ARYNews.tv | Urdu – Har Lamha Bakhabar

Tag: معاون خصوصی

  • مدارس میں بھی تکنیکی تعلیم کا انتظام کیا جائے گا: عثمان ڈار

    مدارس میں بھی تکنیکی تعلیم کا انتظام کیا جائے گا: عثمان ڈار

    اسلام آباد: وزیر اعظم کے مشیر برائے امور نوجوان عثمان ڈار کا کہنا ہے کہ فنی تعلیم سے متعلق ملک بھر میں 75 اسمارٹ کلاس رومز قائم کیے جائیں گے، 70 مدارس میں بھی تکنیکی تعلیم کی فراہمی کا انتظام کیا جائے گا۔

    تفصیلات کے مطابق وزیر اعظم عمران خان کے مشیر برائے امور نوجوان عثمان ڈار نے نیوز کانفرنس سے خطاب کرتے ہوئے کہا کہ پہلے مرحلے میں ایک لاکھ 70 ہزار نوجوانوں کو ہنر مند بنایا جائے گا، پہلے سے ہنر مند نوجوانوں کو جانچ کے بعد سرٹیفیکیٹ دیے جائیں گے۔

    عثمان ڈار کا کہنا تھا کہ ملک میں نیشنل ایکریڈیشن کونسل کا قیام عمل میں لایا جائے گا، ٹیوٹا کے 2 ہزار اداروں کی ایکریڈیشن کی جائے گی۔ پیشہ وارانہ تربیت کے حوالے سے معیار مقرر کیے جائیں گے۔

    انہوں نے کہا کہ 75 اسمارٹ کلاس رومز قائم کیے جائیں گے، 70 مدارس میں بھی تکنیکی تعلیم کی فراہمی کا انتظام کیا جائے گا۔ دوست ملکوں کے اشتراک سے 5 سینٹر آف ایکسی لنس قائم کیے جائیں گے۔

    معاون خصوصی کا کہنا تھا کہ ٹیوٹا انسٹی ٹیوٹس کو عالمی اداروں سے منسلک کیا جائے گا، شفقت محمود سمیت دیگر افراد نے بہت زبردست کام کیا۔ ایسا پروگرام تاریخ میں پہلے شروع نہیں کیا گیا۔

    خیال رہے کہ اس سے قبل وزیر اعظم عمران خان کی زیر صدارت نوجوانوں کی فلاح و بہبود سے متعلق اجلاس منعقد ہوا تھا جس میں وزیر اعظم نے ہنر مند پاکستان منصوبے کی منظوری دے دی تھی۔

    منصوبے کے لیے 30 ارب روپے کی خطیر رقم مختص کی گئی ہے۔ وزیر اعظم کل ہنرمند پاکستان پروگرام کا افتتاح کریں گے۔

    اس موقع پر وزیر اعظم عمران خان کا کہنا تھا کہ نوجوان ملک کا اصل اثاثہ ہیں، بدقسمتی سے ماضی کی حکومتوں نے نوجوانوں کو نظر انداز کیا۔ نوجوانوں کو تعلیم کے باوجود نوکری کے لیے مشکلات کا سامنا کرنا پڑتا ہے۔

    خیال رہے کہ ہنرمند پاکستان پروگرام نیشنل اسکل اسٹریٹجی ٹاسک فورس کی تجاویز پر تیار کیا گیا ہے، پرگرام کے تحت لاکھوں نوجوانوں کو فنی مہارت دی جائے گی۔

    پروگرام کے تحت ٹیچر ٹریننگ، اسمارٹ لیب اور بزنس انکیوبیشن سینٹر قائم ہوں گے۔ تربیت پانے پر نوجوانوں کو بین الاقوامی اجازت نامے ملیں گے، ہنر کی تربیت دینے والے اداروں کی صلاحیت میں بھی اضافہ کیا جائے گا۔

  • پارلیمنٹ افواج پاکستان کے ساتھ سیسہ پلائی دیوار کی طرح کھڑی ہے: فردوس عاشق اعوان

    پارلیمنٹ افواج پاکستان کے ساتھ سیسہ پلائی دیوار کی طرح کھڑی ہے: فردوس عاشق اعوان

    اسلام آباد: وزیر اعظم کی معاون خصوصی فردوس عاشق اعوان کا کہنا ہے کہ قومی سلامتی کی بات ہو تو تمام جماعتیں پاکستان کے ساتھ کھڑی ہوجاتی ہیں، پارلیمنٹ افواج پاکستان کے ساتھ سیسہ پلائی دیوار کی طرح کھڑی ہے۔

    تفصیلات کے مطابق قومی اسمبلی اجلاس کے بعد وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے میڈیا سے گفتگو کرتے ہوئے کہا کہ پاکستانی قوم ہمیشہ اتحاد اور یکجہتی سے ہر چیلنج سے نبرد آزما ہوئی ہے۔

    معاون خصوصی کا کہنا تھا کہ تمام سیاسی قیادت نے قومی مفاد کو ترجیح دی ہے، سیاسی اختلاف جمہوریت کا حسن ہے۔ سیاسی حریف ایک دوسرے پر تنقید کرتے رہتے ہیں، قومی سلامتی اور مفاد کی بات ہو تو تمام جماعتیں پاکستان کے ساتھ کھڑی ہوجاتی ہیں۔

    انہوں نے کہا کہ سیاسی جماعتیں اپنے بیانیے کو پاکستان پر نچھاور کردیتی ہیں، تمام سیاسی جماعتوں کو خراج تحسین پیش کرتی ہوں۔ پیپلز پارٹی نے بہترین قومی مفاد میں تجاویز واپس لیں۔ پیپلز پارٹی نے اہم قانون سازی کے لیے حب الوطنی کا ثبوت دیا۔

    معاون خصوصی کا کہنا تھا کہ ملک کو ضرورت پڑی تو سیاسی قیادت سیسہ پلائی دیوار بن جاتی ہیں۔ پرامید ہوں کہ پارلیمنٹ سے یہی یکجہتی آئندہ بھی نظر آئے گی۔ قوم کو مشکلات سے نکالنے کی جوائنٹ اسٹریٹجی کو آگے بڑھاتے رہیں گے۔

    انہوں نے کہا کہ عوام نے جس مقصد کے لیے پارلیمنٹ کو منتخب کیا اس کا مداوا ہونا چاہیئے، 2020 امید اور 22 کروڑ عوام کے ریلیف کا سال ہے۔ سیاسی استحکام آتا ہے تو اس کا فائدہ معیشت کو بھی پہنچتا ہے۔ سلامتی کے اداروں پر عدم استحکام جنم لے تو دنیا میں مثبت پیغام نہیں جاتا، پاکستان کے مخالفین کے پروپیگنڈے کو پارلیمنٹ نے دفن کردیا ہے۔

    معاون خصوصی کا کہنا تھا کہ پارلیمنٹ افواج پاکستان کے ساتھ سیسہ پلائی دیوار کی طرح کھڑی ہے، اداروں کو کام کرنے کے لیے طاقت اسی پارلیمنٹ نے دی ہے۔ حکومت اداروں کے کردار کو مضبوط کرنے کا کام کرتی رہے گی۔ اپوزیشن کی تجاویز قومی مفاد میں ہوئی تو حکومت ہچکچاہٹ نہیں دکھائے گی۔

  • سابقہ دور کے لوگ ریاستی اداروں کے خلاف سازشوں میں مصروف رہے: فردوس عاشق اعوان

    سابقہ دور کے لوگ ریاستی اداروں کے خلاف سازشوں میں مصروف رہے: فردوس عاشق اعوان

    اسلام آباد: وزیر اعظم کی معاون خصوصی برائے اطلاعات فردوس عاشق اعوان کا کہنا ہے کہ سابقہ دور کے لوگ ریاستی اداروں کے خلاف سازشوں میں مصروف عمل رہے، وزیر اعظم اداروں کے درمیان پل کا کردار ادا کر رہے ہیں۔

    تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے تقریب سے خطاب کرتے ہوئے کہا کہ تحریک پاکستان کا قیمتی اثاثہ اگلی نسل تک منتقل کرنا ہمارا فرض ہے۔ قائد کے دو قومی نظریے کا پرچار کتابوں میں پڑھا تھا اب دیکھ بھی لیا۔

    معاون خصوصی نے کہا کہ آج خطے میں بھارت کی روایتی ہٹ دھرمی جاری ہے، بھارت میں آج انسانی حقوق کا استحصال جاری ہے۔ مظلوم کشمیریوں کو ان کے آئینی حقوق سے محروم کر دیا گیا۔

    انہوں نے کہا کہ ہمیں سیاسی، سماجی اور مالی برتری کے لیے قائد کے افکار کی روشنی میں متحد ہونا ہے، قائد کے وژن کے مطابق وزیر اعظم آج اصلاحات کی طرف رواں دواں ہیں۔ قائد اعظم کا پاکستان محفوظ ہاتھوں میں ہے۔ ہر شعبے میں گلے سڑے نظام کے لیے ریفارمز ایجنڈا متعارف کروایا جا رہا ہے۔

    معاون خصوصی کا کہنا تھا کہ کچھ لوگ جنہیں حکومت سے باہر 2 سال نہیں ہوئے وہ تڑپ رہے ہیں، سابقہ دور کے لوگ ریاستی اداروں کے خلاف سازشوں میں مصروف عمل رہے۔ وہ لوگ ریاستی ڈھانچے کو کمزور کرنے کے لیے اداروں میں ٹکراؤ کرواتے رہے۔ اداروں کو کمزور کرنے کی پس پردہ کاوشیں ٹوٹ گئی ہیں۔

    انہوں نے کہا کہ وزیر اعظم اداروں کے درمیان پل کا کردار ادا کر رہے ہیں۔ وزیر اعظم اپنے سیاسی مفاد اور اپنے بچوں کے لیے نہیں بلکہ قوم کے لیے فکر مند ہیں، معیشت کا جو پہیہ رکا ہوا تھا اس میں بہتری کے لیے کچھ ترامیم کی گئیں۔

    معاون خصوصی کا کہنا تھا کہ روایتی ہتھکنڈے وزیر اعظم کی ذات پر کیچڑ اچھالنے کے سوا کچھ نہیں، حکومت قانون کی عملداری اور صادق و امین بیورو کریٹ کو تحفظ دیتی ہے۔ وزیر اعظم کی قیادت میں کرپشن فری پاکستان کے لیے کوشاں ہیں۔

    انہوں نے کہا کہ حکومت نے نیب اور ایف آئی اے جیسے اداروں کو آزاد کیا۔ نیب کے شکنجے میں آنے والا ہر شخص یہی کہتا ہے یہ سیاسی اور انتقامی کارروائی ہے، سابقہ دورمیں تو ایف آئی اے کو گھر کی لونڈی بنا کر رکھا تھا، آج ایف آئی اے میں پیش ہونا پڑ رہا ہے تو یہی تبدیلی ان کو ہضم نہیں ہو رہی۔ آپ قانون کو جوابدہ ہیں نہ کہ قانون آپ کو۔

  • اوورسیز پاکستانیوں کے لیے بھی صحت کارڈ شروع کیا جائے گا: زلفی بخاری

    اوورسیز پاکستانیوں کے لیے بھی صحت کارڈ شروع کیا جائے گا: زلفی بخاری

    اسلام آباد: وزیراعظم کے معاون خصوصی برائے اوورسیز زلفی بخاری کا کہنا ہے کہ ملائیشیا کی طرح میڈیکل ٹورازم کو فروغ دیں گے، اوورسیز پاکستانیوں کے لیے بھی صحت کارڈ شروع کیا جائے گا۔

    تفصیلات کے مطابق اپنے ایک بیان میں زلفی بخاری کا کہنا تھا کہ کرتاپورراہداری کو کھولا، مذہبی سیاحت کو فروغ دے رہے ہیں، ای او بی آئی کو وفاق کے تحت بڑھایا جائے گا، پاکستان اور بیرون ملک رہنے والوں کو پنشن میں شامل کیا جائے۔

    انہوں نے کہا کہ صحت کارڈز کی غریب طبقہ تک رسائی یقینی بنائی جائے گی، 15ماہ میں پورا نظام تبدیل نہیں کیا جاسکتا، امید ہے جتنی بھی گنجائش ہے، صحت میں کام کریں گے، سمندر پار پاکستانی باہر کی طرح پاکستان کے لیے بھی کام کریں، امریکا میں 35 سے 40ہزار ڈاکٹر ہیں ہم نے واپسی کے لیے رابطہ ہی نہیں کیا۔

    ای او بی آئی نے 3 ماہ میں 21 ارب روپے جمع کیے: زلفی بخاری

    زلفی بخاری کا کہنا تھا کہ کسی نے کرپشن کرنی ہو تو وہ لوگ بھی ایسے رکھے گا جو کرپٹ ہوں، جب محنتی لوگ باہر سے آتے ہیں تو بہت سے نئے آئیڈیاز لاتے ہیں، اوورسیز پاکستانی آئیں اور اپنے ملک میں صحت اور ٹیکنالوجی میں کام کریں۔

    ان کا مزید کہنا تھا کہ اوورسیز پاکستانی کا جی ڈی پی میں 7فیصد حصہ ہے۔

  • اپوزیشن سیاسی منافقت کی بدترین مثال ہے: فردوس عاشق اعوان

    اپوزیشن سیاسی منافقت کی بدترین مثال ہے: فردوس عاشق اعوان

    اسلام آباد: وزیر اعظم کی معاون خصوصی برائے اطلاعات فردوس عاشق اعوان کا کہنا ہے کہ اپوزیشن قیادت سیاسی منافقت کی بدترین مثال ہے، ایک ہی سانس میں جمہوریت کی حمایت اور دوسرے میں مخالفت کرتے ہیں۔

    تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے سماجی رابطے کی ویب سائٹ ٹویٹر پر اپنے ٹویٹ میں پاکستان پیپلز پارٹی کے چیئرمین بلاول بھٹو کو مخاطب کرتے ہوئے کہا کہ سنہ 2020 عوامی خوشحالی اور قومی ترقی کا سال ہوگا۔

    معاون خصوصی کا کہنا تھا کہ اپنے گھر لاڑکانہ سے شکست کھانے والوں کے منہ سے نئے سال میں نئے الیکشن کی بات مضحکہ خیز اور بی بی شہید کے فلسفے کی نفی ہے۔ لاڑکانہ کی حالیہ شکست کرپشن کے خلاف عوام کا اعلان بغاوت ہے۔

    انہوں نے کہا کہ بلاول صاحب! پاکستان کے عوام نے 2 خاندانوں کے دہائیوں سے مسلط اقتدار کو زمین بوس کر کے عمران خان کی قیادت میں حقیقی عوامی راج قائم کر دیا ہے۔

    اپنے ٹویٹ میں معاون خصوصی نے مزید کہا کہ اپوزیشن قیادت سیاسی منافقت کی بدترین مثال ہے۔ ایک ہی سانس میں جمہوریت کی حمایت اور دوسرے میں مخالفت کرتے ہیں۔

    انہوں نے کہا کہ خود اقتدار میں ہوں تو حکومت آئینی مدت پوری کرے، عوام اقتدار عمران خان کو دیں تو ان کی طبیعت ناگوار کیوں؟

  • رانا ثنا اللہ کی ضمانت پر رہائی کے خلاف اپیل دائر کی جائے گی: فردوس عاشق اعوان

    رانا ثنا اللہ کی ضمانت پر رہائی کے خلاف اپیل دائر کی جائے گی: فردوس عاشق اعوان

    اسلام آباد: وزیر اعظم کی معاون خصوصی برائے اطلاعات فردوس عاشق اعوان کا کہنا ہے کہ انسداد منشیات فورس (اے این ایف) رانا ثنا اللہ کی ضمانت پر رہائی کے خلاف اپیل دائر کرے گی۔

    تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان کا کہنا ہے کہ وزیر اعظم آج جلال پور کینال منصوبے کا افتتاح کر رہے ہیں، منصوبے سے پنجاب کے لوگ مستفید ہوں گے۔

    معاون خصوصی کا کہنا تھا کہ آرمی چیف کی مدت ملازمت توسیع کیس میں نظر ثانی اپیل دائر کی گئی ہے، فیصلے کے اندر بہت سے قانونی نقائص ہیں۔ حکومت پاکستان نے نظر ثانی اپیل دائر کرنے کا فیصلہ کیا ہے۔ اپیل عوامی مفاد کے لیے دائر کی گئی ہے۔

    انہوں نے کہا کہ رانا ثنا اللہ کیس میں تفصیلی فیصلے میں کچھ چیزیں سامنے آئی ہیں۔ انسداد منشیات فورس (اے این ایف) رانا ثنا اللہ کی رہائی کے تفصیلی فیصلے پر اپیل دائر کرے گی۔ اے این ایف قومی ادارہ ہے اس کا میڈیا ٹرائل کیا جا رہا ہے۔ ادارے کے حوالے سے مسلسل تضحیک آمیز انداز اپنایا جا رہا ہے۔

    معاون خصوصی کا کہنا تھا کہ اے این ایف کو رانا ثنا سے ذاتی دشمنی یا عناد نہیں تھا۔ تاثر دیا گیا کہ رانا ثنا اللہ سے اے این ایف کے ذریعے سیاسی انتقام لیا گیا۔ کیس کے تفصیلی فیصلے میں میڈیا کہہ رہا ہے کہ رانا ثنا اللہ بے گناہ ہیں، میڈیا پر لگنے والی عدالتیں زیادہ طاقتور ہیں تو یہ بڑا سوالیہ نشان ہے۔

    انہوں نے کہا کہ جسمانی ریمانڈ اس سے لیا جاتا ہے جس سے ریکوری کرنا ہوتی ہے۔ اے این ایف کے اکثریت کیسز میں جائے وقوع پر ہی ابتدائی کارروائی ہوتی ہے۔ تصدیق کے لیے سیمپل چند گرام کا ہی بھیجا جاتا ہے۔

  • بے نظیر انکم سپورٹ پروگرام سے 8 لاکھ سے زائد افراد کو نکالنے کا فیصلہ

    بے نظیر انکم سپورٹ پروگرام سے 8 لاکھ سے زائد افراد کو نکالنے کا فیصلہ

    اسلام آباد: وزیر اعظم عمران خان کی معاون خصوصی ڈاکٹر ثانیہ نشتر کا کہنا ہے کہ بے نظیر انکم سپورٹ پروگرام سے 8 لاکھ سے زائد غیر مستحق افراد کو نکالنے کا فیصلہ کیا ہے۔

    تفصیلات کے مطابق وزیر اعظم عمران خان کی معاون خصوصی ڈاکٹر ثانیہ نشتر نے پریس کانفرنس سے خطاب کرتے ہوئے کہا کہ غیر مستحقین کو بے نظیر انکم سپورٹ پروگرام سے نکالا گیا ہے۔ 10 سال قبل سروے کے ذریعے مستحقین کا تعین کیا گیا تھا، 10 سال میں لوگوں کے حالات بدل جاتے ہیں۔

    ڈاکٹر ثانیہ کا کہنا تھا کہ حکومت نے فیصلہ کیا کہ پروگرام سرکاری ملازمین کے لیے نہیں ہے، 8 لاکھ 20 ہزار 165 خواتین کو نکالنے کا فیصلہ کیا ہے۔ اقدامات مستحق افراد تک مالی امداد پہنچانے کے لیے اٹھائے ہیں۔

    انہوں نے کہا کہ غیر مستحق افراد کو 2011 سے ادائیگیاں کی جارہی تھیں۔ ایسا شخص جس کے نام پر گاڑی ہو، پی ٹی سی ایل یا موبائل کا بل ایک ہزار سے زائد ہو، ایسے افراد اہل نہیں۔

    ڈاکٹر ثانیہ نے بتایا کہ اسی پروگرام کے تحت نیا پروگرام کفالت شروع کر رہے ہیں۔ کوئی بھی خاتون معیار پر پورا اترے بغیر پروگرام کا حصہ نہیں ہوگی۔ پروگرام کا حصہ نہ بننے پر اپیل کا دروازہ کھلا ہوگا۔ اب 100 فیصد بائیو میٹرک نظام پر جا رہے ہیں، کارڈ کا نظام 15 دسمبر سے ختم ہوگیا ہے۔

    انہوں نے کہا کہ خواتین اب بائیو میٹرک اے ٹی ایم استعمال کر سکیں گی، اکاؤنٹ سے پیسہ نکلنے پر ہماری اسکرین پر تفصیل آجائے گی۔ ہم خواتین کی خود کفالت کے لیے حوصلہ افزائی کریں گے۔ دیے گئے وظیفے کو مہنگائی کی شرح سے منسلک کر دیا ہے، وظیفے میں 500 روپے کا اضافہ کر دیا گیا ہے۔

    ڈاکٹر ثانیہ کا کہنا تھا کہ ہم نے 2 بینکوں سے معاہدے ماضی کی غلطیوں سے سیکھ کر کیے۔ ایل او سی کے تمام 216 گاؤں میں غربت کی لکیر کو ختم کیا ہے۔ ایل او سی کے مکینوں کو کفالت پروگرام میں زیادہ شامل کریں گے۔ جن کے پاس شناختی کارڈ ہوں گے ان کو وظیفے دیں گے۔

  • عمران خان دنیا بھر میں پاکستان کا روشن چہرہ متعارف کروا رہے ہیں: فردوس عاشق اعوان

    عمران خان دنیا بھر میں پاکستان کا روشن چہرہ متعارف کروا رہے ہیں: فردوس عاشق اعوان

    اسلام آباد: وزیر اعظم کی معاون خصوصی برائے اطلاعات فردوس عاشق اعوان کا کہنا ہے کہ عمران خان نے 23 سال اصول کی بات کی، ایک شخص ملک میں باریوں کے نظام کے خلاف کھڑا ہوا۔

    تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے تقریب سے خطاب کرتے ہوئے کہا کہ لیڈر شپ کا وژن اس کی کمٹمنٹ ہوتی ہے، وزیر اعظم کا وعدہ تھا کہ اداروں میں اصلاحات کی جائیں گی۔

    فردوس عاشق اعوان کا کہنا تھا کہ جو اپنی ذات کی نفی کرتا ہے وہ مشکلات کو مواقع میں بدلتا ہے، آئیڈیالوجی کے لیے کھڑے ہونے والے کے ساتھ ابتدا میں چند لوگ ہی ہوتے ہیں۔

    انہوں نے کہا کہ کاز سے وابستگی غیر متزلزل ہو تو قائد اعظم کی طرح خواب تعبیر میں بدل جاتا ہے۔

    معاون خصوصی کا کہنا تھا کہ عمران خان نے 23 سال اصول کی بات کی، ایک شخص ملک میں باریوں کے نظام کے خلاف کھڑا ہوا۔ عمران خان دنیا بھر میں پاکستان کا روشن چہرہ متعارف کروا رہے ہیں۔

    انہوں نے کہا کہ موجودہ حکومت نے اصلاحات کے ذریعے نئے پاکستان کی بنیاد رکھی، رہنما ذاتی مفاد نہیں بلکہ قوم کے لیے سوچتا ہے۔

  • تعمیر پاکستان اور ملکی ترقی میں مسیحی برادری نے قابل فخر کردار ادا کیا: فردوس عاشق اعوان

    تعمیر پاکستان اور ملکی ترقی میں مسیحی برادری نے قابل فخر کردار ادا کیا: فردوس عاشق اعوان

    اسلام آباد: وزیر اعظم کی معاون خصوصی برائے اطلاعات فردوس عاشق اعوان کا کہنا ہے کہ قیام پاکستان سے لے کر تعمیر پاکستان اور ملکی ترقی میں مسیحی برادری نے قابل فخر کردار ادا کیا۔

    تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے سماجی رابطے کی ویب سائٹ ٹویٹر پر اپنے ٹویٹ میں کرسمس کی مبارکباد پیش کی۔

    معاون خصوصی کا کہنا تھا کہ کرسمس کے موقع پر دنیا بھر میں بسنے والے مسیحیوں خصوصاً پاکستان میں رہنے والے مسیحی بہن بھائیوں کو مبارکباد پیش کرتی ہوں۔

    انہو نے کہا کہ قیام پاکستان سے لے کر تعمیر پاکستان اور ملکی ترقی میں مسیحی برادری نے قابل فخر کردار ادا کیا۔

    معاون خصوصی کا مزید کہنا تھا کہ قائد اعظم کے وژن کی پاسداری کرتے ہوئے نئے پاکستان میں اقلیتوں کے حقوق اور مفادات کا تحفظ جاری رکھیں گے۔

  • بھارت کے عوام نے مودی کی نفرت کے خلاف بغاوت کر دی ہے: فردوس عاشق اعوان

    بھارت کے عوام نے مودی کی نفرت کے خلاف بغاوت کر دی ہے: فردوس عاشق اعوان

    اسلام آباد: وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ بھارت کے عوام نے مودی کی نفرت کے خلاف بغاوت کر دی ہے۔ مودی فسطائی ذہنیت کے ساتھ بھارت میں ہندتوا کے نظریے کو نافذ کرنا چاہتا ہے۔

    تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے سماجی رابطے کی ویب سائٹ ٹویٹر پر ٹویٹ میں بھارت میں اقلیتوں کے حوالے سے بات کی۔

    معاون خصوصی کا کہنا تھا کہ عمران خان کے نئے پاکستان میں تمام اقلیتوں کے حقوق محفوظ ہیں اور انہیں ترقی کے یکساں مواقع میسر ہیں، آئین پاکستان ان کے حقوق کا ضامن ہے۔

    انہوں نے کہا کہ بھارت میں اقلیتیں امتیازی اور متعصبانہ شہریت کے قانون کے خلاف سراپا احتجاج ہیں۔ بھارتی شہر میدان جنگ کا منظر پیش کر رہے ہیں۔

    معاون خصوصی کا کہنا تھا کہ مودی اپنی بدنیتی، بد فطرتی اور چالاکی سے بھارت میں اقلیتوں پر ہونے والے ظلم و جبر سے دنیا کی توجہ ہٹا نہیں سکتا۔ بھارت کے عوام نے مودی کی نفرت کے خلاف بغاوت کر دی ہے۔

    انہوں نے کہا کہ مقبوضہ جموں کشمیر میں مہینوں سے کرفیو نافذ ہے۔ کشمیری مسلمانوں کی زندگیوں پر موت کے پہرے ہیں۔ امتیازی شہریت کے متنازع قانون نے مودی کی مسلمانوں کے خلاف نفرت کی تصدیق کردی ہے۔

    اپنے ٹویٹ میں انہوں نے مزید کہا کہ دنیا دیکھ رہی ہے کہ مودی فسطائی ذہنیت کے ساتھ بھارت میں ہندتوا کے نظریے کو نافذ کرنا چاہتا ہے۔