سانگھڑ میں متاثرہ اونٹ کو کراچی منتقل کر دیا گیا ہے جہاں متاثرہ اونٹ کی اینیمل سینچری میں علاج کی سہولت اور اس کی بحالی کا عمل جاری ہے، کوشش کی جا رہی ہے کہ اونٹ کو مصنوعی ٹانگ لگے۔
پاکستان پیپلز پارٹی کی مرکزی ترجمان اور سانگھڑ سے رکن قومی اسمبلی شازیہ مری نے اپنے بیان میں بتایا کہ اونٹ کو مصنوعی ٹانگ لگانے کے لیے ہم مختلف کمپنیوں سے رابطے میں ہیں، اور انھیں متاثرہ اونٹ کی مصنوعی ٹانگ بنانے کا ٹارگٹ دیا گیا ہے۔
ان کا مزید کہنا تھا کہ اونٹ اب محفوظ ہاتھوں میں ہے، اس کی زندگی بچانا ایک مشترکہ کوشش تھی، اس افسوس ناک واقعے کی خبر سنی تو بے انتہا دکھ ہوا اور انتظامیہ کو فوری اقدامات کرنے کی ہدایت کی، اونٹ کی دیکھ بھال کی گئی اور اس کو حفاظت میں لایا گیا۔
اونٹ کے بعد گدھے کی ٹانگ بھی کاٹ دی گئی، ملزم گرفتار
انھوں نے کہا کسی بے زبان کے ساتھ اس قسم کا وحشیانہ سلوک قابلِ مذمت ہے، اس وحشیانہ واقعے میں ملوث عناصر کو سخت سے سخت سزا ملنی چاہیے تاکہ دوبارہ کوئی ایسی جرم کا مرتکب نہ ہو۔
سینیٹر قرۃ العین مری نے سوشل میڈیا ایکس پر لکھا کہ ہم نے ڈاکٹروں کی ٹیم کو بلوایا اور سی ڈی آر ایس سے فوری رجوع کیا، جنھوں نے اونٹ کو حفاظت میں لیا اور دیکھ بھال شروع کی، اگر وہ اس کی دیکھ بھال نہ کرتے تو شاید اونٹ ہمارے ساتھ نہ ہوتا۔
سینیٹر قرۃ العین مری کا مزید کہنا تھا کہ پاکستان میں بے زبان جانوروں کے ساتھ ہونے والے ہر ظلم پر آواز اٹھانی ہوگی، سانگھڑ میں تو اس زبان کو مدد مل گئی مگر افسوس کہ اور کئی جگہوں پہ یہ ظلم جاری ہے، ان کا کہنا تھا کہ کھیتوں میں سے لے کے جانے سے لے کر ٹارچ کی روشنی میں اس کے زخم کا علاج کرنے تک ہر وہ شخص جس نے اونٹ کی مدد کی وہ ہیرو ہے۔
