پشاور : وزیراعلیٰ خیبر پختونخوامحمودخان نے ٹائیگر زفورس ڈے کے موقع پر 5 لاکھ درخت لگانےکی ذمہ داری لے لی جبکہ عثمان ڈار نے کہا کہ وزیراعظم کی قیادت میں ریکارڈ شجر کاری مہم کی جائے گی۔
تفصیلات کے مطابق ٹائیگر زفورس ڈے منانےکی تیاریوں میں تیزی آگئی ، وزیراعظم عمران خان کے خطاب کے بعد صوبائی حکومتیں بھی متحرک ہوگئیں۔
وزیراعلیٰ خیبر پختونخوامحمودخان اورمعاون خصوصی عثمان ڈار کی ملاقات ہوئی ، ملاقات میں چیف سیکرٹری خیبرپختونخوا کاظم نیاز بھی شریک تھے۔
ملاقات کے دوران 9اگست کوٹائیگرزفورس ڈے منانے اور شجرکاری مہم پر تبادلہ خیال کیا گیا، وزیراعلیٰ محمودخان نے 5 لاکھ درخت لگانےکی ذمہ داری لے لی اور کہا ٹائیگرزفورس رضاکاروں کےساتھ ملکر5لاکھ درخت لگائیں گے۔
محمودخان کا کہنا تھا کہ پختونخواہ حکومت ایک ارب درخت لگانےکاسنگ میل عبورکر چکی ہے۔
معاون خصوصی عثمان ڈار نے کہا کہ 9اگست کوبڑے پیمانے پر شجر کاری مہم شروع کر رہے ہیں، وزیراعظم کی قیادت میں ریکارڈ شجر کاری مہم کی جائے گی، ایک دن میں سب سے زیادہ 10 لاکھ پودے لگائے جائیں گے۔
عثمان ڈار کا کہنا تھا کہ وزیراعظم براہ راست معاملات کی نگرانی کررہےہیں، صوبائیت اورسیاست سےبالاترہوکرنوجوان قومی مہم میں حصہ لیں، وزیراعظم خودرضا کاروں کےساتھ ملکرمہم میں شریک ہوں گے۔
