کراچی : ہوٹل میں مبینہ طور پر مضرصحت کھانا کھانے سے جاں بحق ہونے والے 5 بچوں کی پھوپھو اسپتال میں دوران علاج چل بسیں ، بچوں کی نمازجنازہ کچھ دیربعدپشین میں ادا کی جائے گی۔
تفصیلات کے مطابق کراچی کے ہوٹل میں مبینہ طور پر مضرصحت کھاناکھانے سے 5بچوں کی موت کے بعد پھوپھو بھی اسپتال میں دوران علاج چل بسیں، اٹھائیس سالہ بینا نے بھی ریسٹورنٹ کی مضر صحت بریانی کھائی تھی، میت کوآبائی گاؤں روانہ کردیاگیا ہے۔
گزشتہ روز کراچی کے نجی ریسٹورینٹ کے مبینہ مضرِصحت کھانا کھانے سے پانچ بچے دم توڑگئے تھے جبکہ بچوں کی پھوپھوبینا کو تشویشناک حالت میں اسپتال منتقل کیا گیا تھا۔
اسپتال انتظامیہ کےمطابق اٹھائیس سالہ بینا کو رات گئے حالت بگڑنے پر آئی سی یو سے وینٹی لیٹرپر شفٹ کیا گیا تھا تاہم وہ جانبر نہ ہوسکی اور انتقال کر گئیں، لواحقین نے بینا کا پوسٹ مارٹم کرانے سے انکار کردیا تھا۔
پانچوں بچوں کی نمازہ جنازہ آج ادا کی جائے گی
دوسری جانب پانچوں بچوں کی نمازہ جنازہ 11بجے آج آبائی علاقے خانوزئی میں ادا کی جائے گی اور تدفین مقامی قبرستان میں ہوگی، جنازے میں شرکت کےلیےلوگوں کی آمد کا سللسہ جاری ہے۔
تحقیقات جاری ہیں فی الوقت اس حوالےسےکچھ نہیں کہہ سکتا ، والد فیصل اخوانزادہ
والد فیصل اخوانزادہ کا کہنا ہے کہ سندھ حکومت کاشکریہ جنہوں نےبےحدتعاون کیا، تحقیقات جاری ہیں فی الوقت اس حوالےسےکچھ نہیں کہہ سکتا، کل رات10:30 بجے کراچی پہنچے ہوٹل سےکھانامنگواکرکھایا، رات12بجےبچوں کی حالت اچانک خراب ہوئی، کوئی سیاسی بیان نہیں دیناچاہتا۔
یاد رہے گزشتہ روز پشین سے آئے اخوندزادہ فیصل زمان کی فیملی کے ساتھ فوڈپوائزنگ کا واقعہ پیش آیا، جنہوں نے صدر کےایک ہوٹل سے بریانی کھائی، بریانی کھانے کے بعد فیصل زمان کی اہلیہ کی طبیعت بگڑگئی، وہ انہیں لےکراسپتال پہنچے تو پیچھے سے بچوں کی موت کی خبرآگئی۔
جاں بحق بچوں میں ڈیڑھ سال کاعبدالعلی چار سال کا عزیز چھے سال کی عالیہ، سات سال کا توحید اور نو سال کی صلویٰ شامل ہے، فیصل زمان کے پانچ ہی بچے تھے۔
پولیس اور فوڈ اتھارٹی کی ٹیم نے نوبہارریسٹورنٹ اور قصرناز گیسٹ ہاؤس سے بریانی دودھ اور دیگر کھانے کی چیزوں کے سیمپل اکٹھے کرلیے اور ہوٹل سیل کرکے 18 ملازمین کوحراست میں لیا تھا ، جن سے تحقیقات کی جارہی ہے۔
ڈی جی فوڈ اتھارٹی کا کہنا ہے کہ قصر ناز کے کمرے کے فرش پرکیڑےمارپاوڈرپایاگیا، نو بہار ریسٹورنٹ سے 20 سیمپل حاصل کیے جبکہ کیفے اسٹوڈنٹ بریانی سے 7، قصرناز سے 6 سیمپل لیےگئے،گندگی کے باعث قصر ناز کا کچن سیل کر دیاگیا، کیڑے مار پاوڈر کی وجہ سےگودام بھی سیل کردیاگیا اور تمام نمونے ایس جی ایس لیبارٹری بھیج دیےگئے ہیں۔
