پاکستان شوبز انڈسٹری کی نوجوان اداکارہ میرب علی کی سوشل میڈیا پلیٹ فارم پر معنی خیز پوسٹ نے صارفین کی توجہ اپنی جانب مبذول کروالی۔
2022 میں عاصم اظہر اور میرب علی کی منگنی ہوئی تھی تاہم حال ہی میں عاصم اظہر نے انسٹاگرام پر ایک اسٹوری اپ لوڈ کرتے ہوئے منگیتر میرب سے منگنی ختم ہونے کا اعلان کیا تھا۔
عاصم اظہر نے منگنی ٹوٹنے کا اعلان کرتے ہوئے ایک طویل نوٹ شیئر کیا تھا جس میں انہوں نے لکھا تھا کہ ہم ایک ذاتی بات آپ سے شیئر کرنا چاہتے ہیں، کیونکہ ہم سمجھتے ہیں کہ یہ ہمارے فینز اور دوستوں کا حق ہے۔
عاصم اظہر کا میرب علی کے ساتھ منگنی ختم کرنے کا اعلان
عاصم اظہر نے انسٹا پوسٹ میں لکھا تھا کہ کافی سوچ و بچار اور غور و فکر کے بعد میں نے اور میرب نے باہمی رضامندی سے الگ راستے اختیار کرنے کا فیصلہ کیا ہے۔ اگرچہ ہم نے خوبصورت لمحات شیئر کیے اور ایک مشترکہ مستقبل کی امید رکھی، لیکن زندگی ہمیشہ ہماری مرضی کے مطابق نہیں چلتی۔
عاصم کے اعلان کے بعد میرب نے اپنا کوئی ردعمل نہیں دیا تاہم اب اداکارہ و ماڈل نے اپنی انسٹاگرام اسٹوری پر ایک نوٹ شیئر کرتے ہوئے منگنی ختم ہونے پر اپنی خاموشی کا جواب دیا ہے جس نے صارفین کی توجہ مبذول کر لی ہے۔
میرب علی کی جانب سے شیئر کردہ پوسٹ میں لکھا ہے کہ "کسی نے مجھ سے پوچھا، کیا تم اپنی سائیڈ کی کہانی نہیں بتاؤ گی؟” میں نے جواب دیا ‘خدا جانتا ہے، اور یہ کافی ہے’۔
