آرمی چیف جنر عاصم نے کہا ہے کہ آج معیشت کے تمام اعشاریے مثبت ہیں، اگلے برس تک مزید بہتر ہونگے، پاکستان کے روشن مستقبل پر یقین ہے۔
تفصیلات کے مطابق چیف آف آرمی اسٹاف جنرل عاصم منیر نے کراچی میں بزنس کمیونٹی سے خطاب کرتے ہوئے کہا کہ گزشتہ نشست میں بھی کہا تھا مایوسی مسلمان کےلیے حرام ہے، ایک سال پہلے چھائے ہوئے مایوسی کے بادل آج چھٹ چکے ہیں۔
جنرل عاصم منیر نے کہا کہ مایوسی پھیلانے اور ڈیفالٹ کی باتیں کرنے والے لوگ آج کہاں ہیں؟ کیا ان کو جوابدہ نہیں ٹھہرانا چاہیے؟ کوئی چیز بشمول سیاست ملک سے مقدم نہیں۔
پاک فوج کے سربراہ نے کہا کہ ہم سب کو ذاتی مفاد پر پاکستان کو ترجیح دینی چاہیے، ریاست ماں کی طرح ہے اور اس کی قدر لیبیا، عراق اور فلسطین سے پوچھنی چاہیے، یاد رکھیں! پاکستان کےعلاوہ ہماری کوئی شناخت نہیں ہے۔
جتنی بھی مشکلات ہوں اگر ہم سب مل کرکھڑے ہوں تو کوئی کچھ بگاڑ نہیں سکتا، آپ اپنا پیسہ لےکر پاکستان آئیں، عوام بھی کمائے اور ملک بھی ترقی کرے۔
آرمی چیف جنرل عاصم منیر کا کہنا تھا کہ صرف پاکستانی ہی پاکستان کو بیل آؤٹ کے ذریعے معاشی استحکام تک لاسکتے ہیں، دہشت گردی کی پشت پناہی غیرقانونی کاروبار والے کرتے ہیں۔
انھوں نے کہا کہ غیرقانونی کاروبار کے پیچھے مخصوص عناصر ہوتے ہیں، ڈیجیٹل سرحدوں کی حفاظت، عوام کی ڈیجیٹل سیکیورٹی ریاست کی ذمہ داری ہے۔