کراچی : منی لانڈرنگ اور کراچی میں دہشتگردی کیلئے بھارتی فنڈنگ کے مقدمےمیں مزید انکشافات سامنے آگئے، بینک اکاؤنٹس کی مجازاتھارٹی میں ڈاکٹر فاروق ستار، مصطفیٰ کمال سمیت اعلیٰ قیادت کےناموں کا انکشاف ہوا ہے۔
تفصیلات کے مطابق بانی ایم کیو ایم کیخلاف منی لانڈرنگ کے مقدمہ میں تیرہ جوائنٹ بینک اکاؤنٹس کی مجازاتھارٹی میں بڑےنام سامنےآگئے، انسداد دہشت گردی عدالت میں رپورٹ پیش کردی گئی۔
تحقیقاتی رپورٹ کے مطابق منی لانڈرنگ کیلئے13جوائنٹ بینک اکاؤنٹس استعمال ہوئے جو عزیز آباد کے نجی بینکوں کی مختلف برانچوں میں کھولے گئے تھے، جس میں ایم کیو ایم پاکستان کے سربراہ ڈاکٹر فاروق ستار پی ایس پی چیئرمین مصطفیٰ کمال، ڈپٹی میئر کراچی ارشدوہرا سمیت اعلیٰ قیادت کےنام شامل ہیں۔
یہ انکشاف بھی ہوا کہ مذکورہ اکاؤنٹس ایم کیوایم، کےکےایف، سن اکیڈمی کے نام پرکھولے گئے، اس کے علاوہ نذیرحسین یونیورسٹی اور طارق میر کے نام پربھی اکاؤنٹ ہیں۔
رپورٹ کے مطابق تیرہ میں سے ایک اکاؤنٹ ختم اور چارغیر فعال ہیں، ان بینک اکاؤنٹس میں فاروق ستار،مصطفی کمال، ڈپٹی میئر کراچی ارشدوہرا دستخط کرنے کے مجاز رہے، جبکہ بابرغوری، رؤف صدیقی، خالد مقبول صدیقی کےنام بھی رپورٹ کا حصہ ہیں۔
رپورٹ میں احمدعلی، کنور خالد یونس، شیعب بخاری مرحوم سمیت نازیہ جمیل، عادل صدیقی اور طارق میرکے نام بھی شامل ہیں، عدالت میں ارشد وہرا اپنابیان ریکارڈ کراچکے ہیں۔
تفتیشی ذرائع کے مطابق بڑےناموں کے سامنے آنے پر تفتیش کادائرہ بھی بڑھائے جانے کا امکان ہے۔ تفتیشی ذرائع کا مزید کہنا ہے کہ ڈپٹی میئر ارشد وہرا کا نام مقدمے سے نکالنے کا تاثرغلط ہے۔
کراچی : پی ایس پی کے چیئرمین مصطفیٰ کمال نے کہا ہے کہ عوام کیلئےہرکسی کےپاس جائیں گے، چاہتےہیں کہ عوام کے مسائل حل اور پریشانی کاخاتمہ ہو۔
یہ بات انہوں نے فکشنل مسلم لیگ کے سربراہ پیرپگارا سے ملاقات کے بعد صدر الدین شاہ کے ساتھ پریس کانفرنس کرتے ہوئے میڈیا سے گفتگو کرتے ہوئے کہی.
تفصیلات کے مطابق پاک سر زمین پارٹی کے ایک وفد نے چیئرمین مصطفیٰ کمال کی زیر قیادت فکشنل مسلم لیگ کے سربراہ پیرپگارا سے کنگری ہاﺅس میں ملاقات کی۔
ملاقات میں باہمی دلچسپی کے امور اور خصوصاً سندھ کی سیاسی صورتحال پر تبادلہ خیال کیا گیا، اس موقع پر انیس ایڈووکیٹ،اشفاق منگی،رضا ہارون اور دیگر بھی موجود تھے۔
مصطفیٰ کمال نے کہا کہ کوئی میرا دشمن نہیں ہے ہرپاکستانی شخص میرا بھائی ہے، ہم رنگ نسل، زبان مسلک سے بالاتر ہوکرعوام کی خدمت کرینگے، پیر پگارا سے سیٹ ایڈجسٹمنٹ کیلئے نہیں بلکہ مل کر چلنے کیلئے آیا ہوں۔
مصطفی کمال نے مزید کہا کہ آج سیرحاصل گفتگوہوئی، پی ایس پی اور فنکشنل لیگ کی سوچ میں کوئی فرق نہیں، فنکشنل لیگ کے ساتھ پرانے تعلقات ہیں،۔
انہوں نے کہا کہ صوبے کے مسائل بہت ہیں بچوں کو خوراک نہیں مل رہی، عوام کے پاس پینے کا صاف پانی نہیں ہے۔ اس موقع پرصدرالدین شاہ راشدی نے کہا کہ مصطفیٰ کمال کا ماضی میں اچھا ریکارڈ رہا ہے، ہمارا مستقبل ساتھ ہوگا خدمت پر یقین رکھتے ہیں۔
ان کا کہنا تھا کہ ایک ساتھ چلنے کافیصلہ کیا ہے اپنےحلقےمیں کام کریں گے، الیکشن کیلئےتیارہیں، جب بھی اعلان ہوگا میدان میں کھڑے ہونگے۔
کرا چی : پاکستان سرزمین پارٹی کے سربراہ مصطفی کمال نے کہا ہے کہ پی ایس پی کا کارنامہ ہے کہ بانی ایم کیوایم کی آواز کوئی نہیں سنتا، پاکستان کےچاہنےوالوں نےایک پرچم بھی نہیں جلایا۔
یہ بات انہوں نے پاکستان ہاؤس کراچی میں پی ایس پی میں دیگرسیاسی جماعتوں کےذمہ داروں اورکارکنان کی شمولیت کی تقریب سے خطاب کرتے ہوئے کیا۔
تفصیلات کے مطابق پی ایس پی میں 1900سے زائد مختلف جماعتوں کے ذمہ داروں اور کارکنان نے شمولیت اختیارکی، پی ایس پی میں شامل919افراد کا تعلق ایم کیوایم پاکستان سے ہے جبکہ پیپلزپارٹی، پی ٹی آئی، مسلم لیگ ن سمیت دیگرپارٹیوں کے کارکنان بھی شامل ہیں۔
اس موقع پر خطاب کرتے ہوئے چیئرمین پی ایس پی مصطفیٰ کمال نے کہا کہ آج ملکی تاریخ کی سب سے بڑی شمولیت صرف ڈیڑھ سال پرانی پارٹی میں ہورہی ہے، یہ شمولیت ہماری ترقی کی طرف رفتار کی نشاندہی کرتی ہے، میری دعا ہے کہ میرے تمام کارکنان نیک مقصد پرقائم رہیں۔
چیئرمین پی ایس پی کا کہنا تھا کہ ڈیڑھ سال پہلے آواز اٹھانے پرگولی ماردی جاتی تھی مگر اب خوف کا بت ٹوٹ چکا ہے، انہوں نے کہا کہ پوچھا جاتا تھا آپ اپنے گھر سے کیسے نکلو گے ؟ ہم نے جواب دیا کوئی جرم نہیں کیا، اللہ ہماری حفاظت کریگا۔
مصطفیٰ کمال نے کہا کہ پی ایس پی کا ہی کارنامہ ہے کہ اب بانی ایم کیوایم کی آواز پر کوئی لبیک نہیں کہتا، بانی ایم کیوایم پرچم جلانے کا مطالبہ کرتا ہے تو محب وطن پاکستانی قومی پرچم تھامتے ہیں۔
پاکستان کےچاہنے والوں نے ایک پرچم بھی نہیں جلایا، پرچم کی حرمت برقرار رکھنےکیلئے ہم نےجانیں دی ہیں، ہمیں مجرم قراردینے والے وزیراعظم کو مجرم قرار دے دیا گیا، شہبازشریف پر14افراد کے قتل کی رپورٹ آنے والی ہے۔
کراچی : ایم کیو ایم پاکستان کے رکن سندھ اسمبلی ندیم راضی نے پاک سرزمین پارٹی میں شمولیت اختیار کرلی۔
تفصیلات کے مطابق کراچی میں پریس کانفرس کرتے ہوئے پاک سرزمین پارٹی کے سربراہ مصطفیٰ کمال نے ندیم راضی کی پی ایس پی میں شمولیت سے آگاہ کیا۔
ندیم راضی ایم کیو ایم کی ٹکٹ پر پی ایس 121 سے رکن سندھ اسمبلی منتخب ہوئے تھے۔
مصطفیٰ کمال نے پریس کانفرنس کرتے ہوئے کہا کہ پی ایس پی کےنظریےمیں کسی قسم کا ابہام نہیں ہے جبکہ پاک سرزمین پارٹی کے خلاف پروپیگنڈے کے باوجود سچائی چھپتی نہیں ہے۔
انہوں نے کہا کہ ڈیڑھ سال میں 35،35 سال پرانی پارٹیوں سے زیادہ مستحکم ہیں جبکہ پی ایس پی کو کراچی ،سندھ اور پاکستان کے لوگوں نے دیکھ لیا ہے۔
پاک سرزمین پارٹی کے سربراہ نے کہا کہ لگتا تھا این اے120الیکشن کے بعد دودھ کی نہری بہناشروع ہوجائیں گی،کیا این اے 120 کا الیکشن ہونےسے مسائل حل ہوگئے؟۔
واضح رہے کہ مصطفیٰ کمال نے کہا کہ عجیب کیفیت ہےموجودہ وزیراعظم اب بھی نوازشریف کووزیراعظم کہتاہے،انہوں نے کہا کہ اداروں کو غلط ثابت کرنے کی مہم چلائی جارہی ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
کراچی : پاک سرزمین پارٹی کے چیئرمین مصطفیٰ کمال نے کہا ہے کہ اپنے مقتول کارکنوں کا بدلہ قائد ایم کیوایم سے لے کر رہوں گا، مہاجروں نے 30 سالوں میں ہزاروں بچےقربان کرائے، اب کراچی میں خون بہانے والے نہیں بچیں گے۔
ان خیالات کا اظہار انہوں نے اورنگی ٹاؤن میں مقتول کارکنان کے تعزیتی اجلاس سے خطاب کرتے ہوئے کیا، اپنے خطاب میں مصطفیٰ کمال بانی ایم کیوایم پر پھر برس پڑے۔
انہوں نے کہا کہ بے گناہ انسانوں کے مرنے پر وہ شخص مبارکباد دے رہا ہے، جن کے پاس مبارکباد کا پیغام آیا ان میں سے کچھ ملزمان پکڑے گئےہیں لیکن منصوبہ ساز بھاگتے پھر رہے ہیں۔
انہوں نے کہا کہ قاتلوں نے50ہزار روپے میں دو انسانوں کی جان لے لی، ہم نے قائد ایم کیوایم کو سیاسی طور پرمار دیا تھا اب دفن ہونا باقی ہے، بانی ایم کیوایم کو ایم کیوایم پاکستان نے دفنانے سے بچایا۔
آئندہ الیکشن میں ان کی سیاست کا جنازہ دفن کردیں گے، بانی ایم کیو ایم جماعت کو فنڈنگ را سے مل رہی ہے، ان لوگوں نے عمران فاروق کو پہلے خود قتل کروایا اور بعد میں اس کے قاتلوں کو مروانے کے احکامات بھی دیئے۔
ان کا کہنا تھا کہ میں اپنے ساتھیوں کی شہادت پر آنسو نہیں بہاﺅں گا، میں نے اپنے کارکنا ن کو پر امن رہنے کی تاکید کی کسی کو ایک پتھر بھی اٹھانے نہیں دیا۔
کراچی : پاک سرزمین پارٹی کے چیئرمین سید مصطفیٰ کمال نے کہا ہے کہ ڈاکٹر فاروق ستار اور متحدہ پاکستان نے بانی ایم کیوایم کو دوبارہ زندہ کیا، ایم کیو ایم پاکستان کو لندن سے الگ نہیں سمجھتے، بانی ایم کیوایم شیطانوں کا پیر ہے۔
ان خیالات کا اظہار انہوں نے پاک سر زمین پارٹی کی جانب سے انتخابی نشان ڈولفن کی تقریب رونمائی سے خطاب کرتے ہوئے کیا، انتخابی نشان کی تقریب رونمائی میں پی ایس پی کے صدر انیس قائم خانی سمیت دیگررہنماؤں نے شرکت کی۔
مصطفی ٰکمال نے کہا کہ پی ایس پی کارکنان 22اگست کے متحدہ پاکستان کے ڈرامے کی وجہ سے جاں بحق ہوئے، آج بانی ایم کیو ایم پھر سوشل میڈیا کے ذریعے لوگوں کو بہکارہا ہے، بانی ایم کیوایم شیطانوں کا پیرہے۔
چیئرمین پی ایس پی مصطفیٰ کمال نے مزید کہا کہ ایم کیوایم بانی متحدہ کا سیاسی اور عسکری ونگ ہے، ایم کیوایم لندن کو ایم کیوایم پاکستان سے الگ نہیں سمجھتے، انہوں نے کہا کہ جب تم پاکستان کو نہیں مانتے تو کس منہ سے عدالتوں کی بات کرتے ہو؟
مصطفی کمال نے کہا کہ میری جماعت ایک رات میں شہرت حاصل کرنے والی جماعت نہیں، میری پارٹی میں ایک،ایک کر کے فرد،ایم پی اے اورذمہ د ار آئے، میری جماعت ہر نشیب و فراز سے لڑتی ہوئی یہاں تک پہنچی ہے، ہم کسی کو ہتھیاروں سے نہیں اپنے صبر سے ماریں گے، کیونکہ ہم نے بھی صبر کیا ہے، انشااللہ آگے بھی کریں گے۔
ان کا کہنا تھا کہ ہم گولیوں سے نہیں ظالموں کو اپنے صبر سے نیست ونابود کریں گے، اللہ کی رضا کیلئے کام کرناچاہتے ہیں، اپنے رب کی مدد سے پارٹی کو طاقتور بنائیں گے۔
انہوں نے اس بات کا عہد کیا کہ ہم کوئی ایسا کام نہیں کریں گے جس سے اللہ ناراض ہو، ہم پر الزام لگانے والے رسوا ہوئے اورآئندہ بھی ہوں گے، ہم بارود اورگولیوں سے پارٹی کو طاقتور نہیں بنائیں گے۔
قبل ازیں تقریب سے خطاب کرتے ہوئے ڈاکٹرصغیراحمد نے کہا کہ ڈولفن کا نشان انسان دشمن نہیں بلکہ انسان دوست ہے، سیاسی جماعتوں کو چیلنج کرتا ہوں کہ ڈولفن کا کوئی منفی پہلو ہےتو ڈھونڈ کر دکھائیں۔
پتنگ کی خطرناک ڈور کے باعث کئی جانیں گئیں، انہوں نے ایم کیو ایم پاکستان کو اپنی تنقید کا نشانہ بناتے ہوئے کہا کہ پتنگ والو اب تمہیں کراچی والے کبھی ووٹ نہیں دینگے۔
کراچی: پاک سرزمین پارٹی کے سربراہ مصطفیٰ کمال نے بھی وزیر اعظم سے استعفے کا مطالبہ کردیا۔ انہوں نے کہا کہ وزیر اعظم کے مستعفی ہونے میں مزید تاخیر جمہوریت کے لیے نقصان دن ثابت ہوگی۔
تفصیلات کے مطابق گزشتہ روز پاناما کیس کی تفتیش کے بنائی جانے والی جے آئی ٹی کی رپورٹ سامنے آنے اور اس میں وزیر اعظم اور ان کے خاندان کو قصور وار ٹہرائے جانے کے بعد وزیر اعظم نواز شریف پر مستعفی ہونے کے لیے دباؤ بڑھ گیا ہے۔
پاکستان تحریک انصاف اور پیپلز پارٹی کی جانب سے استعفیٰ کا مطالبہ کیے جانے کے بعد اب پاکس سرزمین پارٹی نے بھی ان سے مستعفی ہونے کا مطالبہ کردیا۔
پاک سرزمین پارٹی کے سربراہ مصطفیٰ کمال نے کراچی میں میڈیا سے گفتگو کرتے ہوئے کہا کہ جے آئی ٹی کی رپورٹ کے بعد حقائق واضح ہوگئے۔ اب وزیر اعظم استعفیٰ دیں، ان کی جانب سے استعفے میں مزید تاخیر جمہوریت کے لیے نقصان دہ ثابت ہوگی۔
مصطفیٰ کمال نے ایم کیو ایم پاکستان کے میںڈیٹ کو بانی ایم کیو ایم کا مینڈیٹ قرار دیتے ہوئے کہا کہ 22 اگست کے واقعے کے بعد قائد ایم کیو ایم کی جماعت نہیں چل سکتی تھی، اس لیے فاروق ستار کی ایم کیو ایم پاکستان بنائی گئی۔
انہوں نے قائد ایم کیو ایم کو آڑے ہاتھوں لیتے ہوئے کہا کہ ہم نے پاکستان آکر سب سے پہلے ان کے خلاف باتیں کی، اس کے بعد فاروق ستار اور ان کے ساتھیوں نے بھی وہ ہی باتیں دہرائیں جو ہم پہلے کر چکے تھے۔
انہوں نے کہا کہ فاروق ستار اور ایم کیو ایم کے دیگر رہنما اپنے ہی قائد سے متعلق اپنی ہی باتوں کو جھٹلاتے رہے۔
مصطفیٰ کمال نے ایم کیو ایم پاکستان کے سربراہ فاروق ستار کی جانب دوستی کا ہاتھ بڑھاتے ہوئے کہا کہ میں عوام اور کراچی کی ترقی کے لیے فاروق ستار اور ان کے ساتھیوں کو مل کر کام کرنے کی دعوت دیتا ہوں۔
کراچی: ایم کیو ایم پاکستان اور پیپلز پارٹی دونوں نے پاک سرزمین پارٹی کی گزشتہ روز کی ریلی کو تنقید کا نشانہ بنا ڈالا۔
تفصیلات کے مطابق کراچی میں پاک سرزمین پارٹی کی ریلی کے حوالے سے سندھ میں سیاسی مخالفین یک زبان ہو گئے۔
ایم کیو ایم پاکستان کے خواجہ اظہار الحسن نے ریلی کو تنقید کا نشانہ بناتے ہوئے کہا کہ ہمارا ملین آج بھی 6 صفر کا ہے۔ لوگوں نے شاید 2 صفر کو ملین سمجھ لیا ہے۔
سینیئر صوبائی وزیر نثار کھوڑو نے کہا کہ سیاسی سرگرمیوں سے کسی کو نہیں روکا لیکن پاک سرزمین پارٹی کا ریڈ زون میں دھرنا دینا مناسب بات نہیں تھی۔
انہوں نے کہا یہ الگ بات ہے کہ 10 لاکھ لوگ تھے یا نہیں، حکومت نے اپنی رٹ قائم کرنے کی کوشش کی تھی۔
یاد رہے کہ گزشتہ روز پاک سرزمین پارٹی کی ریلی کے دوران پولیس نے مظاہرین پر واٹر کینن کا استعمال کیا اور شیلنگ کی۔ پارٹی کے سربراہ مصطفیٰ کمال اور دیگر رہنماؤں کو گرفتار بھی کیا گیا تاہم بعد ازاں انہیں رہا کردیا گیا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
کراچی: شاہراہ فیصل پر واقع عائشہ باوانی کے قریب پی ایس پی کارکنان سے کشیدگی کے بعد پولیس نے مصطفیٰ کمال سمیت اور مرکزی قیادت سمیت سینکڑوں کارکنان کو گرفتار کرلیا۔
تفصیلات کے مطابق شاہراہ فیصل پر واقع عائشہ باوانی کے قریب انتظامیہ سے مذاکرات میں ناکامی کے بعد پاک سرزمین پارٹی کے کارکنان نے شاہراہ فیصل کے دسرے ٹریک کو بند کیا تو پولیس کی جانب سے لاٹھی چارج شروع کردیا گیا۔
لاٹھی چارج کے بعد مظاہرین اورپولیس میں کشیدگی شروع ہوئی جس کے بعد پولیس نے واٹر کینن کا استعمال کیا اور شیلنگ کی، جس کے نتیجے میں پی ایس پی کے رہنما انیس قائم خانی پوری طرح بھیگ گئے، پولیس نے کریک ڈاؤن کا آغاز کرتے ہوئے مصطفیٰ کمال سمیت پی ایس پی کی مرکزی قیادت کو حراست میں لے لیا۔ گرفتارشدگان میں ڈاکٹر صغیر،رضا ہارون اور دیگر شامل ہیں۔
مصطفیٰ کمال کا گرفتاری کے بعد پیغام
گرفتاری کے بعد مصطفیٰ کمال نے میڈیا سے گفتگو کرتے ہوئے اپنی گرفتاری کی تصدیق کرتے ہوئے کہا کہ پولیس نے معصوم بچوں اور خواتین پر شیلنگ کی، انتظامیہ نے یہ کام کر کے ہمارا کام بہت آسان کردیا، اب کراچی کے ہر علاقے میں مظاہرہ ہوگا۔ مصطفیٰ کمال نے کراچی کے عوام سے اپیل کی کہ وہ باہر نکلیں اور اپنے علاقوں میں مظاہرے شروع کریں۔
ایس ایس پی بلدیہ عبد الرزاق نے مصطفیٰ کمال کو تحویل میں لے کر تھانہ کلاکوٹ منتقل کردیا۔ مرکزی قیادت کی گرفتاری کے بعد پی ایس پی کارکنان شاہراہ فیصل سے منتشر ہوگئے اور پولیس نے مرکزی کیمپ اکھاڑ دیا اور گاڑیوں کو سڑک سے ہٹا کر شاہراہ فیصل کو ٹریفک کے لیے کھول دیا گیا۔
آئندہ کا لائحہ عمل
بعد ازاں پی ایس پی کے کارکنان پاکستان ہاؤس پہنچے اور آئندہ کا لائحہ عمل طے کرنے کے لیے اعلیٰ سطح کی مٹینگ بلائی، اسی دوران کارکنان کو اس بات کا علم ہوا کہ مرکزی رہنما آفاق جمال پیر پر گولی لگنے سے زخمی ہوئے۔
پی ایس پی اسٹوڈنٹ ونگ نے پولیس کریک ڈاؤن کے خلاف کل یوم احتجاج کااعلان کرتے ہوئے کہا کہ کراچی، حیدرآباد، سکھر سمیت تمام جامعات میں کل احتجاج کیا جائے گا جبکہ انیس قائم خانی نے اے آر وائی سے خصوصی گفتگو کرتے ہوئے کہا کہ پاکستان ہاؤس میں ہونے والی مٹینگ میں بڑے فیصلے کیے جائیں گے۔
صوبائی وزیر ناصر حسین شاہ کا مؤقف
دوسری جانب صوبائی وزیر ناصر حسین شاہ نے اے آر وائی سے خصوصی گفتگو کرتے ہوئے کہا کہ کراچی کے عوام نے ملین مارچ کو مسترد کردیا، دس لاکھ لوگوں کو جمع کرنے کا دعویٰ کرنے والے 1 ہزار لوگ بھی جمع نہیں کرسکے۔
انہوں نے کہا کہ پاک سرزمین پارٹی سے مذاکرات کے لیے پی پی کا وفد گیا تھا مگر پی ایس پی نے مسترد کردیا، سندھ حکومت کسی بھی جماعت کو عوام کی پریشانی کا سبب نہیں بننے دے گی، پی ایس پی کے عزائم کا سب کو علم ہے اس لیے عوام نے انہیں مسترد کردیا۔ صوبائی وزیر نے پی ایس پی کے رہنماء انیس ایڈوکیٹ کو چیلنج دیا کہ اگر ہمت ہے تو شہر بند کر کے دکھاؤ۔
مختلف علاقوں میں حالات کشیدہ
پی ایس پی ریلی پر پولیس کریک ڈاؤن کے بعد لیاقت آباد، نیوکراچی، نارتھ کراچی سمیت مختلف علاقوں میں صورتحال کشیدہ ہوگئی ہے، جس کو قابو میں کرنے کے لیے پولیس اور رینجرز کے گشت کو بڑھا دیا گیا۔
مقدمہ درج کرنے کی تیاری
نمائندہ اے آر وائی نذیر شاہ کے مطابق مصطفیٰ کمال اور 10 کارکنان کو کلاکوٹ تھانے منتقل کردیا گیا، پولیس ذرائع نے نمائندہ اے آر وائی کو بتایا کہ پی ایس پی رہنماؤں کے خلاف مقدمہ درج کرنےغور کیا جارہا ہے۔
اطلاعات سامنے آئی ہیں کہ پی ایس پی قیادت پرمقدمہ کے معاملے پر وفاق اورسندھ حکومت میں ٹھن گئی، وفاقی حکومت نے پاک سرزمین پارٹی کے سربراہ اور قیادت کو رہا کرنے کا مطالبہ کردیا جبکہ سندھ حکومت مقدمات درج کروانے پر بضد ہے۔
صوبائی حکومت سے مشاورت کے بعد پاک سرزمین پارٹی کی مرکزی قیادت دفعہ 144 سمیت دہشت گردی ایکٹ کے تحت مقدمات درج کروائے جانے کا امکان ہے کیونکہ ریلی کے منتظمین کے پاس ایسٹ زون کی حد تک کا این او سی موجود تھا۔
مصطفیٰ کمال کی تھانے منتقلی کے بعد پی ایس پی کارکنان کی بڑی تعداد تھانے کے باہر پہنچ گئی اور وقفے وقفے سے نعرے لگائے جارہے ہیں، نقص امن کی صورتحال کے باعث پولیس کی بھاری نفری کو تھانے کے باہر تعینات کردیا گیا اور مرکزی دروازے کو بھی بند کردیا گیا۔
قبل ازیں پاک سرزمین پارٹی اور انتظامیہ کے درمیان مذاکرات ناکام ہوئے جس کے بعد ملین مارچ دوبارہ وزیراعلیٰ ہاؤس کی جانب روانہ ہوا۔ پی پی رہنماؤں کا کہنا ہے کہ پی ایس پی کے مطالبات پرغورکیا جائے گا۔
جبکہ پی ایس پی کے رہنماؤں نے کہا ہے کہ مذاکرات سے انکار نہیں کیا ہے البتہ جسے ٹھوس اور مثبت مذاکرات کرنا ہے وہ ہمارے ملین مارچ میں آکر کر لیں۔ سولہ مطالبات میں سے10پہلےہی منظورکیے جا چکےہیں، کچھ مطالبات ایسےہیں جن میں قانونی پیچیدگیاں ہیں جنہیں دورکرنے کےبعدہی مطالبات پرعمل ہوگا۔
اس حوالے سے پی ایس پی کے رہنما رضاہارون کا کہنا تھاکہ انتظامیہ مطالبات کی منظوری کیلئےسنجیدہ نہیں ہے،
انہوں نے متنبہ کیا کہ مطالبات کی منظوری تک ملین مارچ کسی صورت نہیں رکےگا۔
کراچی پولیس نےملین مارچ کےشرکاکوروکنےکے لیےکمر کس لی ہے اور ایف ٹی سی کے بعد ہوٹل میٹرو پول پر ملین مارچ کے شرکاء کو روکنے کی کوشش کی جائے گی جہاں واٹر کینین بھی پہلے سے موجود ہیں۔
دوسری جانب ملین مارچ کےروٹ پرجناح اسپتال پل کے نیچے ترقیاتی کام بھی جاری ہے اور ریجنٹ پلازہ کےسامنےپل کےنیچے14فٹ تک کھدائی کی جارہی ہے جسے پار کرنے کے لیے پاک سرزمین پارٹی کے کارکنان حکمت عملی طے کر لی ہے۔
واضح رہے پاک سرزمین پارٹی آج نے اپنے 16 نکات کی منظوری کے لیے ملین مارچ کا اعلان کیا تھا جس کے بعد ایف ٹی سی چیئرمین مصطفیٰ کمال کی قیادت میں ملین مارچ وزیراعلیٰ ہاؤس کی جانب رواں دواں ہے۔
کراچی : چیئرمین پاک سرزمین پارٹی مصطفی کمال نے کہا ہے کہ چودہ مئی کراچی کے لوگوں کے لئے بڑا دن ہے، علامہ طالب جوہری سے ملین مارچ کیلئے دعائیں لینے آئے ہیں۔
ان خیالات کا اظہار انہوں نے ممتاز شیعہ عالم دین علامہ طالب جوہری سے ملاقات کے بعد میڈیا سے گفتگو کرتے ہوئے کیا، چیئرمین پی ایس پی نے کہا کہ علامہ طالب جوہری سے کراچی کے بنیادی مسائل پر پیش کیے جانے والے 16 نکات پر تفصیلی بات چیت ہوئی ہے۔
انہوں نے بتایا کہ 14 مئی کو ہونے والے ملین مارچ کے حوالے سے علامہ طالب جوہری سے دعائیں لینے اور انہیں شرکت کی دعوت بھی دی ہے۔
مصطفی کمال کا مزید کہنا تھا ہمارے پیش کے گئے مطالبات پر علامہ طالب جوہری نے ہمارے مؤقف کی تائید کی ہے اور چودہ مئی کو ایف ٹی سی برج سے ملین مارچ کا آغاز کریں گے۔
اس موقع پرعلامہ طالب جوہری نے کہا کہ کراچی کے عوام کو درپیش مسائل کے حل کیلئے پہلی بار کسی سیاسی جماعت نے جدوجہد کا آغاز کیا ہے اور جو بھی کراچی کی بہتری کیلئے کوشش کرے گا ہم اس کا ساتھ دیں گے۔
