ARYNews.tv | Urdu – Har Lamha Bakhabar

Tag: معاون خصوصی

  • نانا کی لاش پر بیٹھے نواسے کی تصویر عالمی ضمیر پر دھبہ ہے: شہزاد اکبر

    نانا کی لاش پر بیٹھے نواسے کی تصویر عالمی ضمیر پر دھبہ ہے: شہزاد اکبر

    اسلام آباد: وزیر اعظم کے معاون خصوصی برائے احتساب شہزاد اکبر کا کہنا ہے کہ نانا کی لاش پر بیٹھے نواسے کی تصویر عالمی ضمیر اور سلامتی کونسل پر دھبہ ہے۔

    تفصیلات کے مطابق وزیر اعظم عمران خان کے معاون خصوصی برائے احتساب شہزاد اکبر نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ انسانیت کے خلاف بھارت کی جارحیت جاری ہے۔

    شہزاد اکبر کا کہنا تھا کہ عالمی رہنما بھارتی جارحیت کے خلاف ایک لفظ نہیں بول رہے، نانا کی لاش پر بیٹھے نواسے کی تصویر عالمی ضمیر اور سلامتی کونسل پر دھبہ ہے۔

    خیال رہے کہ گزشتہ روز مقبوضہ کشمیر کے 3 سالہ عیاد کی تصویر سوشل میڈیا پر وائرل ہوئی تھی جس میں وہ اپنے نانا کے مردہ جسم کے قریب بیٹھا تھا۔

    کشمیری بزرگ بھارتی فورسز کے بارہ مولا میں نام نہاد آپریشن کی آڑ میں اندھا دھند فائرنگ سے شہید ہوگئے تھے جو اپنے 3 سالہ نواسے کے ساتھ جارہے تھے۔

    قابض بھارتی فورسز 2 ہفتے میں 37 سے زائد کشمیریوں کو شہید کر چکی ہیں جبکہ بھارتی فورسز گھر گھر تلاشی کے دوران خواتین کو ہراساں کرنے اور نوجوانوں کو بلا جواز گرفتار کرنے کا سلسلہ جاری رکھے ہوئے ہے۔

  • عمر کوٹ میں احساس لنگر خانے کا آغاز

    عمر کوٹ میں احساس لنگر خانے کا آغاز

    اسلام آباد: وزیر اعظم کی معاون خصوصی ڈاکٹر ثانیہ نشتر کا کہنا ہے کہ سندھ کے ضلع عمر کوٹ میں احساس لنگر خانے کا آغاز ہوگیا، لنگر خانے میں روزانہ 300 افراد کو کھانا مفت ملے گا۔

    تفصیلات کے مطابق وزیر اعظم عمران خان کی معاون خصوصی ڈاکٹر ثانیہ نشتر نے سماجی رابطے کی ویب سائٹ ٹویٹر پر اپنے ٹویٹ میں کہا کہ احساس ایمرجنسی کیش مراکز ایک دن کے لیے ملک بھر میں بند رہیں گے۔

    ثانیہ نشتر کا کہنا تھا کہ احساس کیش مراکز بینکوں کی سالانہ چھٹی کی وجہ سے بند رہیں گے۔

    اپنے ایک اور ٹویٹ میں انہوں نے کہا کہ سندھ کے ضلع عمر کوٹ میں احساس لنگر خانے کا آغاز ہوگیا، لنگر خانے میں روزانہ 300 افراد کو کھانا مفت ملے گا۔

    ثانیہ نشتر کا کہنا تھا کہ گورنر سندھ عمران اسماعیل نے لنگر خانے کا افتتاح کیا۔

    خیال رہے کہ احساس ایمرجنسی کیش پروگرام کے تحت اب تک 1 کروڑ 20 لاکھ صارفین کی معاونت کا ہدف مکمل کر لیا گیا ہے، حکومت نے صارفین کی ضرورت کے مدنظر ہدف میں اضافہ کرتے ہوئے 1 کروڑ 61 لاکھ 63 ہزار کا نیا ہدف مقرر کر دیا۔

    کیش پروگرام کے تحت ملک بھر میں اب تک مجموعی طور پر 145 ارب 29 کروڑ کی امدادی رقم تقسیم کی جا چکی ہے۔

  • وزیراعظم عمران خان سے معاون خصوصی عثمان ڈار کی ملاقات

    وزیراعظم عمران خان سے معاون خصوصی عثمان ڈار کی ملاقات

    اسلام آباد: وزیراعظم عمران خان نے کہا ہے کہ نوجوان ملک کا اثاثہ ہیں انہیں قومی خدمت کا بھرپور موقع دیا جائے۔

    تفصیلات کے مطابق وزیراعظم عمران خان سے معاون خصوصی عثمان ڈار نے ملاقات کی جس میں وزیراعظم کو ٹائیگرز فورس کے موثر استعمال کے لیے ڈیجیٹل ٹیکنالوجی پر بریفنگ دی گئی۔

    وزیراعظم نے ڈیجیٹل ٹیکنالوجی سے ٹائیگرز فورس کی ذمہ داریوں کے طریقہ کار پر اظہار اطمینان کرتے ہوئے ٹائیگرز فورس کی ایپلیکشن لانچ کرنےکی منظوری دے دی۔

    وزیراعظم پاکستان نے جیو ٹیگنگ پر مشتمل موبائل ایپلی کیشن ملک بھر میں لانچ کرنے کی ہدایت دیتے ہوئے کہا کہ نوجوان رضا کاروں کو بہترین سہولت اور آسانیاں فراہم کی جائیں،نوجوان ملک کا اثاثہ ہیں انہیں قومی خدمت کا بھرپور موقع دیا جائے۔انہوں نے مزید کہا کہ ایس او پیز کی خلاف ورزی کی نشاندہی،موقع پر کارروائی ضروری ہے۔

    خیال رہے کہ وزیراعظم عمران خان خود آئندہ ہفتے ملک گیر سطح پر ایپ لانچ کریں گے۔

    اس سے قبل عثمان ڈار کا کہنا تھا کہ ڈیجیٹل ٹیکنالوجی سے ٹائیگرزفورس کی ذمہ داریوں کو مانیٹر کیا جائے گا۔معاون خصوصی کا کہنا تھا کہ اسسٹنٹ کمشنرز،ایس ایچ او ،پرائس کنٹرول مجسٹریٹ ایپ سےمنسلک ہوں گے۔

  • زلفی بخاری ایشیا کے خوش لباس مردوں کی فہرست میں شامل

    زلفی بخاری ایشیا کے خوش لباس مردوں کی فہرست میں شامل

    اسلام آباد: وزیر اعظم عمران خان کے معاون خصوصی برائے امور اوور سیز پاکستانی زلفی بخاری جنوبی ایشیا کے 5 بہترین خوش لباس مردوں کی فہرست میں شامل ہوگئے۔

    تفصیلات کے مطابق ایشین اسٹائل میگزین نے 5 بہترین خوش لباس مردوں کی فہرست جاری کر دی، فہرست میں وزیر اعظم عمران خان کے معاون خصوصی برائے امور اوور سیز پاکستانی زلفی بخاری بھی شامل ہیں۔

    فہرست میں معروف پاکستانی اداکار فواد خان بھی موجود ہیں جبکہ بھارت سے اسٹار کرکٹر ویرات کوہلی اور بالی ووڈ اسٹار رنویر سنگھ شامل ہیں۔

    میگزین کے مطابق زلفی بخاری نے مشرقی و مغربی لباس کے پہناووں کو خوبصورتی سے استعمال کیا، انہوں نے اٹالین سوٹس اور روایتی لباس کے کمبی نیشن کو بھی استعمال کیا۔

    میگزین نے کہا کہ زلفی بخاری کی بدولت پاکستانی سیاستدانوں کا نیا رخ دیکھنے کو ملا کہ سب ایک جیسا لباس نہیں پہنتے، زلفی بخاری فیشن اسٹائل سے نوجوانوں کے لیے آئیکون بنتے جا رہے ہیں۔

  • چند ہفتے بعد کرونا کیسز میں کمی آئے گی: ظفر مرزا

    چند ہفتے بعد کرونا کیسز میں کمی آئے گی: ظفر مرزا

    اسلام آباد: وزیر اعظم عمران خان کے معاون خصوصی برائے صحت ظفر مرزا کا کہنا ہے کہ زندگی اور روزگار دونوں بچانے کی حکمت عملی پر عمل پیرا ہیں، چند ہفتے بعد کرونا کیسز میں کمی آئے گی، اگر حالات خراب ہوئے تو لاک ڈاؤن کا فیصلہ کیا جا سکتا ہے۔

    تفصیلات کے مطابق عالمی ادارہ صحت کے خط کے حوالے سے وزیر اعظم کے معاون خصوصی برائے صحت ظفر مرزا کا کہنا ہے کہ کرونا وائرس کے مقابلے کے لیے حکومت جامع حکمت عملی پر عمل پیرا ہے، این سی او سی میں روز صورتحال کا جائزہ لیا جاتا ہے، صوبوں کے ساتھ مل کر فیصلہ سازی کی جاتی ہے۔

    ظفر مرزا کا کہنا تھا کہ وزیر اعظم کی قیادت میں فیصلے باہمی مشاورت ہوتے ہیں، ہم معیشت کے لحاظ سے کم اور اوسط آمدن والے ممالک میں آتے ہیں۔ کرونا صورتحال پر عوام کے بہترین مفاد میں فیصلے کیے جاتے ہیں، زندگی اور روزگار دونوں بچانے کی حکمت عملی پر عمل پیرا ہیں۔

    انہوں نے کہا کہ ہم نے دانستہ طور پر ملک میں آہستہ آہستہ لاک ڈاؤن میں نرمی کی، دکانوں، مساجد، مارکیٹوں اور پبلک ٹرانسپورٹ میں ایس او پیز پر زور دیا۔ ماسک پہننے کو پورے ملک میں لازمی قرار دیا گیا۔

    ظفر مرزا کا کہنا تھا کہ ہم نے انتہائی فعال ٹریسنگ ٹیسٹنگ کورنٹائن پالیسی متعارف کروائی، پالیسی سے وائرس کے پھیلاؤ والے علاقوں کی نشاندہی ہو رہی ہے۔ اسمارٹ لاک ڈاؤن کے 700 مختلف مقامات موجود ہیں۔

    انہوں نے کہا کہ ہماری حکمت عملی کا ایک پہلو صحت کے نظام کو بہتر بنانا ہے، پالیسیاں، تجزیات اور معاشی حالات مد نظر رکھتے ہوئے بنائی جاتی ہیں۔ عالمی ادارہ صحت اقوام متحدہ کے صحت عامہ کا تکنیکی ادارہ ہے۔ صحت پر اور موجودہ وبا کی روک تھام پر مل کر کام کر رہے ہیں، ادارے کے کام کے معترف ہیں۔

    معاون خصوصی کا مزید کہنا تھا کہ چند ہفتے بعد کرونا کیسز میں کمی آئے گی، اگر حالات خراب ہوئے تو لاک ڈاؤن کا فیصلہ کیا جا سکتا ہے۔

  • مساجد میں ٹائیگر فورس کے3 جوان پولیس کے ساتھ ڈیوٹی دیں گے، عثمان ڈار

    مساجد میں ٹائیگر فورس کے3 جوان پولیس کے ساتھ ڈیوٹی دیں گے، عثمان ڈار

    سیالکوٹ: معاون خصوصی عثمان ڈار کا کہنا ہے کہ ضلع میں3 ہزار مساجدمیں ٹائیگر فورس کے 2 سے 3 جوان پولیس کے ساتھ ڈیوٹی دیں گے۔

    تفصیلات کے مطابق سیالکوٹ میں میڈیا سے گفتگو کرتے ہوئے معاون خصوصی عثمان ڈار نے کہا کہ کرونا ریلیف ٹائیگر فورس کے لیے ملک بھر سے 10 لاکھ افراد نےحصہ لیا،سیالکوٹ میں 20 ہزار سے زائد افراد ٹائیگر فورس کاحصہ بنے ہیں۔

    عثمان ڈار کا کہنا تھا کہ مخیرحضرات سے جمع رقم میں سے 40 ہزار خاندانوں کو 5 ہزار فی کس ملیں گے،مخیر حضرات نے اب تک 7کروڑ سے زائد رقم کرونا ریلیف فنڈ میں جمع کرائی۔

    انہوں نے کہا کہ ٹائیگر فورس کے لیے میکنزم بنایاگیا ہے، ہر اس جگہ جاؤں گا جہاں غریب کی فلاح وبہبود کے لیے پیسے مل رہے ہوں گے، ضلع میں3 ہزار مساجد میں ٹائیگر فورس کے 2 سے 3 جوان پولیس کے ساتھ ڈیوٹی دیں گے۔

    معاون خصوصی کا کہنا تھا کہ سندھ میں پہلے روز سے ٹائیگر فورس کو تنقید کا نشانہ بنایا جا رہا ہے۔انہوں نے مزید کہا کہ نادرا کے فراہم کردہ ڈیٹا کے مطابق غریب خاندانوں میں رقم کی منتقلی کی جائے گی،نوجوان قومی جذبے کے تحت ملک وقوم کی خدمت کے لیے آگے آ رہے ہیں۔

  • گزشتہ 24 گھنٹوں میں ایک ہزار سے زائد مریض سامنے آئے: ظفر مرزا

    گزشتہ 24 گھنٹوں میں ایک ہزار سے زائد مریض سامنے آئے: ظفر مرزا

    اسلام آباد: معاون خصوصی برائے صحت ظفر مرزا کا کہنا ہے کہ گزشتہ 24 گھنٹوں میں کرونا وائرس کے 1 ہزار 297 مریضوں کا اضافہ ہوا ہے، اب تک 4 ہزار 715 افراد مکمل صحتیاب ہو چکے ہیں۔

    تفصیلات کے مطابق وزیر اعظم کے معاون خصوصی برائے صحت ظفر مرزا کا کہنا ہے کہ اسمارٹ لاک ڈاؤن ایس او پیز پر عمل کر کے ہی کیا جا سکتا ہے، وفاقی حکومت اور صوبائی حکومتوں کی ہدایات پر عمل کریں، ہدایات پر عمل نہ کرنے سے متوقع نتائج حاصل نہیں کر سکتے۔

    ظفر مرزا کا کہنا تھا کہ ہم نے اپنی ویب سائٹ پر تمام ایس او پیز رکھے ہیں، ایس او پی اب اردو میں بھی فراہم ہو رہے ہیں۔ جہاں احتیاط کی ضرورت ہے اس کے لیے ہدایات جاری کی جا چکی ہیں۔

    انہوں نے کہا کہ ہم وفاقی سطح پر 31 ایس او پیز جاری کر چکے ہیں، ہم نے نمازوں اور تراویح کے حوالے سے بھی ایس او پی جاری کیے، باہر کا سفر کرنے یا متاثرہ لوگوں سے ملنے پر خود کو قرنطینہ کریں۔ گھر پر قرنطینہ کے لیے ایس او پی موجود ہے۔

    ظفر مرزا کا کہنا تھا کہ کرونا وائرس میں شدت نہ ہونے پر بھی خود کو قرنطینہ کیا جا سکتا ہے، اس حوالے سے ایس او پی جاری کیے ہیں۔ مختلف سطحوں پر صفائی کے حوالے سے ایس او پی جاری کیے ہیں۔

    انہوں نے کہا کہ متاثرہ افراد کے جاں بحق ہونے پر بھی تدفین کے ایس او پی دیے ہیں، کرونا کے حوالے سے اسپتالوں کی درجہ بندی کی اور ایس او پی جاری کیے۔ سماجی فاصلوں سے متعلق بھی ایس او پی بنائے ہیں۔

    معاون خصوصی کا مزید کہنا تھا کہ ترجیحی بنیادوں پر ٹیسٹ کے لیے، ضروری اشیا والی دکانوں کے لیے، ضروری صنعتوں کو کھولنے سے متعلق، کرونا سے متاثرہ افراد کی دیکھ بھال سے متعلق اور تعمیراتی کاموں سے متعلق بھی ایس او پیز بنائے ہیں۔

    انہوں نے بتایا کہ پاکستان میں اب تک مصدقہ کیس 18 ہزار 114 ہیں، 1 ہزار 297 مریضوں کا اضافہ 24 گھنٹے میں ہوا ہے۔ سب سے زیادہ 9 ہزار 164 ٹیسٹ گزشتہ 24 گھنٹے میں ہوئے۔

    معاون خصوصی کا کہنا تھا کہ گزشتہ 24 گھنٹوں میں 1 ہزار 297 مریضوں کا اضافہ ہوا ہے، اس عرصے کے دوران یہ کرونا کیسز کا سب سے زیادہ اضافہ ہے، 24 گھنٹے میں سندھ میں 622 اور پنجاب میں 393 کیسز رپورٹ ہوئے۔ اب تک پاکستان میں 4 ہزار 715 افراد مکمل صحتیاب ہو چکے ہیں۔

  • احساس ایمرجنسی کیش پروگرام میں شفافیت ہماری اولین ترجیح ہے: ثانیہ نشتر

    احساس ایمرجنسی کیش پروگرام میں شفافیت ہماری اولین ترجیح ہے: ثانیہ نشتر

    اسلام آباد: وزیر اعظم عمران خان کی معاون خصوصی ثانیہ نشتر کا کہنا ہے کہ احساس ایمرجنسی کیش پروگرام میں سیاسی مداخلت اور اقربا پروری کا کوئی راستہ نہیں ہے، سماجی تحفظ کے اس پروگرام میں شفافیت ہماری اولین ترجیح ہے۔

    تفصیلات کے مطابق وزیر اعظم عمران خان کی معاون خصوصی ثانیہ نشتر نے احساس ایمرجنسی کیش انفارمیشن پورٹل کے اسکرین شاٹس پوسٹ کرتے ہوئے کہا کہ یہ شفافیت کے پیش نظر شائع کی جارہی ہیں۔

    اپنے ٹویٹ میں انہوں نے کہا کہ 8171 اسکیم میں کیٹگری 1 اور 2 کی امداد 2010 کے سروے پر دی جا رہی ہے، 2010 میں شمالی اور جنوبی وزیرستان میں امن عامہ نہ ہونے کی وجہ سے سروے نہیں ہوا تھا۔

    ثانیہ نشتر کا کہنا تھا کہ احساس ایمرجنسی کیش کی کیٹگری 3 میں وزیرستان کا حصہ آبادی کے لحاظ سے ہے، 8171 اسکیم کے تحت شمالی وزیرستان سے 61 ہزار 164 اور جنوبی وزیرستان سے 62 ہزار 499 ایس ایم ایس موصول ہوئے ہیں جن کی جانچ پڑتال جاری ہے۔

    انہوں نے کہا کہ کیٹگری 3 میں تمام صوبوں، گلگت بلتستان اور آزاد جموں و کشیر کا حصہ آبادی کے لحاظ سے رکھا گیا ہے اور مستحقین کی نشاندہی نادرا کے ڈیٹا اینالٹکس کے ذریعے کی جا رہی ہے۔

    معاون خصوصی کا کہنا تھا کہ کیٹگری 3 میں رقم کی ترسیل اگلے ہفتے شروع ہوگی، احساس ایمرجنسی کیش میں سیاسی مداخلت اور اقربا پروری کا کوئی راستہ نہیں ہے۔ سماجی تحفظ کے اس پروگرام میں شفافیت ہماری اولین ترجیح ہے۔

  • احساس ایمرجنسی کیش پروگرام سے 1 کروڑ 20 لاکھ خاندان مستفید ہوں گے: ثانیہ نشتر

    احساس ایمرجنسی کیش پروگرام سے 1 کروڑ 20 لاکھ خاندان مستفید ہوں گے: ثانیہ نشتر

    اسلام آباد: وزیر اعظم عمران خان کی معاون خصوصی ثانیہ نشتر کا کہنا ہے کہ احساس ایمرجنسی کیش پروگرام سے ایک کروڑ 20 لاکھ خاندان مستفید ہوں گے، احساس ایمرجنسی پروگرام اور راشن اسکیم پروگرام الگ ہے۔

    تفصیلات کے مطابق وزیر اعظم عمران خان کی معاون خصوصی ثانیہ نشتر کا کہنا ہے کہ احساس ایمرجنسی کیش پروگرام کا حجم 144 ارب ہے، ہر خاندان کو 12 ہزار روپے وظیفہ دیا جائے گا۔

    ثانیہ نشتر کا کہنا تھا کہ احساس ایمرجنسی کیش پروگرام سے ایک کروڑ 20 لاکھ خاندان مستفید ہوں گے، احساس ایمرجنسی پروگرام اور راشن اسکیم پروگرام الگ ہے۔ کسی کے پاس شناختی کارڈ نہیں تو راشن اسکیم سے مدد کی جا سکتی ہے۔

    گزشتہ روز معاون خصوصی نے کہا تھا کہ احساس کفالت پروگرام میں رجسٹرڈ خواتین کو یکمشت 12 ہزار دیں گے، احساس ایمرجنسی کیش پروگرام پر تیزی سے عمل ہو رہا ہے۔

    انہوں نے کہا تھا کہ ضلعی سطح پر مستحق افراد کی فہرست مرتب کرنے کا کہا ہے، لاک ڈاؤن سے سب سے زیادہ دیہاڑی دار طبقہ متاثر ہوا ہے۔ ایک خاندان میں ایک ہی فرد تک رقم پہنچنے کو یقینی بنا رہے ہیں۔

  • حکومت نوجوانوں کو آگے بڑھنے کا پورا موقع دے گی: عثمان ڈار

    حکومت نوجوانوں کو آگے بڑھنے کا پورا موقع دے گی: عثمان ڈار

    سوات: وزیر اعظم عمران خان کے معاون خصوصی عثمان ڈار کا کہنا ہے کہ اسکی گالا میں مقامی نوجوانوں کو اسکیئنگ کی مفت تربیت فراہم کی گئی، حکومت ایسے نوجوانوں کو آگے بڑھنے کا پورا موقع دے گی۔

    تفصیلات کے مطابق سوات کی برفیلی وادی مالم جبہ میں اسکی اسپورٹس گالہ کی تقریب منعقد ہوئی جس میں وزیر اعظم عمران خان کے معاون خصوصی برائے امور نوجوان عثمان ڈار نے شرکت کی۔

    معاون خصوصی نے قومی پرچم تھام کر زپ لائن کے مزے لیے اور اسکیئنگ بھی کی۔ انہوں نے تقریب میں حصہ لینے والے نوجوانوں میں انعامات تقسیم کیے۔

    تقریب سے خطاب کرتے ہوئے عثمان ڈار کا کہنا تھا کہ جنت نظیر وادی مالم جبہ میں پہلی بار آنے کا اتفاق ہوا، ایسے حسین اور دلفریب نظارے لندن، پیرس اور سوئٹزر لینڈ میں نہیں دیکھے۔ پختونخواہ حکومت نے کھیل و سیاحت کے فروغ کا زبردست انتظام کیا۔

    انہوں نے کہا کہ وزیر اعظم کے سیاحتی وژن کو بڑھانے پر خراج تحسین پیش کرتا ہوں، اسکی گالا میں مقامی نوجوانوں کو اسکیئنگ کی مفت تربیت بھی فراہم کی گئی۔ امید ہے یہ نوجوان ملک کا نام عالمی سطح پر روشن کریں گے۔

    عثمان ڈار کا کہنا تھا کہ حکومت ایسے نوجوانوں کو آگے بڑھنے کا پورا موقع دے گی، سیاحت کے شوقین افراد سے گزارش ہے مالم جبہ ضرور آئیں، سیاحت کے شوقین افراد کو ایسے خوبصورت مناظر کہیں نہیں ملیں گے۔