ARYNews.tv | Urdu – Har Lamha Bakhabar

Tag: معیشت

  • معیشت کے حوالے سے مزید اچھی خبریں متوقع ہیں: علی زیدی

    معیشت کے حوالے سے مزید اچھی خبریں متوقع ہیں: علی زیدی

    اسلام آباد: وفاقی وزیر برائے بحری امور علی زیدی کا کہنا ہے کہ جب نیت صاف ہو تو اللہ کی مدد حاصل ہوتی ہے، وزیر اعظم عمران خان معاشی ٹیم کی خود مانیٹرنگ کر رہے ہیں، مزید اچھی خبروں کی توقع ہے۔

    تفصیلات کے مطابق وفاقی وزیر برائے بحری امور علی زیدی نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ جب نیت صاف ہو تو اللہ کی مدد حاصل ہوتی ہے، تمام معاشی اشاریے زبردست ریکوری کی نشاندہی کر رہے ہیں۔

    علی زیدی نے کہا کہ وزیر اعظم عمران خان معاشی ٹیم کی خود مانیٹرنگ کر رہے ہیں، مزید اچھی خبروں کی توقع ہے۔

    خیال رہے کہ چند روز قبل اسٹیٹ بینک آف پاکستان نے رپورٹ جاری کی تھی جس کے مطابق ملک کا کرنٹ اکاؤنٹ ساڑھے 4 سال بعد سر پلس ہوا، اکتوبر میں کرنٹ اکاؤنٹ 9 کروڑ 90 لاکھ ڈالر سر پلس رہا۔

    اسٹیٹ بینک کے مطابق جولائی تا اکتوبر کرنٹ اکاؤنٹ خسارے میں 4.49 ارب ڈالر ریکارڈ کمی ہوئی۔ جولائی تا اکتوبر کرنٹ اکاؤنٹ خسارہ گھٹ کر 1.47 ارب ڈالر رہ گیا۔ اسٹیٹ بینک کے مطابق گزشتہ مالی سال جولائی تا اکتوبر کرنٹ اکاؤنٹ خسارہ 5.56 ارب ڈالر تھا۔

    وزیر اعظم عمران خان نے بھی اپنے ٹویٹ میں خوشی کا اظہار کرتے ہوئے کہا تھا کہ پاکستان کی معیشت بالآخر درست سمت میں جارہی ہے، ہماری معاشی اصلاحات کا پھل ملنا شروع ہوگیا۔

    انہوں نے کہا تھا کہ اکتوبر میں پاکستان کے جاری کھاتے سرپلس ہوگئے، جاری کھاتوں کا یہ سر پلس 4 سال میں پہلی بار آیا ہے۔ جاری کھاتے 9 کروڑ 90 لاکھ ڈالر سر پلس رہے۔

  • اب ترقی کی منازل طے کرنے کا وقت آگیا ہے، حماد اظہر

    اب ترقی کی منازل طے کرنے کا وقت آگیا ہے، حماد اظہر

    اسلام آباد: وفاقی وزیر برائے معاشی امور حماد اظہر کا کہنا ہے کہ 4 سال بعد پہلی مرتبہ جاری کھاتا سرپلس میں ہے، اب ترقی کی منازل طے کرنے کا وقت آگیا ہے۔

    تفصیلات کے مطابق وفاقی دارالحکومت اسلام آباد میں ایشین انفرا اسٹرکچر بزنس اور پاکستان کے اشتراک سے بزنس فورم کا انعقاد ہوا۔ وفاقی وزیر حماد اظہر نے تقریب سے خطاب کرتے ہوئے کہا کہ بینک کے ساتھ تعلقات کو وسعت دے رہے ہیں۔

    انہوں نے کہا کہ حکومت پائیدار اور مستحکم اقتصادی ترقی کی بنیاد رکھ رہی ہے، بنیادی ڈھانچے اورسماجی ترقی میں سرمایہ کاری کی ضرورت ہے، منصوبوں کی تکمیل یقینی بنانے پرمتحرک مانیٹرنگ نظام بنایا جا رہا ہے۔

    حماد اظہر نے کہا کہ 4 ماہ کا پرائمری بجٹ 280 ملین سرپلس ہے، 4 سال بعد پہلی مرتبہ جاری کھاتا سرپلس میں ہے، ریونیو 15فیصد سے بڑھ رہا ہے، ٹیکس فائلرز بڑھے ہیں۔

    وفاقی وزیر برائے معاشی امور نے مزید کہا کہ اسٹاک مارکیٹ میں 10 ہزار پوانٹس کا اضافہ ہوا ہے، اب ترقی کی منازل طے کرنے کا وقت آگیا ہے۔

    ہماری معاشی اصلاحات کا پھل ملنا شروع ہوگیا، وزیراعظم عمران خان

    یاد رہے کہ دو روز قبل وزیراعظم عمران خان کا کہنا تھا کہ اکتوبرمیں پاکستان کےجاری کھاتےسر پلس ہوگئے، ہماری معاشی اصلاحات کاپھل ملناشروع ہوگیا ہے، پاکستانی معیشت درست سمت میں جارہی ہے۔

  • نوجوانوں کے لیے وہ سب کریں گے جس سے کامیابی کی راہ ہموار ہو، وزیراعظم

    نوجوانوں کے لیے وہ سب کریں گے جس سے کامیابی کی راہ ہموار ہو، وزیراعظم

    اسلام آباد: وزیراعظم عمران خان کا کہنا ہے کہ نوجوان ملکی معیشت میں ریڑھ کی ہڈی کی حیثیت رکھتے ہیں، نوجوانوں کے لیے وہ سب کریں گے جس سے کامیابی کی راہ ہموار ہو۔

    تفصیلات کے مطابق معاون خصوصی یوتھ افیئرزعثمان ڈار نے وزیراعظم عمران خان کو کامیاب جوان پروگرام کی ماہانہ رپورٹ پیش کر دی۔ انہوں نے وزیراعظم کو پروگرام کی شفافیت، میرٹ اور درخواستوں پر بریفنگ کے دوران بتایا کہ صرف 20 دنوں میں 10لاکھ سے زائد درخواستیں موصول ہوئیں۔

    عثمان ڈار نے بتایا کہ نوجوانوں کی بڑی تعداد نے 1 سے5 لاکھ تک قرض کی درخواستیں دیں، 6 لاکھ سے زائد نوجوان نئے کاروبار کا آغاز کرنا چاہتے ہیں۔ انہوں نے بریفنگ کے دوران بتایا کہ سب سے زیادہ درخواستیں پنجاب اور پختونخواسےموصول ہوئیں، درخواستوں کی اسکروٹنی کا عمل شروع کردیا ہے، قرض کی تقسیم آئندہ ماہ ہوگی۔

    وزیراعظم عمران خان نے پروگرام کی زبردست پذیرائی پر اظہار اطمینان کرتے ہوئے میرٹ اور شفافیت یقینی بنانے پر معاون خصوصی عثمان ڈار کو شاباشی دی۔

    وزیراعظم نے کہا کہ نوجوانوں کے لیے وہ سب کریں گے جس سے کامیابی کی راہ ہموار ہو، نوجوان ملک کا اثاثہ ہیں حکومتی سرپرستی ہرحال میں یقینی بنائیں گے۔

    انہوں نے کہا کہ نوجوان ملکی معیشت میں ریڑھ کی ہڈی کی حیثیت رکھتے ہیں، یقین ہے کامیاب جوان پروگرام معاشی بہتری میں سازگار ثابت ہوگا، نئے کاروبار سے اقتصادی صورت حال میں بھی بہتری آئے گی۔

    وزیراعظم عمران خان نے مزید کہا کہ نوجوانوں کے درپیش روزگار کے مسائل حل کرنا ترجیح ہے، میرٹ اور شفافیت پر کسی صورت سمجھوتہ نہیں ہونا چاہئیے۔

  • آج پاکستان نے اپنی معیشت مستحکم کرلی ہے: وزیر اعظم

    آج پاکستان نے اپنی معیشت مستحکم کرلی ہے: وزیر اعظم

    اسلام آباد: وزیر اعظم عمران خان کا کہنا ہے کہ آج پاکستان نے اپنی معیشت مستحکم کرلی ہے، خوشی ہے پاکستان میں اب ٹائر کی مینو فیکچرنگ ہوگی۔ ایسی چیزیں بنیں گی جو پہلے پاکستان میں نہیں بنتی تھیں۔

    تفصیلات کے مطابق پاکستان اور چین کے درمیان مختلف معاہدوں پر دستخط کی تقریب ہوئی جس میں وزیر اعظم عمران خان بھی شریک ہوئے۔ تقریب سے خطاب کرتے ہوئے وزیر اعظم عمران خان نے کہا کہ آج تین پہلوؤں پر بات کرنا چاہتا ہوں۔

    وزیر اعظم نے کہا کہ آج پاکستان نے اپنی معیشت مستحکم کرلی ہے، روپے پر دباؤ تھا اور ڈالر بڑھ رہا تھا۔ معاشی ٹیم نے روپے کی قدر کو مستحکم کیا۔ پچھلے 3 ماہ میں روپے کی قدر بڑھی ہے۔

    انہوں نے کہا کہ سرمایہ کاری بھی پاکستان آنا شروع ہوگئی ہے، روپیہ مستحکم کرنے پر معاشی ٹیم کو مبارک باد دیتا ہوں۔ آئی ایم ایف، اے ڈی بی اور ورلڈ بینک نے بھی کہا کہ پاکستان کی سمت درست ہے۔ جیسے جیسے سرمایہ کاری آئے گی معیشت بہتر ہونا شروع ہوجائے گی۔

    وزیر اعظم کا کہنا تھا کہ صنعتوں کو مراعات دی جا رہی ہیں، غیر ملکی سرمایہ کاروں کے لیے آسانیاں پیدا کرنے کی کوشش کر رہے ہیں۔ خوشی ہے پاکستان میں اب ٹائر کی مینو فیکچرنگ ہوگی۔ اس سے پہلے پاکستان میں ٹائر اسمگل ہو کر آتے تھے۔ ایسی چیزیں بنیں گی جو پہلے پاکستان میں نہیں بنتی تھیں۔ اس عمل سے درآمدات کی حوصلہ شکنی ہوگی۔

    انہوں نے کہا کہ تجارتی خسارے کی وجہ سے روپے پر دباؤ بڑھتا ہے، روپیہ گرتا ہے تو تیل، بجلی، گیس سب چیزیں مہنگی ہو جاتی ہیں۔ ایکسپورٹ بڑھانا ہماری پالیسی ہے، امپورٹ کم کردی ہے۔ حکومت کی کوشش ہے لوگوں کے لیے روزگار کے مواقع فراہم کریں۔

    وزیر اعظم کا کہنا تھا کہ ورلڈ بینک کی رپورٹ ہے پاکستان 28 پوائنٹس اوپر گیا ہے، پاکستان کے اس سے پہلے چین کے ساتھ تعلقات پہلے اتنے بہتر نہیں تھے۔ چینی قیادت خود چاہتی ہے چینی انڈسٹری پاکستان کی طرف آئے۔ سرمایہ کاروں کو جلدی سہولت نہ دیں تو وہ کہیں اور چلا جاتا ہے۔ ماحول بنا رہے ہیں کہ سرمایہ کاروں کے لیے سرمایہ کاری آسان ہو۔

  • مولانا آپ اور آپ کے ہم نوا جبری تسلط کی منفی سوچ ترک کریں، فردوس عاشق اعوان

    مولانا آپ اور آپ کے ہم نوا جبری تسلط کی منفی سوچ ترک کریں، فردوس عاشق اعوان

    اسلام آباد: معاون خصوصی برائے اطلاعات و نشریات فردوس عاشق اعوان نے کہا ہے کہ مولانا کی پریشانی ہے کہ وزیراعظم عمران خان معیشت درست سمت لے جا رہے ہیں۔

    تفصیلات کے مطابق فردوس عاشق اعوان نے سماجی رابطے کی ویب سائٹ ٹویٹر پر اپنے پیغام میں کہا کہ مولانا آپ اور آپ کے ہم نوا جبری تسلط کی منفی سوچ ترک کریں، جمہوری رویہ اپنائیں، آپ کو رنج ہے پہلی بار حقیقی عوامی راج کیوں قائم ہوا؟

    فردوس عاشق اعوان نے کہا کہ مولانا کی پریشانی ہےعمران خان معیشت درست سمت لے جا رہے ہیں، عمران خان عوام کا روزگار چلانا چاہتے ہیں۔

    معاون خصوصی برائے اطلاعات نے کہا کہ مولانا کارکنوں کو اپنی پارلیمان جانے کی خواہش کی بھینٹ نہ چڑھائیں، کارکنوں کو بےموسم کے حوالے کرنے کی بجائے گھر واپسی کی "آزادی” دیں۔

    فردوس عاشق اعوان نے کہا کہ غریبوں کےبچوں، بزرگوں کی صحت اور سلامتی خطرے میں نہ ڈالیں، آئین اور جمہوریت کے منافی مطالبے کر کے نظام کو نقصان نہ پہنچائیں۔

    اس سے قبل فیاض الحسن چوہان کا کہنا تھا کہ مولانا 10 ہزار لوگوں کے ساتھ عمران خان سے استعفیٰ مانگ رہے ہیں، کوئی مولانا کو بتائے کہ کشمیرمیں کرفیو کو آج 100 دن ہوگئے، مولانا تنقید کے کچھ نشتر بھارت کی طرف بھی چلا دیں تو کوئی حرج نہیں ہے۔

    صوبائی وزیر کا کہنا تھا کہ عمران خان کی قیادت میں پاکستان ترقی وخوشحالی کی جانب گامزن ہے، مولانا کے پاس موقع ہے کہ وہ بھی ملکی ترقی میں اپنا حصہ ڈال دیں۔

  • معاشی معاملات گھمبیر ہیں، اہداف کے حصول میں کمی بیشی ہو سکتی ہے: وزارتِ خزانہ

    معاشی معاملات گھمبیر ہیں، اہداف کے حصول میں کمی بیشی ہو سکتی ہے: وزارتِ خزانہ

    اسلام آباد: وزارتِ خزانہ کے ترجمان نے کہا ہے کہ ملک کے معاشی معاملات گھمبیر ہیں، جس کی وجہ سے مقرر کیے گئے معاشی اہداف کے حصول میں کمی بیشی ہو سکتی ہے۔

    تفصیلات کے مطابق ترجمان وزارتِ خزانہ نے اپنے بیان میں کہا ہے کہ پاکستان اور آئی ایم ایف میں پہلا جائزہ کام یابی کے ساتھ مکمل ہو گیا ہے، دو طرفہ بات چیت انتہائی خوش گوار انداز میں ہوئی۔

    ترجمان عمر حمید خان نے کہا کہ آئی ایم ایف نے پاکستان کے اصلاحات پورا کرنے کے عزم اور کوششوں کو سراہا، پاکستان بھی معاشی معاملات حل کرنے کے لیے پُر عزم ہے، معاشی معاملات کافی گھمبیر ہیں، اہداف کے حصول میں کمی بیشی ممکن ہے، تاہم اس سے اصلاحاتی پروگرام پر کوئی منفی اثر نہیں پڑے گا۔

    وزارت خزانہ کے ترجمان نے کہا کہ آئی ایم ایف نے فنانس منسٹری، اسٹیٹ بینک اور ایف بی آر کی بھی تعریف کی ہے۔

    یہ بھی پڑھیں:  آئی ایم ایف نے پاکستان میں مہنگائی کم ہونے کی نوید سنادی، جائزہ رپورٹ جاری

    گزشتہ روز مشیرِ خزانہ عبد الحفیظ شیخ نے ٹویٹ کر کے کہا تھا کہ آئی ایم ایف نے پاکستانی معیشت کے درست سمت میں گام زن ہونے کا اعتراف کیا، اس کام یابی پر وزیر اعظم عمران خان اور ان کی ٹیم مبارک باد کی مستحق ہے۔

    خیال رہے کہ گزشتہ روز انٹر نیشنل مانیٹرنگ فنڈ (آئی ایم ایف) کی جائزہ رپورٹ میں کہا گیا تھا کہ اسٹیٹ بینک کے زرِ مبادلہ کے ذخائر بہتر ہوئے ہیں، پاکستان کا بیرونی اور مالیاتی خسارہ بھی کم ہو رہا ہے، پاکستان میں مہنگائی شرح کم ہونے کا قوی امکان ہے۔

  • آئی ایم ایف اور پاکستانی حکام کے مذاکرات حتمی مرحلے میں داخل

    آئی ایم ایف اور پاکستانی حکام کے مذاکرات حتمی مرحلے میں داخل

    اسلام آباد: انٹرنیشنل مانیٹری فنڈ (آئی ایم ایف) اور پاکستان حکام کے درمیان مذاکرات حتمی مرحلے میں داخل ہو گئے ہیں، ذرایع کا کہنا ہے کہ پاکستان نے ایف اے ٹی ایف کو آئی ایم ایف پیکیج سے الگ کرنے کا مطالبہ کر رکھا ہے۔

    تفصیلات کے مطابق ذرایع نے کہا ہے کہ آئی ایم ایف وفد کے ساتھ پاکستانی حکام کے اقتصادی صورت حال پر تفصیلی مذاکرات ہوئے ہیں، پاکستان کی طرف سے مالیاتی اہداف پر نظر ثانی کے مطالبے پر آئی ایم ایف مشن جلد رد عمل دے گا، پاکستان رواں سال ٹیکس وصولیوں کے 5500 ارب ہدف پر نظر ثانی چاہتا ہے، پاکستان نے بانڈز جاری کرنے کے لیے ضمانت دینے کی شرط بھی ختم کرنے کی بات کی ہے۔

    ذرایع کے مطابق پاکستان نے مطالبہ کیا ہے کہ ایف اے ٹی ایف کو آئی ایم ایف پیکیج سے الگ رکھا جائے۔ دوسری طرف آئی ایم ایف کی طرف سے ترقیاتی پروگرام کے لیے مختص فنڈز کے اجرا پر زور دیا گیا ہے، آئی ایم ایف مشن ٹیکس وصولیوں کی اتھارٹی بنانے کے حق میں ہے، مالیاتی اخراجات مزید کم کر کے خسارے پر قابو پانے پر بھی زور دیا گیا۔

    آئی ایم ایف ٹیکس گزاروں کی تعداد بڑھانے، مختلف شعبوں میں استثنیٰ اور سبسڈی کم سے کم کرنے پر بھی زور دے چکا ہے۔

    اقتصادی ٹیم کی طرف سے مذاکرات میں مالیاتی اعداد و شمار دیے گئے، ذرایع کے مطابق آئی ایم ایف مشن کو بتایا گیا کہ پاکستان کے کرنٹ اکاؤنٹ خسارے میں 32 فی صد کمی، رواں مالی سال کے پہلے 3 ماہ میں 64 فی صد کمی، فسکل خسارے میں پہلی سہ ماہی میں 50 فی صد کمی ہوئی جب کہ ٹیکس ریٹرنز فائل کرنے کے رجحان میں 55 فی صد اضافہ، ٹیکس وصولیوں میں پہلی سہ ماہی میں 15 فی صد اضافہ ہوا۔

    ذرایع کے مطابق مالی سال کی دوسری سہ ماہی کے لیے اہداف پر بھی بات چیت ہوئی، پہلے 4 ماہ میں ٹیکس وصولیوں کا ہدف 1447 ارب تھا، جولائی تا اکتوبر میں ہدف سے 167 ارب کم ٹیکس وصولیاں ہوئیں۔

    مشن کے ساتھ مذاکرات کے بعد پاکستان کو قرضے کی نئی قسط جاری کی جائے گی، آئی ایم ایف کے ساتھ 450 ملین ڈالر کی قسط کے سلسلےمیں بات چیت ہوئی ہے، آئی ایم ایف سے 6 ارب ڈالر کے پروگرام میں سے 991 ملین ڈالر مل چکے ہیں، نئی قسط ملنے سے کل 1.44 ارب ڈالر پاکستان کو مل جائیں گے۔ تکنیکی سطح کے مذاکرات میں اقتصادی ڈیٹا کا تبادلہ کیا جا چکا ہے، آئی ایم ایف مشن پاکستان کا دورہ مکمل کر کے آج یا کل روانہ ہو جائے گا۔

  • پاکستان نے ایز آف ڈوئنگ انڈیکس میں 28 درجے بہتری دکھائی، فچ ریٹنگز

    پاکستان نے ایز آف ڈوئنگ انڈیکس میں 28 درجے بہتری دکھائی، فچ ریٹنگز

    نیویارک: عالمی معاشی ریٹنگ کے ادارے فچ ریٹنگز کا کہنا ہے کہ پاکستان نے ایز آف ڈوئنگ انڈیکس میں 28 درجے بہتری دکھائی، پاکستان کا شمار سب سے زیادہ بہتری دکھانے والے 10 ممالک میں ہوا۔

    تفصیلات کے مطابق عالمی معاشی ریٹنگ کے ادارے فچ ریٹنگز پاکستان پاکستان سے متعلق رپورٹ جاری کردی ہے جس کے مطابق عالمی بینک کے ایزآف ڈوئنگ بزنس میں پاکستان کی بہتری قابل ستائش ہے۔

    ریٹنگ ایجنسی کی رپورٹ میں کہا گیا ہے کہ حکومت کو درکار فنانسنگ میں بھی کمی آئی ہے، پاکستان نے ایز آف ڈوئنگ انڈیکس میں 28 درجے بہتری دکھائی، پاکستان کا شمار سب سے زیادہ بہتری دکھانے والے 10ممالک میں ہوا۔

    رپورٹ میں کہا گیا ہے کہ پاکستان فنانسنگ کی ضروریات برآمدات میں اضافے سے کم کرسکتا ہے، چند برس پاکستان کو سالانہ 8سے 9 ارب ڈالر کی بیرونی فنانسنگ درکار ہوگی۔

    فچ ریٹنگز ایجنسی کی رپورٹ کے مطابق پاکستان کو سی پیک سے وابستہ قرضوں کی ادائیگیاں کرنی ہیں، گزشتہ مالی سال پاکستان نے 11 ارب 58 کروڑ ڈالر قرضوں کی مد میں ادا کیے۔

    رپورٹ میں کہا گیا ہے کہ قرضوں کی قیمت میں اضافے سے غربت مٹاؤ اور ترقیاتی منصوبوں پرخرچ کم ہوا، معاشی اصلاحات سے سیاسی مخالفت کا سامنا ہوسکتا ہے۔

    رپورٹ کے مطابق آئی ایم ایف کے پروگرام سے پاکستان کی معیشت کو فائدہ ہوگا، آئی ایم ایف پروگرام میں معیشت دستاویزی بنانا اور ٹیکس وصولی میں اضافہ شامل ہے۔

  • وزیر اعظم سے صدر ورلڈ بینک کی ملاقات، پاکستانی معیشت کے استحکام پر تبادلہ خیال

    وزیر اعظم سے صدر ورلڈ بینک کی ملاقات، پاکستانی معیشت کے استحکام پر تبادلہ خیال

    اسلام آباد: وزیر اعظم عمران خان سے ورلڈ بینک کے صدر ڈیوڈ مالپس نے ملاقات کی ہے، جس میں پاکستانی معیشت کے استحکام اور اس کے لیے اہم اصلاحات کی ضرورت پر تبادلۂ خیال کیا گیا۔

    تفصیلات کے مطابق اسلام آباد میں ہونے والی ملاقات میں ورلڈ بینک حکام اور حکومتی وفد شریک ہوا، مشیر خزانہ عبدالحفیظ شیخ اور گورنراسٹیٹ بینک سمیت اعلیٰ حکام نے شرکت کی۔

    ملاقات میں پاکستانی معیشت کو مستحکم کرنے اور اہم اصلاحات کی ضرورت پر گفتگو کی گئی، کاروبار اور روزگار کے لیے سازگار ماحول فراہم کرنے، عوام کو بہترین تعلیم، صحت اور ہنر کی فراہمی پر بھی بات چیت ہوئی۔

    یہ بھی پڑھیں:  پاکستانی معیشت کا شمار بڑی مارکیٹ میں ہوگا، کنٹری ڈائریکٹر ورلڈ بینک

    عالمی بینک کے صدر ڈیوڈ مالپس نے ملاقات سے قبل کہا تھا کہ میرا دورہ پاکستانی معیشت سمجھنے کا بہترین موقع ہے، ہم معیشت پر وزیر اعظم اور وزرائے اعلیٰ کی ترجیحات جاننا چاہتے ہیں، اور پاکستان کے ساتھ کاروبار اور ملازمتوں کا ماحول بہتر بنانے پر تعاون کے خواہش مند ہیں۔

    یاد رہے کہ رواں ماہ کے آغاز میں ورلڈ بینک کے کنٹری ڈائریکٹر الانگو پاجامیتھو نے کراچی میں ایک سیمینار سے خطاب کرتے ہوئے کہا تھا کہ اگلے 30 سال میں پاکستانی معیشت کا شمار بڑی مارکیٹ میں ہوگا، اس وقت پاکستان کی معیشت کو مختلف مسائل کا سامنا ہے، تاہم حکومت کی ترجیحات درست سمت میں ہیں۔

  • وفاقی حکومت کی مثبت پالیسیاں، قومی اداروں کی آمدنی بڑھنے لگی

    وفاقی حکومت کی مثبت پالیسیاں، قومی اداروں کی آمدنی بڑھنے لگی

    اسلام آباد: وفاقی حکومت کی مثبت پالیسیوں کے اثرات سامنے آنے لگے، وزارت مواصلات کے محکمہ این ایچ اے نے ایک بارپھر ریکارڈ ریونیو حاصل کرلیا۔

    تفصیلات کے مطابق وزیراعظم عمران خان کے وژن کے تحت بنائی گئیں وفاقی حکومت کی پالیسیوں سے مثبت نتائج آنا شروع ہوگئے، قومی اداروں کی آمدنی بڑھنے لگی۔

    وزارت مواصلات کے محکمہ این ایچ اے نے ایک بارپھر ریکارڈ ریونیو حاصل کرلیا، مالی سال کے پہلے 3ماہ میں ریونیو 10ارب14کروڑ روپے تک پہنچ گیا۔

    پچھلے سال ان 3ماہ میں این ایچ اے کا ریونیو7ارب46کروڑ روپے تھا، وزارت مواصلات نے پہلے سہ ماہی کی رپورٹ جاری کردی، وفاقی وزیر مرادسعید کے دور میں ادارے کی آمدنی 20ارب سے زائد ہوگئی۔

    این ایچ اے نے پچھلے مالی سال میں حاصل ریونیو کا اپنا ہی ریکارڈ توڑ ڈالا، وفاقی حکومت نے دیگر اداروں سے بھی آمدنی کی توقع ظاہر کی ہے۔

    دوسری جانب وزیراعظم عمران خان کے دورہ امریکا کے بھی مثبت اثرات آنا شروع ہوگئے ہیں، امریکا سے سرمایہ کاروں کے وفد نے گذشتہ ہفتے پاکستان کا دورہ کیا اور پاکستان میں سیاحت کے شعبے میں سرمایہ کاری سے متعلق تبادلہ خیال کیا۔

    پاکستان سے متعلق عالمی سطح پر مثبت پیش رفت ہو رہی ہے: حفیظ شیخ

    دریں اثنا امریکی وفد نے وفاقی وزیر امور کشمیرگلگت بلتستان علی امین گنڈاپور سے بھی ملاقات کی تھی، ملاقات میں اسکردو سمیت گلگت بلتستان کے مختلف علاقوں میں سیاحتی مراکز قائم کرنے کا فیصلہ کیا گیا۔

    یاد رہے جولائی میں وزیراعظم عمران خان نے دورہ امریکا کے دوران امریکی بزنس ایگزیکٹو کے وفد سے ملاقات کی تھی، جس میں وزیراعظم نے وفد کو نیا پاکستان ہاؤسنگ منصوبے میں سرمایہ کاری کے مواقع اور کاروبار میں آسانی کے لیے حکومت کے حالیہ اقدامات سے آگاہ کیا تھا۔