وزیراعظم پاکستان نے کہا ہے کہ معیاری تعلیم کا فروغ حکومت کی اولین ترجیح ہے، ہماری بھرپور کوشش ہے کہ کوئی بھی بچہ اسکول سے باہر نہ ہو۔
تفصیلات کے مطابق وزیراعظم شہباز شریف سے برطانیہ کی معروف جامعات کے نمائندگان کے وفد نے ملاقات کی جس کی قیادت برطانیہ کے انٹرنیشنل ایجوکیشن چیمپئن اسٹیو اسمتھ کررہے تھے۔ اس موقع پر وزیراعظم نے کہا کہ تعلیم کے شعبے کی ترقی کے لیے حکومت ہنگامی اقدامات اٹھارہی ہے۔
انھوں نے کہا کہ حکومت صوبائی حکومتوں کے ساتھ مل کرکام کررہی ہے۔ پنجاب میں ایجوکیشن اینڈومینٹ فنڈ قائم کیا تھا، وفاق میں بھی ایسا کرینگے۔
وزیراعظم نے برطانیہ کی جانب سے پاکستان میں تعلیم کے شعبے میں تعاون کو سراہتے ہوئے کہا کہ پاکستان برطانیہ تعلقات دہائیوں پر محیط ہیں جن میں مزید بہتری آرہی ہے۔ برطانیہ کے ساتھ تجارت اور تعلیم کے شعبوں میں تعاون بڑھانے کے خواہاں ہیں۔
شہباز شریف کا کہنا تھا کہ پاکستانی اور برطانیہ کی یونیورسٹیوں میں ٹیکنالوجی اور تحقیق میں اشتراک چاہتے ہیں، برطانیہ اساتذہ کی تربیت اور استعداد کار میں اضافے کیلئے مددگارثابت ہو سکتا ہے۔
انھوں نے کہا کہ پاکستان برطانیہ کے تعلیمی شعبے کی استعداد سے فائدہ اٹھانا چاہتا ہے۔ پاکستانی اور برطانوی جامعات ڈگری پروگرامز شروع کرچکی ہیں.
وزیراعظم کا کہنا تھا کہ پاکستان میں تعلیم کا معیار بہتر بنانے کیلئے مل کر کام کرنا چاہتے ہیں، جدید تعلیم بالخصوص سائنس وٹیکنالوجی قوم کی ترقی کی ضمانت ہے۔
وفد نے بریفنگ دیتے ہوئے بتایا کہ برطانیہ ایجوکیشن گیٹ وے پاکستان کا دائرہ کار مزید بڑھا رہا ہے۔ دونوں ممالک میں تعلیم کے شعبے میں تعاون بڑھانے میں مدد ملے گی۔ وفد نے برطانیہ اور پاکستان کے درمیان تعلیم کے شعبے میں تعاون میں دلچسپی کا اظہار کیا۔