مونٹانا: امریکی حکومت نے آئیوری ہدہد سمیت جانوروں کی 23 اقسام کے دنیا سے ناپید ہونے کا اعلان کر دیا ہے۔
تفصیلات کے مطابق بدھ کو امریکا نے خوب صورت امریکی پرندے ہدہد کی دنیا سے معدومی کا اعلان کیا ہے، جنگلی حیات کے ماہرین کا کہنا ہے کہ آئیوری ہدہد سمیت 22 اقسام کے پرندے، مچھلیاں اور دوسرے جنگلی جانوروں کی نسلیں بھی اب دنیا سے غائب ہو چکی ہیں۔
جنگلی حیات کے اہل کاروں کے لیے کسی پودے یا جانور کے سلسلے میں ایسی امید چھوڑنا ایک عجیب قدم ہے، تاہم حکومتی سائنس دانوں کا کہنا ہے کہ انھوں نے ان 23 کو تلاش کرنے کی کوششیں اب ختم کر دی ہیں۔
ہدہد کا شمار خوب صورت پرندوں میں کیا جاتا ہے، خوش نما رنگوں اور لمبی چونچ والا یہ پرندہ شمالی میکسیکو میں پایا جاتا تھا، جسے اپنے حجم کے لحاظ سے دنیا کے تیسرے سب سے بڑے ہدہد کا درجہ حاصل تھا۔
جنگلوں میں بسیرا کرنے والے اس پرندے کی نسل کو اسی وقت خطرہ لاحق ہو گیا تھا جب بڑے پیمانے پر جنگلوں کی کٹائی شروع ہوئی تھی، جنگلی حیات کے اہل کاروں نے اپنے تجزیے میں کہا ہے کہ 1944 کے بعد سے ہدہد کے دیکھے جانے کے ٹھوس شواہد نہیں ملے، بہت کوششوں کے باوجود وہ ان 23 نسلوں کے جانداروں کو ڈھونڈنے میں ناکام ہو چکے ہیں اور اب وہ برسوں سے کہیں بھی دیکھے نہیں گئے۔
رپورٹ کے مطابق جنگلی حیات کی 23 نسلوں کے دنیا سے مٹ جانے کا اعلان اس لیے کیا گیا ہے، کیوں کہ ان جانوروں کی صورت حال کی تبدیلی سے متعلق سفارشات کئی برسوں سے التوا میں پڑی ہوئی تھیں اور ان پر عمل نہیں کیا جا رہا تھا۔
رپورٹ میں مزید کہا گیا ہے کہ اگر ان میں سے کسی بھی نسل کی بحالی کا حقیقی امکان پیدا ہوا تو ان کے تحفظ کے لیے وسائل فراہم کیے جائیں گے۔
ماہرین کا کہنا ہے کہ ان نسلوں کی معدومی میں آب و ہوا کی تبدیلی کا بڑا حصہ ہے، ماہرین نے خدشہ ظاہر کیا ہے کہ اگر آب و ہوا کی تبدیلی کے عمل کو روکنے کے جلد اور مؤثر اقدامات نہ کیے گئے تو جنگلی حیات کی نسلوں کا دنیا سے خاتمہ ایک معمول بن جائے گا۔
