پاکستان کو مطلوب دو خطرناک ملزمان کو اسپین میں گرفتار کر لیا گیا ہے وہ دہشتگردی قتل سمیت دیگر سنگین مقدمات میں مطلوب تھے۔
ترجمان وزارت داخلہ کی جانب سے جاری بیان میں کہا گیا ہے کہ پاکستان کو مطلوب 2 خطرناک ملزمان اسپین میں گرفتار کر لیے گئے ہیں۔ گرفتار ملزم نوازش علی اور ہارون دہشتگردی، قتل سمیت دیگر مقدمات میں مطلوب تھے۔
ترجمان کے مطابق وزیر مملکت برائے داخلہ طلال چوہدری نے حال ہی میں اسپین کا دورہ کیا تھا اور وہاں ہسپانوی وزیر داخلہ سے پاکستان کو مطلوب ملزمان کی گرفتاری پر بات کی تھی۔
بیان میں مزید کہا گیا ہے کہ ہسپانوی وزیر داخلہ اس معاملے پر فوری ایکشن لیتے ہوئے متعلقہ حکام کو گرفتاری کے احکامات دیے، جس کے بعد یہ گرفتاری عمل میں لائی گئی۔
پاکستان کو مطلوب دو خطرناک ملزمان کی گرفتاری پر وزیر مملکت برائے داخلہ طلال چوہدری نے ہسپانوی حکومت کا شکریہ ادا کیا ہے اور امید ظاہر کی ہے کہ اسپین میں مفرور دیگر ملزمان بھی جلد پاکستان کے حوالے کیے جائیں گے۔
وزارت داخلہ کا کہنا ہے کہ پاکستان نے اسپین سے 38 مطلوب ملزمان کی گرفتاری اور حوالگی کا مطالبہ کیا ہوا ہے۔
https://urdu.arynews.tv/20-billion-online-fraud-2-suspects-arrested/
