Tag: مصطفیٰ عامر قتل کیس

کراچی : مصطفیٰ عامر قتل کیس میں جوڈیشنل مجسٹریٹ نے ایدھی حکام کو خط میں کہا ہے کہ ڈی این اے رپورٹ آنے تک لاش ایدھی سرد خانے میں رہے گی۔

تفصیلات کے مطابق مصطفیٰ عامر قتل کیس میں جوڈیشنل مجسٹریٹ نے ایدھی حکام کو خط لکھ دیا، جس میں کہا ڈی این اے رپورٹ آنے تک لاش ایدھی سرد خانے میں رہے گی۔

خط میں کہا گیا کہ رپورٹ پازیٹو ہوئی تو لاش لواحقین کے حوالے کردی جائے، اگر رپورٹ مثبت نہیں آئی تو دوبارہ سے لاوارث قبرستان میں تدفین کی جائے۔

جوڈیشنل مجسٹریٹ کا کہنا تھا کہ مصطفیٰ عامرکی لاش کو سرد خانے میں محفوظ رکھا جائے۔ مقتول کی لاش سے گیارہ نمونے حاصل کیے گئے، نمونے جامعہ کراچی کی فرانزک لیبارٹری بھجوائے جائیں گے اور تین سے چارروز میں ڈی این اے کی رپورٹ آجائے گی۔

مزید پڑھیں : مصطفیٰ عامر کی قبر کشائی کے دوران کیا ہوا ؟ دل دہلا دینے والے مناظر

رپورٹ آنے تک لاش ایدھی سرد خانے میں رکھی جائے گی ، ڈی این اے رپورٹ آنے کے بعدمصطفیٰ کی لاش اہلخانہ کے حوالے کردی جائے گی۔

خیال رہے مصطفیٰ عامر کی لاش قبر کشائی کے بعد ایدھی سردخانے منتقل کردی گئی، ڈی این کیلئے 11 نمونے حاصل کئے گئے ہیں ، جس سے شناخت ہوسکے گی کہ یہ لاش مصطفی کی ہے یا نہیں۔

کراچی : وزیرداخلہ سندھ ضیا الحسن لنجار کا کہنا ہے کہ مصطفیٰ عامر قتل کیس کیس کے حوالے سے افواہوں اور من گھڑت بیانیے پر کارروائی کی جائے گی۔

تفصیلات کے مطابق مصطفیٰ عامر اغوا اور قتل کیس میں وزیر داخلہ سندھ ضیاالحسن لنجار  نے بیان میں کہا کہ مصطفیٰ عامرجب لاپتہ ہوامیں نےاسی وقت نوٹس لیا تھا اور متعلقہ افسران کوکیس کےجلدسےجلدحل کےاحکامات دیے۔

وزیر داخلہ سندھ کا کہنا تھا کہ ڈی آئی جی سی آئی اےنےکیس کی تفتیش سے متعلق بریفنگ دی، کیس کی تفتیش ودیگرامورمیں غفلت پرکارروائی کی جائے گی۔

انھوں نے کہا کہ کوئی کتنا ہی بااثر کیوں نہ ہو قانون کے مطابق کارروائی ہوگی، کیس اور اس کی تفتیش پر گہری نظر ہے، تفتیش کومیرٹ کے مطابق آگے بڑھایا جائے۔

صوبائی وزیر کا کہنا تھا کہ کیس کے حوالے سے افواہیں اور من گھڑت بیانیے زیر گردش ہیں، اے ٹی سی کے جج کی بے ضابطگیوں پر چیف جسٹس سندھ ہائیکورٹ کو خط ارسال کر رہے ہیں، افواہوں اور من گھڑت بیانیے پر کارروائی کی جائےگی۔

کراچی : مصطفیٰ عامر قتل کیس نے نیا موڑ لے لیا، کیس میں نئی لڑکی انجلینا کا نام سامنے آرہا ہے ، اب انجلینا کون ہے؟ پولیس نے نشاندہی کرلی ہے۔

تفصیلات کے مطابق ثبوت موجود ہونے کے باوجود پولیس کئی روز گزرنے کے بعد بھی مصطفیٰ عامر قتل کیس حل نہ کرسکی ، ارمغان کےگھر لگے کیمروں کی فوٹیج سے کیس حل کرنےمیں مدد مل سکتی ہے۔

ذرائع کا کہنا تھا کہ جس کمرے میں مصطفیٰ عامر کو قتل کیا گیا وہاں بھی سی سی ٹی وی کیمرا موجود ہے تاہم پولیس پر فائرنگ کے دوران ارمغان نے سی سی ٹی وی کیمروں کی ویڈیو ڈیلیٹ کی۔

ذرائع نے کہا کہ سی سی ٹی وی کی فوٹیج ریکور کرکے کیس حل کرنےمیں مدد لی جاسکتی ہے، ارمغان کے گھرپرلگے30سی سی ٹی وی کا ڈی وی آرپولیس کی تحویل میں ہے ، سی سی ٹی وی کیمروں کی فوٹیج کبھی بھی ریکور کی جاسکتی ہے۔

اے آر وائی نیوز کے نمائندے نے پروگرام باخبر سویرا میں کیس کے حوالے سے بتایا کہ نے بتایا مصطفیٰ عامر قتل کیس میں پہلے مارشا شاہد نامی لڑکی کا نام لیا جارہا تھا اب انجیلینا نامی لڑکی کا نام سامنے آیا ہے، کہا جارہا ہے کہ انجیلینا ارمغان اور مصطفیٰ دونوں کی دوست تھی۔

نمائندے کا کہنا تھا کہ واقعے سے ایک دن پہلے ارمغان نے انجلینا کو کسی بات پر بہت مارا اور وہ زخمی ہوگئی ، اس کے بعد وہ ڈیفنس کے ایک اسپتال جاتی ہے اور مصطفیٰ کو فون کرکے بتاتی ہے کہ ارمغان نے مارا ہے اور یہی سے سارا جھگڑا شروع ہوتا ہے۔

نمائندہ اے آر وائی نیوز نے مزید بتایا کہ ارمغان مصطفیٰ کو اپنے پاس بلاتا اور اس پر تشدد کرکے اس کی ویڈیو انجلینا کو بھیجتا ہے کہ کل تم نے جس کو اپنی مدد کے لئے بلایا تھا اس کا یہ حال کیا ہے۔

نمائندے کا کہنا تھا کہ جس کارپٹ سے پولیس نے  مصطفیٰ کے ڈی این اے کے لیے  خون کا سیمپل لیا  ، وہاں سے ایک الگ خون کا سیمپل ملا ہے، اندازہ یہی ہے کہ یہ سیمپل انجلینا کا ہے ، کیونکہ اسے مصطفیٰ کے قتل سے پہلے تشدد کا نشانہ بنایا گیا تھا۔

انھوں نے بتایا کہ ارمغان کے گھر کے ہر کمرے میں کیمرا لگا ہے، اور سی سی ٹی وی کا ریکارڈ پولیس کے پاس ہے تاہم پولیس یہ دعویٰ کررہی ہے کہ ارمغان نے سی سی ٹی وی کا ریکارڈ ڈیلیٹ کردیا ہے  ریکور  کرنے کی کوشش کررہے ہیں۔

کراچی: مصطفیٰ عامرز قتل کیس کے مرکزی ملزم ارمغان کے والد کامران قریشی نے پولیس پر عدم اعتماد کا اظہار کردیا۔

اے آر وائی نیوز کے مطابق مصطفیٰ عامر قتل کیس میں ملزم ارمغان کے والد نے میڈیا سے گفتگو کرتے ہوئے کہا کہ میں پاکستان کا پہلا راک اسٹار ہوں لیکن مجھے پولیس پر اعتماد ہے نہ یہاں کے سسٹم پر اعتبار ہے۔

انہوں نے کہا کہ میرے گھر میں سافٹ ویئر ہاؤس تھا۔

ارمغان کے والد سے سوال کیا گیا کہ آپ کے بیٹے نے پولیس پر فائرنگ کیوں کی؟ جواب میں ان کا کہنا تھا کہ میرے گھر میں ڈاکو گھسیں گے تو کیا فائرنگ نہیں کروں گا۔

انہوں نے کہا کہ میرا بیٹا منشیات استعمال کرتا ہے اس کا علاج کروایا جائے۔

واضح رہے کہ سندھ ہائیکورٹ میں مصطفیٰ عامر کی قبر کشائی کیلئے درخواست دائر کردی گئی ، قبرکشائی کیلئے درخواست پولیس کی جانب سے دائرکی گئی۔

ایس ایس پی انیل حیدر نے بتایا کہ پوسٹ مارٹم اورڈی این اے کیلئےقبرکشائی ضروری ہے تاہم سیشن عدالت جو حکم دےگی عمل درآمد کیا جائے گا۔

واضح رہے کہ 14 فروری کو کراچی کے علاقے ڈیفنس سے 6 جنوری کو لاپتہ ہونے والے مصطفیٰ کی لاش پولیس کو ملی تھی، مصطفیٰ کو اس کے بچپن کے دوستوں نے قتل کرنے کے بعد گاڑی سمیت جلادیا تھا۔

ڈپٹی انسپکٹر جنرل (ڈی آئی جی) سی آئی اے مقدس حیدر نے پریس کانفرنس کرتے ہوئے بتایا تھا کہ مصطفیٰ عامر کو قتل کیا گیا، مصطفیٰ ارمغان کے گھر گیا تھا وہاں لڑائی جھگڑے کے بعد فائرنگ کرکے اس کو قتل کیا گیا۔

انہوں نے کہا کہ مقتول کی لاش کو گاڑی کی ڈگی میں ڈال کر حب لے جایا گیا، لاش کو گاڑی میں جلایا گیا، ملزمان نے لاش کی نشاندہی کی، اب تک کی تحقیقات کے مطابق ارمغان اور شیراز نے گاڑی کو آگ لگائی۔

کراچی: قائم مقام پراسیکیوٹرجنرل سندھ منتظر مہدی نے مصطفیٰ عامر قتل کیس میں اے ٹی سی جج کیخلاف قانون کے مطابق کارروائی کی درخواست دائر کرنے کا اعلان کرتے ہوئے کہا ایک ماں کا بیٹا گیا ہے، ڈی ایس پی زخمی ہوا، ہمیں کاروائی تو کرنے دی جائے۔

تفصیلات کے مطابق قائم مقام پراسیکیوٹرجنرل سندھ منتظرمہدی نے میڈیا سے گفتگو میں مصطفیٰ عامر قتل کیس سے متعلق کہا کہ قانون کےمطابق یہ ہمارا حق ہے کہ ملزم کا ریمانڈ دیا جائے۔

قائم مقام پراسیکیوٹر جنرل سندھ کا کہنا تھا کہ الگ الگ ایف آئی آرز کے باوجود کسی ایک میں بھی ریمانڈ نہیں دیا گیا، ریمانڈ کے بغیر کارروائی کیسے آگے بڑھائیں؟ تحقیقات میں روکاوٹ سے انصاف کیسے ہوگا؟

انھوں نے کہا کہ ہم عدالت سے انصاف مانگنے آئے تھے، ایک ماں کا بیٹا گیا ہے، ڈی ایس پی زخمی ہوا،ہمیں کاروائی تو کرنے دی جائے.

قائم مقام پراسیکیوٹر جنرل کا کہنا تھا کہ عدالت سے درخواست کی تھی کہ مناسب تحقیقات کیلئےکسٹڈی دی جائے ، اے ٹی سی جج کیخلاف قانون کے مطابق کارروائی کی درخواست دائر کریں گے۔

انھوں نے مزید کہا کہ کیس کی سرٹیفائیڈ کاپی کی ہماری درخواست بھی مسترد کردی گئی ہے، قبرکشائی کی درخواست بھی پولیس نے دائرکردی ہے۔