Tag: معیشت

اسلام آباد: وزیراعظم عمران خان کا کہنا ہے کہ حکومتی کاوشوں کی بدولت ملکی معیشت میں استحکام آیا ہے، عوام کو معاشی میدان میں کامیابیوں سے آگاہ کیا جائے۔

تفصیلات کے مطابق وفاقی دارالحکومت اسلام آباد میں وزیراعظم عمران خان کی زیر صدارت وفاقی کابینہ کے اجلاس کا اعلامیہ جاری کر دیا گیا۔ اعلامیے میں بتایا گیا ہے کہ کابینہ کو ملکی معاشی صورت حال میں بہتری پر بریفنگ دی گئی۔

اعلامیے کے مطابق سنگین مسائل کی شکار ملکی معیشت میں استحکام آچکا ہے، چار بڑے عالمی اداروں ورلڈ بینک، ایشین ڈویلپمنٹ بینک، آئی ایم ایف اور موڈیز نے معیشت میں بہتری کا اعتراف کیا۔

اجلاس کے اعلامیے میں بتایا گیا ہے کہ فارن ڈائریکٹ انویسٹمنٹ میں 286 فیصد بہتری آئی ہے، اسٹاک مارکیٹ 8 ماہ بعد 40 ہزارکی سطح تک پہنچ گئی ہے، برآمدات میں تقریباً 10 فیصد اضافہ دیکھنے میں آیا ہے۔

اعلامیے میں کہا گیا کہ سردیوں میں بجلی کی قیمت میں کمی لانے کے فیصلے سے ایک لاکھ 76 ہزار صارفین مستفید ہوئے ہیں، صنعتی شعبے کی جانب سے اس فیصلے کا خیر مقدم کیا گیا ہے۔

وزیراعظم عمران خان نے اقتصادی اعشاریوں میں بہتری پر اطمینان کا اظہار کرتے ہوئے کہا کہ حکومتی کاوشوں کی بدولت ملکی معیشت میں استحکام آیا ہے، معیشت کومزید مستحکم اورعام آدمی کو ریلیف دینا ترجیح ہے۔

وزیراعظم پاکستان نے کہا کہ معاشی استحکام کا حصول ایک اہم سنگ میل تھا، عوام کو معاشی میدان میں کامیابیوں سے آگاہ کیا جائے انہوں نے کہا کہ کاروباری برادری کے اعتماد کو مزید تقویت فراہم ہوگی۔

اسلام آباد: مشیر خزانہ ڈاکٹر حفیظ شیخ کا کہنا ہے کہ ملکی تاریخ میں پہلی بار پورٹ فولیو سرمایہ کاری میں 1 ارب ڈالر آئے، برآمدات میں 10 فیصد اضافہ ہوا۔

تفصیلات کے مطابق وفاقی دارالحکومت اسلام آباد میں مشیر خزانہ ڈاکٹر حفیظ شیخ نے نیوز کانفرنس کے دوران بتایا کہ رواں مالی سال پاکستانی معیشت میں نمایاں بہتری آئی ہے،عالمی ادارے پاکستان کی معاشی طور پر بہتری کا اعتراف کر رہے ہیں۔

مشیر خزانہ نے کہا کہ 5ماہ میں مالی خسارہ کم ہوا اور سرپلس میں بھی گیا، جاری کھاتوں کے خسارے میں نمایاں کمی آئی ہے، غیرملکی سرمایہ کاری میں اضافہ ہوا ہے، برآمدات بڑھنا شروع ہوگئی ہے۔

ڈاکٹر حفیظ شیخ نے کہا کہ ڈالرزکی آمدنی سے پاکستان میں خوشحالی بڑھے گی، کرنٹ اکاؤنٹ خسارے میں کمی کی رفتار پہلے سے زیادہ ہے، اےڈی بی نے اعتماد کرتے ہوئے 3 ارب ڈالر امداد میں اضافے کا فیصلہ کیا۔

انہوں نے کہا کہ ورلڈ بینک کے صدر نے بھی پاکستان کی معاشی کارکردگی کو سراہا، موڈیز نے منفی سے پاکستان کی ریٹنگ مثبت کر دی ہے، موڈیزکی رپورٹ سے دنیا کو پتہ چل گیا پاکستانی معیشت بہتر ہو رہی ہے۔

مشیر خزانہ نے کہا کہ بلومبرگ نے پی ایس ایکس کو دنیا کی بہترین اسٹاک مارکیٹ قرار دیا، ملکی تاریخ میں پہلی بار پورٹ فولیو سرمایہ کاری میں 1 ارب ڈالر آئے، برآمدات میں 10 فیصد اضافہ ہوا۔

حفیظ شیخ نے کہا کہ براہ راست غیرملکی سرمایہ کاری میں 236 فیصد اضافہ ہوا، نان ٹیکس ریونیو میں 100 فیصد اضافہ ہوا، پاکستان اسٹاک ایکسچینج 40 ہزارکی سطح عبور کرچکی ہے۔

انہوں نے کہا کہ حکومت سرمایہ کاروں کے لیے قرضوں میں شرح سود کی کمی کا سوچ رہی ہے، کم آمدنی والوں کے گھروں کی تعمیر کے لیے 30 ارب روپے رکھے گئے ہیں۔

مشیر خزانہ نے کہا کہ آئی ایم ایف کی ٹیم نے پاکستان آکر خود جائزہ لیا ہے، آئی ایم ایف نے پاکستان کو قرض کی دوسری قسط 500 ملین ڈالر دینے کا کہا، اسٹیٹ بینک کے ذخائر ناصرف مستحکم رہے بلکہ اس میں اضافہ ہوا۔

حفیظ شیخ نے کہا کہ کاروباری طبقے کے لیے بجلی اور گیس کو سبسڈائز کر رہے ہیں، برآمدات مزید بڑھانے کے لیے مزید اقدامات کر رہے ہیں، برآمد کنندگان کو کم انٹرسٹ ریٹ پر 300 ارب اضافی دیں گے۔

انہوں نے کہا کہ پٹرولیم مصنوعات کی قیمتوں میں کمی عالمی مارکیٹ کے مطابق کی گئی، حکومت کی کوشش ہے جس چیز کی بھی قیمت کم کرسکتے ہیں کریں گے۔

لاہور: گورنر پنجاب چوہدری محمد سرور نے کہا ہے کہ حکومت معاشی شعبے میں کامیابی سے آگے بڑھ رہی ہے، حکومتی معاشی ٹیم کے بہتر ین نتائج کو دنیا تسلیم کر رہی ہے۔

تفصیلات کے مطابق سماجی رابطوں کی ویب سائٹ ٹویٹر پر اپنے پیغام میں گورنر پنجاب نے کہا کہ معاشی سیکٹر میں حکومت کامیاب ہے، جب کہ معاشی ٹیم کی کارکردگی سے سامنے آنے والے نتائج کو عالمی سطح پر تسلیم کیا جا رہا ہے۔

انھوں نے ٹویٹ میں لکھا کہ اسٹاک مارکیٹ کل 40 ہزار پوائنٹس کی حد بھی عبور کر چکی ہے، موڈیز نے بھی پاکستان کی معاشی پالیسوں کو سراہا ہے، موڈیز نے پاکستان کی کریڈٹ ریٹنگ بھی بہتر کر دی ہے، یہ معاشی شعبے میں حکومت کی کامیابی کا ثبوت ہے۔

یہ بھی پڑھیں:  موڈیز نے پاکستان کا آؤٹ لک منفی سے مستحکم کردیا

خیال رہے کہ گزشتہ روز معیشتوں کی درجہ بندی کرنے والے ادارے موڈیز نے پاکستان کی کریڈٹ ریٹنگ بہتر کرتے ہوئے آؤٹ لُک کو منفی سے مستحکم کر دیا ہے، موڈیز نے پاکستان کی ریٹنگ بی تھری پر برقرار رکھی ہے تاہم پہلے مستقبل یعنی آؤٹ لُک منفی تھا۔

عالمی ریٹنگ ادارے کا کہنا تھا کہ اگرچہ زر مبادلہ کے ذخائر اب بھی کم ہیں اور انھیں بہتر ہونے میں وقت لگے گا مگر پالیسی ایڈجسٹمنٹ اور آزادانہ شرح مبادلے سے ادائیگیوں کے توازن کی بہتری میں مدد ملے گی۔

اسلام آباد: وزیراعظم عمران خان کا کہنا ہے کہ معاشی ترقی کے لیے ایک قابل بیوروکریسی کا بہت اہم کردار ہے، پنجاب میں امن اورگورننس کے نظام میں بہتری لانے کی ضرورت ہے۔

تفصیلات کے مطابق وزیراعظم عمران خان کی زیرصدارت صوبائی بیوروکریسی، سینئر پولیس افسران کا اجلاس ہوا جس میں وزیراعلیٰ پنجاب، فردوس عاشق اعوان، ذوالفقاربخاری، بیرسٹر شہزاد اکبر، چیف سیکریٹری اور آئی جی پنجاب پولیس نے شرکت کی۔

وزیراعظم نے اجلاس سے خطاب کرتے ہوئے کہا کہ 60 کی دہائی میں گورننس، بیوروکریسی، پالیسیزکی مثالیں دی جاتی تھیں، اس وقت پاکستان ایک نازک دور سے گزر رہا ہے، ملک میں معاشی استحکام ضروری ہے۔

عمران خان نے کہا کہ معیشت مستحکم ہو رہی ہے، اپنی معاشی ٹیم کو مبارکباد دیتا ہوں، بیوروکریسی اور دیگر عہدوں پر تعیناتیاں میرٹ پر کی گئی ہیں، اپنے دور حکومت میں افسران کو ہر قسم کے سیاسی دباؤ سے آزاد کیا۔

وزیراعظم پاکستان نے کہا کہ آپ نے سب کام میرٹ پرکرنے ہیں، کسی سیاسی شخصیت کا کوئی بھی ناجائز کام ہرگز نہیں کرنا، معاشی ترقی کے لیے ایک قابل بیوروکریسی کا بہت اہم کردار ہے، پنجاب میں امن اورگورننس کے نظام میں بہتری لانے کی ضرورت ہے۔

عمران خان نے کہا کہ نئے پاکستان میں پرانے مائنڈ سیٹ کو تبدیل کرنا ہے، پرانا نظام اب نہیں چل سکتا۔ انہوں نے کہا کہ عوام کی خدمت کرنا آپ کا اولین فرض ہے، افسران کی مدت ملازمت کو تحفظ فراہم کریں گے۔

انہوں نے کہا کہ غریب آدمی کی زندگی میں بہتری لانے کے لیے کوشش کریں، بچوں کے خلاف جرائم کی روک تھام پر خصوص توجہ دیں، آپ کا کام کمزور کو طاقتور کے خلاف تحفظ فراہم کرنا ہے، آپ کے پاس قانونی اتھارٹی ہے۔

لاہور: وزیراعلیٰ پنجاب سردار عثمان بزدار نے کہا کہ پنجاب اسمبلی نے قانون سازی کے نئے ریکارڈ قائم کیے ہیں، ایک سال میں وہ کام کیے جو سابقہ حکومتیں کئی سال نہیں کرسکیں۔

تفصیلات کے مطابق وزیراعلیٰ پنجاب نے کہا کہ تباہ حال معیشت میں بہتری لانا پی ٹی آئی حکومت کا قابل قدر اقدام ہے، وزیراعظم ملک کو معاشی افق کی بلندیوں تک لے کر جائیں گے۔

سردار عثمان بزدار نے کہا کہ پائیدارمعاشی ترقی کے لیے قیادت کا ایماندار ہونا ضروری امر ہے، سابق ادوارمیں اربوں کی کرپشن نے ملک کا بیڑا غرق کیا۔

انہوں نے کہا کہ ہماری حکومت نے کرپشن کے خلاف علم بلند کیا ہے، وزیراعظم نے کرپشن کے بڑے بڑے بت بے نقاب کیے، ہماری حکومت نے ماضی کی غلط روایت کا خاتمہ کیا ہے۔

وزیراعلیٰ پنجاب نے کہا کہ عوام کی سہولت کے مطابق قوانین میں ترامیم کی جا رہی ہیں، پنجاب اسمبلی نے قانون سازی کے نئے ریکارڈ قائم کیے ہیں، ایک سال میں وہ کام کیے جو سابقہ حکومتیں کئی سال نہیں کرسکیں۔

سردار عثمان بزدار نے کہا کہ ورکرویلفیئر فنڈز بل لانے کا مقصد کارکنوں کی فلاح وبہبود ہے، صاف پانی کی فراہمی کے لیے آب پاک اتھارٹی کا قانون اہمیت رکھتا ہے۔