Tag: معاون خصوصی

اسلام آباد: وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ دنیا کا کشمیر کے المیے سے لاتعلق رہنا مجرمانہ غفلت ہوگی، تحریک انصاف میں کشمیر میڈیا سیل قائم کرنے جا رہے ہیں۔

تفصیلات کے مطابق وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ گلے سڑے نظام سے نجات حاصل کرنے کے لیے ایک سال کم ہے، تحریک انصاف کے اصلاحاتی ایجنڈے پر ایک سال میں پیشرفت ہوئی۔

فردوس عاشق اعوان کا کہنا تھا کہ عوام کے راستے میں آنے والی رکاوٹیں ہٹائی گئیں، اسٹیٹس کو کی اس سوچ کو وزیر اعظم عمران خان نے ختم کیا۔ مقبوضہ جموں و کشمیر میں مودی سرکار ظلم کی داستان رقم کر رہی ہے، وزیر اعظم مقبوضہ جموں و کشمیر کے مقامی اور عالمی نقطہ نظر پر قوم کو اعتماد میں لیں گے۔

انہوں نے کہا کہ مقبوضہ کشمیر کی آواز دنیا بھر میں گونج رہی ہے اور دنیا سن رہی ہے، آج دنیا کے ضمیر کو جھنجوڑنے کی ضرورت ہے۔ دنیا اپنے معاشی اور مالی معاملات کے لیے سر جوڑ کر بیٹھی ہے۔ دنیا مودی کو مقبوضہ کشمیر میں ظالمانہ اقدام سے روکے۔ اقوام متحدہ میں مقبوضہ کشمیر پر کردار نظر آنا چاہیئے۔

معاون خصوصی کا کہنا تھا کہ مسئلہ کشمیر عالمی معاملہ بن چکا ہے، اس سے لا تعلق نہیں رہا جا سکتا۔ آزاد کشمیر میں تحریک انصاف کا ڈھانچہ بننے جا رہا ہے۔ ہم نے طے کیا ہے کہ ہر ڈسٹرکٹ میں پارٹی کو متحرک کیا جائے گا۔

انہوں نے کہا کہ کشمیری بڑی حسرت سے دنیا کی طرف دیکھ رہے ہیں، کشمیریوں کو ریاستی تشدد اور ذرائع مواصلات پر پابندی کا سامنا ہے۔ ہو سکتا ہے مظالم میں مودی کا نام ہٹلر سے آگے نکل جائے، دنیا کا کشمیر کے المیے سے لاتعلق رہنا مجرمانہ غفلت ہوگی۔

معاون خصوصی کا مزید کہنا تھا کہ مقبوضہ کشمیر میں جیسے انسانیت کی توہین ہو رہی ہے، آواز اٹھانے پر کشمیریوں کو غائب کر کے وادی سے باہر رکھا جا رہا ہے۔ حریت رہنماؤں سے بھارتی ظلم کی مذمت کرتے ہیں۔ تحریک انصاف میں کشمیر میڈیا سیل قائم کرنے جا رہے ہیں۔ مقبوضہ کشمیر پر قومی اور عالمی سطح کی معلومات کو شیئر کیا جائے گا۔

اسلام آباد: وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ کشمیر اور پاکستان دونوں لازم و ملزوم ہیں، بھارت کا دہشت گرد چہرہ دنیا بھر کے سامنے آچکا ہے۔

تفصیلات کے مطابق وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا تھا کہ عمران خان قائد اعظم کے سپاہی بن کر سامراجی نظام کے خلاف لڑ رہے ہیں، سامراجی نظام کو ختم کرنا ہی عمران خان کی حکومت کی فتح ہے۔ نظام میں موجود کرپٹ عناصر کو 5 سال میں شکست دیں گے۔

فردوس عاشق اعوان کا کہنا تھا کہ وزیر اعظم نظریات اور ایمان کی طاقت سے پاکستان کو بدلیں گے، پنجاب میں نئی حکومت کو ڈیفالٹ بجٹ ملا۔ گزشتہ 10 سال میں پنجاب کا بجٹ خسارے میں چلایا گیا۔ گزشتہ حکومت گڑھے کھود گئی تھی۔ گزشتہ حکومت موجودہ حکومت کے لیے خسارے پر مبنی بجٹ چھوڑ گئی تھی۔ گزشتہ حکومت کے چھوڑے گڑھوں سے نکلنے کی حکمت عملی بنائی۔

انہوں نے کہا کہ وزیر اعظم عمران خان نے کفایت شعاری مہم کا آغاز کیا، بہتری کے لیے ترجیحات بدل کر نئی حکمت عملی طے کی گئی۔ وزیر اعظم عمران خان معاشی چیلنجز پر قابو پانے کے لیے کوشاں ہیں۔ جب قیادت کرپٹ ہو تو گھر گھر میں ڈاکو ہی پیدا ہوں گے۔ عمران خان جو ریفارم لے کر آئے 72 سالوں میں بھی ایسا نہیں کیا گیا۔

معاون خصوصی کا کہنا تھا کہ کشمیر اور پاکستان دونوں لازم و ملزوم ہیں، مودی نے مقبوضہ کشمیر کو جیل میں تبدیل کر دیا ہے۔ بھارت کا دہشت گرد چہرہ دنیا بھر کے سامنے آچکا ہے۔ مودی کا اقدام جمہوریت اور بین الاقوامی قوانین پر حملہ ہے۔ یوم پاکستان یوم یکجہتی کشمیر کے طور پر منائیں گے، ہم کشمیریوں کے لیے فرسٹ لائن آف ڈیفنس ہیں۔

انہوں نے کہا کہ مقبوضہ کشمیر کے زمینی اور مواصلاتی رابطے منقطع ہیں، کاروباری طبقے نے ہمیشہ کشمیریوں کے ساتھ اظہار یکجہتی کیا۔ پاکستان میں 14 اگست کو قومی جھنڈے کے ساتھ کشمیر کا جھنڈا بھی لہرایا جائے گا۔ چین نے کشمیریوں کے بیانیے کو درست کہا اور بھارت کی مخالفت کی۔

معاون خصوصی کا کہنا تھا کہ قوم مشکل فیصلے کرنے میں حکومت کے ساتھ کھڑی ہو، بھارت کے غیر قانونی اقدام کے خلاف سلامتی کونسل میں جا رہے ہیں۔ مودی نئے دور کا نیا ہٹلر ہے۔ 15 اگست یوم سیاہ کے طور پر منا رہے ہیں، کالے پرچم لہرائیں گے۔ 14 اگست کو ریلیاں نکال کر کشمیریوں سے اظہار یکجہتی کریں گے۔ پاکستان کشمیریوں کا مقدمہ دنیا کے سامنے رکھے گا، کشمیر پر حملہ اور ناانصافی پاکستان پر حملے کے مترادف ہے۔

اسلام آباد: وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ پاکستان کا بچہ بچہ کشمیر کے لیے کٹ مرنے کو تیار ہے، بھارت زیادہ عرصہ کشمیر کو یرغمال نہیں رکھ سکتا۔

تفصیلات کے مطابق وزیر اعظم کی معاون خصوصی برائے اطلاعات فردوس عاشق اعوان کا کہنا ہے کہ بھارت زیادہ عرصہ کشمیر کو یرغمال نہیں رکھ سکتا، کشمیریوں کو کوئی بھارتی فیصلہ منظور نہیں۔

فردوس عاشق اعوان کا کہنا تھا کہ بھارت نے کشمیریوں کو دبانے کے لیے لاکھوں بندوقوں کے نیچے رکھا ہوا ہے، پاکستان کا بچہ بچہ کشمیر کے لیے کٹ مرنے کو تیار ہے۔ پاکستان کشمیریوں کو اپنے وجود کا حصہ سمجھتا ہے۔

انہوں نے کہا کہ بھارت مقبوضہ کشمیر میں جنگ ہار چکا ہے۔ کل کا بہت اہم سیشن تھا اسے سیاست کی نذر کر کے پروڈکشن آڈر طلب کیا گیا، کشمیر میں ذرائع ابلاغ کے اداروں کو بند کر دیا گیا ہے، پوری دنیا کی نظریں پاکستان میں ایوان پر ہیں۔

یاد رہے کہ 5 اگست کو بھارتی وزیر داخلہ امیت شاہ نے آرٹیکل 370 ختم کرنے کا بل بھارتی پارلیمنٹ میں پیش کیا تھا۔ بل کی تجاویز کے تحت غیر مقامی افراد مقبوضہ کشمیر میں سرکاری نوکریاں حاصل کرسکیں گے اور 370 ختم ہونے سے مقبوضہ کشمیرکی خصوصی حیثیت بھی ختم ہوجائے گی۔

بعد ازاں بھارتی صدر نے آرٹیکل 370 ختم کرنے کے بل پر دستخط کر دیے اور گورنر کا عہدہ ختم کر کے اختیارات کونسل آف منسٹرز کو دے دیے۔