤں سہلانے لگے۔

    بچے اس دوران رو بھی رہے تھے جبکہ شوہر بھی پریشان ہوگئے، اس کے بعد وہ اچانک ہنستی ہوئی اٹھ بیٹھیں۔ ام زیاد کا کہنا تھا کہ انہوں نے یہ ڈرامہ اپنے شوہر اور بچوں کا ردعمل دیکھنے کے لیے کیا تھا۔

    لیکن اب ایک ٹھیک ایک سال بعد وہ سچ مچ موت کا شکار ہوگئیں۔

    ان کے بھائی نے جو خود بھی ایک یوٹیوبر ہیں، اپنی ایک ویڈیو میں اپنی بہن کے انتقال کا بتاتے ہوئے کہا کہ ان کے گھر میں ایک حادثہ پیش آیا تھا، ام زیاد کے گھر کے گیزر کی گیس لیک ہوئی جس کے بعد وہ دم گھٹنے سے چل بسیں۔

    موت سے چند روز قبل ام زیاد نے اپنی ایک ویڈیو میں اپنی طبیعت خرابی کے بارے میں بھی بتایا تھا کہ وہ کووڈ 19 کا شکار نہیں ہوئیں تاہم وہ سانس لینے میں تکلیف اور گھٹن کی شکایت محسوس کر رہی ہیں۔

    ام زیاد کی اچانک موت کے بعد ان کے مداح نہایت غمگین ہیں۔

  • نہر سوئز سے متعلق بڑا قدم

    نہر سوئز سے متعلق بڑا قدم

    قاہرہ: مصر نے دنیا کی مصروف ترین تجارتی گزرگاہ نہر سوئز کو چوڑا کرنے پر غور شروع کر دیا ہے۔

    تفصیلات کے مطابق نہر سوئز میں بحری جہاز پھنسنے کے واقعے کے بعد مصر نے اس شپنگ چینل کو وسعت دینے پر غور شروع کر دیا ہے۔

    اس سلسلے میں سوئز کینال اتھارٹی کے چیئرمین اسامہ ربی نے کہا ہے کہ نہر کے شپنگ چینل کو چوڑا کرنے پر غور ہو رہا ہے، انھوں نے کہا کہ چینل کی بندش سے ہونے والے نقصانات اور ہرجانے کی مالیت ایک بلین ڈالرز تک پہنچ سکتی ہے۔

    ادھر کینال اتھارٹی کے ریسکیو آپریشن میں کام کرنے والے اہل کاروں کا کہنا تھا کہ نہر میں پھنسنے والے ایور گرین جہاز کے کپتان نے غلطی کی تھی جس کے بعد جہاز اپنے راستے سے ہٹ گیا اور کنارے میں پھنس گیا، اس سے قبل یہاں سے اسی موسمی حالات میں 12 جہاز گزر گئے تھے اور انھیں تیز ہوا اور طوفان سے کوئی مسئلہ نہیں ہوا۔

    نہر سوئز : راستہ کھلنے کے باوجود ڈھائی سو جہاز اپنی باری کے منتظر

    خیال رہے کہ نہر سوئز میں پھنسے دیو ہیکل کنٹینر شپ کو پیر کو نکالا گیا تھا، تاہم اب بھی اس راستے سے گزرنے کے لیے جہازوں کی لمبی قطاریں لگی ہوئی ہیں، اب تک 281 مال بردار جہاز اپنی منزل کی جانب روانہ ہو چکے ہیں، جب کہ 249 بحری جہازوں کا نکلنا باقی ہے۔

    ماہرین کا کہنا ہے کہ اس ٹریفک جام کو ختم ہونے کے باوجود تمام تجارتی جہازوں کو یہاں سے گزرنے میں مزید 10 دن لگ سکتے ہیں، جب کہ منگل کے روز مصر کے صدر نے کہا تھا کہ اس میں محض 3 دن لگیں گے۔

  • مصر میں جدید ٹرانسپورٹ سسٹم کی منظوری

    مصر میں جدید ٹرانسپورٹ سسٹم کی منظوری

    قاہرہ: مصر کے 6 شہروں میں ماس ٹرانزٹ سروس کی منظوری دے دی گئی ہے، کیش لیس ادائیگی اور ایپس سے منسلک یہ منصوبہ جلد فعال ہوجائے گا۔

    بین الاقوامی ویب سائٹ کے مطابق مصر کی نئی اربن کمیونیٹیز اتھارٹی نے مصر کے 6 نئے شہروں میں ماس ٹرانزٹ سروس کی منظوری دی ہے، اتھارٹی کی ملکیت ان بسوں کو چلانے کا ٹھیکہ کمپنی مواصلات مصر کو دیا گیا ہے۔

    ٹرانسپورٹ ریگولیٹری یونٹ کے ڈائریکٹر احمد الکافوری کا کہنا ہے کہ یہ بسیں نیو قاہرہ، الشروق، العبور سمیت 6 شہروں میں چلنا شروع کردیں گی۔

    الکافوری کے مطابق اس منصوبے کا مقصد مصر میں وژن 2030 کے منصوبے کے مطابق ملک میں پائیدار اور ماحول دوست نقل و حمل کے نظام کی ترقی کو یقینی بنانا ہے، نئے منصوبے سے ٹریفک کی بھیڑ اور سفر کے دورانیے کو کم کرنے میں بھی مدد ملے گی۔

    انہوں نے کہا کہ اس منصوبے کو بین الاقوامی معیار اور انتظامی ہدایات کے مطابق عمل میں لایا جائے گا اور ہر شہر میں اس کی مخصوص ضروریات کے مطابق اس پر عمل کیا جائے گا۔

    اس منصوبے کو مسافروں کے آرام کو یقینی بنانے کے لیے کیش لیس ادائیگی کے نظام اور ایپس کے ساتھ منسلک کیا جائے گا، منصوبے کی نگرانی جدید ترین ٹیکنالوجی سے کی جائے گی۔

    ٹرانسپورٹ ریگولیٹری یونٹ کے قانونی مشیر احمد رضا عمارہ کا کہنا ہے کہ معاہدے میں آپریشنز اور کارکردگی پر نظر رکھنے کے لیے قانونی اور تکنیکی دفعات شامل ہیں۔

  • دیوہیکل بحری جہاز نہر سوئز میں پھنس گیا، دنیا کا سب بڑا تجارتی راستہ بند

    دیوہیکل بحری جہاز نہر سوئز میں پھنس گیا، دنیا کا سب بڑا تجارتی راستہ بند

    قاہرہ: مصر کی نہر سوئز میں بحری جہاز پھنس جانے سے دنیا کا اہم ترین تجارتی راستہ بلاک ہوگیا، جہاز کی وجہ سے بحیرہ روم، بحیرہ احمر اور نہر سوئز میں مال بردار جہازوں کی قطار میں اضافہ ہوتا جا رہا ہے۔

    بین الاقوامی میڈیا کے مطابق منگل کے روز ایور گرین نامی بحری جہاز نہر سوئز میں واقع بندرگاہ کے شمال سے بحیرہ روم کی جانب گامزن تھا جب جہاز تکنیکی خرابی کی وجہ سے اپنا توازن اور سمت برقرار نہ رکھ سکا۔

    سمت مڑنے سے جہاز نہر کے تنگ راستے میں پھنس گیا جس سے پورا راستہ بلاک ہوگیا۔

    جہاز کے پیچھے ڈیڑھ سو کے قریب مزید بحری جہاز منتظر ہیں کہ راستہ کھلے تو وہ اپنی منزل کی جانب روانہ ہوں، علاقے میں بحری جہازوں کا ٹریفک جام ہوچکا ہے۔

     

    View this post on Instagram

     

    A post shared by Julianne Cona (@fallenhearts17)

    واضح رہے کہ سوئز کنال بحیرہ احمر کو بحیرہ روم سے ملاتی ہے اور یہ بحری جہازوں کو ایشیا سے یورپ ملانے کا سب سے تیز سمندری راستہ ہے۔ ڈیڑھ سو سال قبل بنائی جانے والی سوئز کنال 193 کلو میٹر طویل ہے اور اس کی چوڑائی 205 میٹر ہے۔

    ابھی تک واضح نہیں کہ واقعے کی اصل وجہ کیا ہے، جہاز کے لیے راستہ بنانے کے لیے زمین کھودنے والی مشین جہاز کے آگے موجود ہے جس سے لگتا ہے کہ وہ کھدائی کرنے میں مصروف ہے۔

    ایور گرین نامی اس بحری جہاز کا شمار دنیا کے سب سے بڑے مال بردار جہازوں میں ہوتا ہے، اس کی لمبائی 400 میٹر اور چوڑائی تقریباً 60 میٹر ہے۔ اس سفر میں ایور گرین چین سے نیدر لینڈز کے شہر راٹر ڈیم جا رہا تھا۔

    امدادی ٹگ بوٹس کی مدد سے بھی اس جہاز کو ہٹانے کی کوشش کی جا رہی ہیں لیکن اتنے بڑے حجم کا جہاز فی الحال اپنی جگہ سے ٹس سے مس نہیں ہوا۔

    ایور گرین کے پھنس جانے سے بحیرہ روم، بحیرہ احمر اور نہر سوئز میں مال بردار جہازوں کی قطار میں اضافہ ہوتا ہی جا رہا ہے اور ہر گھنٹہ لاکھوں ڈالر کا نقصان بھی ہورہا ہے۔

    بحری جہاز کے مالک شوئی کسن نے اس نقصان پر معذرت طلب کرتے ہوئے کہا ہے کہ بحری جہاز کو ہٹانے کی کوششیں جاری ہیں۔

    بین الاقوامی امور کے ماہرین کا خیال ہے کہ جہاز کو نکلنے میں تاخیر ہوسکتی ہے اور اس سے عالمی تجارت پر بہت گہرا اثر پڑ سکتا ہے، ماہرین کا کہنا ہے کہ اگر جہاز کو وہاں سے ہٹایا نہیں جا سکا تو پھر اس پر لدے ہوئے سامان کو نکالنا پڑے گا۔

    یاد رہے کہ عالمی بحری تجارت کا 10 فیصد حصہ اس نہر سے گزرتا ہے۔

    اس سے قبل سنہ 2017 میں بھی ایک جاپانی جہاز نہر سوئز میں پھنس گیا تھا تاہم اسے چند گھنٹوں میں نکال لیا گیا تھا۔

  • وزیر خارجہ کا قاہرہ میں عرب لیگ ہیڈ کوارٹرز کا دورہ

    وزیر خارجہ کا قاہرہ میں عرب لیگ ہیڈ کوارٹرز کا دورہ

    قاہرہ: وزیر خارجہ شاہ محمود قریشی اور سیکرٹری جنرل عرب لیگ کی قاہرہ میں ملاقات ہوئی، ملاقات میں علاقائی صورتحال، اہم عالمی امور اور باہمی دلچسپی کے معاملات پر تبادلہ خیال کیا گیا۔

    تفصیلات کے مطابق وزیر خارجہ شاہ محمود قریشی نے مصری دارالحکومت قاہرہ میں عرب لیگ ہیڈ کوارٹرز کا دورہ کیا، عرب لیگ کے سیکریٹری جنرل نے شاہ محمود قریشی کا خیر مقدم کیا۔

    وزیر خارجہ شاہ محمود قریشی اور سیکرٹری جنرل عرب لیگ کی ملاقات بھی ہوئی، ملاقات میں علاقائی صورتحال، اہم عالمی امور اور باہمی دلچسپی کے معاملات پر تبادلہ خیال کیا گیا۔

    وزیر خارجہ شاہ محمود قریشی کا کہنا تھا کہ پاکستان، عرب لیگ کے رکن ممالک کو خصوصی اہمیت دیتا ہے، عرب لیگ کے رکن ممالک سے پاکستان کے مضبوط روابط ہیں، پاکستانی تارکین وطن کی کثیر تعداد عرب ممالک میں مقیم ہے۔

    ملاقات میں سیکریٹری جنرل عرب لیگ کو افغانستان میں امن کے لیے کاوشوں اور بھارت کی جانب سے مقبوضہ کشمیر میں انسانی حقوق کی خلاف ورزیوں سے بھی آگاہ کیا گیا۔

    یاد رہے کہ وزیر خارجہ شاہ محمود قریشی 2 روز قبل قاہرہ پہنچے تھے۔

    وزیر خارجہ نے اپنے مصری ہم منصب سامح شکری سے بھی ملاقات کی تھی جس میں دو طرفہ تعلقات اور کثیر الجہتی شعبہ جات میں دو طرفہ تعاون کے فروغ کے حوالے سے تبادلہ خیال کیا گیا۔

  • وزیر خارجہ شاہ محمود قاہرہ پہنچ گئے

    وزیر خارجہ شاہ محمود قاہرہ پہنچ گئے

    قاہرہ: وزیر خارجہ شاہ محمود قریشی مصر کے دارالحکومت قاہرہ پہنچ گئے۔

    تفصیلات کے مطابق وزیر خارجہ پاکستان دو روزہ دورے پر مصر پہنچ گئے ہیں، قاہرہ ایئر پورٹ پر ان کا استقبال قاہرہ اسسٹنٹ فارن منسٹر ایمبیسڈر طارق الوسیمی نے کیا۔

    پاکستان ایمبیسی قاہرہ کے ناظم الامور شاہ نذر خان اور مصری وزارت خارجہ کے سینئر حکام نے شاہ محمود قریشی کا پرتپاک خیر مقدم کیا۔

    وزیر خارجہ قاہرہ میں دو روزہ دورے کے دوران مصری وزیر خارجہ سامح شکری سمیت اہم شخصیات سے ملاقاتیں کریں گے۔ ان ملاقاتوں میں دو طرفہ تعلقات اور کثیرالجہتی شعبہ جات میں دو طرفہ تعاون کے فروغ کے حوالے سے تبادلہ خیال کیا جائے گا۔

    وزیر خارجہ قاہرہ میں بزنس کمیونٹی کے ساتھ بھی خصوصی ملاقات کریں گے، وہ قاہرہ میں عرب لیگ کے ہیڈکوارٹر کا دورہ کریں گے اور سیکریٹری جنرل عرب لیگ سے ملاقات کریں گے۔

    وزارت خارجہ نے توقع ظاہر کی ہے کہ شاہ محمود کا دورہ مصر دونوں ممالک کے درمیان دو طرفہ تعلقات کو مزید مستحکم بنائے گا۔

    مصر روانگی سے قبل وزیر خارجہ نے ویڈیو پیغام میں کہا تھا کہ وہ اپنے ہم منصب کی دعوت پر مصر جا رہے ہیں، مصر مسلم امہ کا اہم ملک اور افریقا کے لیے گیٹ وے ہے، اور افریقی ممالک سے تجارتی تعلقات حکومتی ترجیحات میں شامل ہیں۔

    انھوں نے کہا کہ دونوں ممالک میں معاشی تعاون کے فروغ کے لیے امکانات موجود ہیں، تعلیمی شعبے میں استفادے کے لیے جامعہ الازہر کا دورہ کرنے کی خواہش ہے۔