Tag: معیشت

لاہور: وزیر خارجہ شاہ محمود قریشی کا کہنا ہے کہ کہیں دباؤکم دکھائی دیتا ہے تو وہاں لاک ڈاؤن میں نرمی کرنی چاہیے،ہماری معیشت طویل لاک ڈاؤن برداشت نہیں کرسکتی۔

تفصیلات کے مطابق لاہور میں میڈیا سے گفتگو کرتے ہوئے وزیر خارجہ شاہ محمود قریشی نے کہا کہ کورونا کے خلاف نبرد آزما ڈاکٹرز، پیرا میڈیکل اسٹاف پر فخر ہے۔

شاہ محمود قریشی کا کہنا تھا کہ وزیراعظم سب جانتے ہیں، پل پل کی پیش رفت سے آگاہ ہیں، لاک ڈاؤن کے جہاں فوائد وہاں اس کے نقصانات بھی ہیں،وزیراعظم کی سوچ منفی نہیں وہ کہنا چاہتے تھے لاک ڈاؤن کئی اقسام کے ہوتے ہیں۔

وزیر خارجہ نے کہا کہ لاک ڈاؤن کی وجہ سےغربت کی لکیر سے نیچے لوگ مشکلات سے دوچار ہیں، کہیں دباؤکم دکھائی دیتا ہے تو وہاں لاک ڈاؤن میں نرمی کرنی چاہیے،ہماری معیشت طویل لاک ڈاؤن برداشت نہیں کرسکتی۔

انہوں نے کہا کہ وفاقی حکومتی سمجھتی ہے کہ کروناوائرس کا چیلنج طویل ہے، ہوسکتا ہے کرونا کا چیلنج 6 ماہ یا پھر ایک سال تک چلے ،ایک لڑائی کرونا سے اور دوسری غربت اور بھوک کے خلاف لڑنی ہے۔

پاکستان میں کرونا کے 2 لاکھ ٹیسٹ مکمل، 19103 مثبت، 440 مریض جاں بحق

واضح رہے کہ نئے اور مہلک وائرس کو وِڈ نائنٹین کی عالمگیر وبا سے پاکستان بھر میں اموات کی تعداد 440 ہو گئی ہے، ملک کے مختلف حصوں میں کرونا وائرس کے تصدیق شدہ کیسز کی تعداد بھی بڑھ کر 19,103 ہو گئی۔

اسلام آباد: وزیراعظم عمران خان کا کہنا ہے کہ پاکستان میں بدقسمتی سے کرونا وائرس سے 192 افراد مرچکے ہیں، ہماری کوشش ہے اپنے لوگوں کو بھوک سے بچائیں۔

تفصیلات کے مطابق وزیراعظم عمران خان نے کرونا اور قومی صورت حال پر گفتگو کرتے ہوئے کہا کہ کرونا کی وجہ سےعالمی سطح پر مشکل حالات ہیں،ایک طرف لوگ کرونا سے مر رہے ہیں،دوسری طرف لاک ڈاؤن کی وجہ سے بھی مشکلات ہیں۔

وزیراعظم کا کہنا تھا کہ بحث چل رہی ہے لاک ڈاؤن بھی ہے اور لوگوں کو مسائل بھی ہیں،بحث ہے لاک ڈاؤن میں کہاں نرمی کی جائے،جہاں روزانہ زیادہ لوگ مر رہے ہیں وہ بھی لاک ڈاؤن میں نرمی لا رہے ہیں۔

انہوں نے کہا کہ پاکستان میں بدقسمتی سے کرونا وائرس سے 192 افراد مرچکے ہیں،اٹلی اور اسپین میں20،20 ہزار سے زائد لوگ مرچکے ہیں،اموات زیادہ ہونے کے باوجود یہ ممالک لاک ڈاؤن میں نرمی کر رہے ہیں۔

عمران خان کا کہنا تھا کہ کسی کو یہ نہیں پتہ کرونا کی صورتحال کتنے عرصے چلےگی،کسی کو بھی یہ نہیں پتہ ایک ماہ بعد کیا صورت حال ہوگی،ممالک ایک طرف لاک ڈاؤن کرکےلوگوں کو کرونا سے بچا رہے ہیں،دوسری طرف لاک ڈاؤن میں نرمی کر کے لوگوں کی مدد کر رہے ہیں۔

وزیراعظم نے کہا کہ پاکستان میں ہم نے سب سے پہلے تعمیرات انڈسٹری کھولی،روزانہ کی بنیاد پر مشاورت کر کے فیصلے کر رہے ہیں،مسائل ہیں اور معیشت بھی متاثر ہوئی ہے۔انہوں نے کہا کہ ہماری کوشش ہے اپنے لوگوں کو بھوک سے بچائیں، روزانہ گفتگو ہوتی ہے کہ اپنے لوگوں کو کیسے بچا سکتے ہیں۔

ٹائیگر فورس سے متعلق عمران خان کا کہنا تھا کہ فورس کو متنازع بنانے کی کوشش کی جا رہی ہے،ٹائیگرفورس رضاکار فورس ہے ان کو پیسے نہیں دیں گے،رضا کار فورس ملک میں مدد کے لیے لائی جا رہی ہے۔

وزیراعظم پاکستان نے کہا کہ رمضان عبادت کا وقت ہے، ہماری قوم مسجدوں میں جانا چاہتی ہے،کیا ہم لوگوں کو زبردستی مسجدوں میں جانے سے روک سکتے ہیں،کیا پولیس نمازیوں کو پکڑ کرجیلوں میں ڈالےگی،آزاد معاشروں میں اس قسم کے واقعات نہیں ہوتے۔

کرونا وائرس کے حوالے سے عمران خان نے کہا کہ وائرس کے خلاف جنگ پورا ملک لڑ رہا ہے،کرونا وائرس کسی امیر یا غریب میں فرق نہیں کرےگی،قوم کو خود کرونا کےخلاف جنگ کے لیے بیدار ہونا ہوگا۔

انہوں نے کہا کہ ہم نے علمائے کرام سے مشاورت کی، 20 نکات پر اتفاق کیا گیا،پوری قوم سے کہتا ہوں کوشش کریں گھر پرعبادت کریں، مسجدوں میں جانا ہے تو 20 نکات پر عمل کرنا ہوگا۔

وزیراعظم کا کہنا تھا کہ ہمارا چیلنج ترقی یافتہ ممالک سے بڑا ہے،ہمیں کرونا کے ساتھ ساتھ معیشت کے لیے بھی لڑنا ہے۔

اسلام آباد: وفاقی وزیر سائنس اینڈ ٹیکنالوجی فواد چوہدری نے کہا ہے کہ وزیر اعظم عمران خان تیسری دنیا کے پہلے رہنما تھے جنھوں نے دنیا سے ترقی پذیر ممالک کی مدد کی اپیل کی۔

اے آر وائی نیوز کے مطابق وفاقی وزیر نے آج اپنے ٹویٹر اکاؤنٹ پیغام میں کہا کہ عمران خان تیسری دینا کے پہلے رہنما تھے جنھوں نے امیر ملکوں کو کہا کہ ترقی پذیر ملکوں کی سب سے زیادہ مدد یہ ہوگی کہ آپ ان کے قرضوں کی ادائیگی میں آسانیاں پیدا کریں۔

انھوں نے کہا کہ وزیر اعظم پاکستان نے ترقی یافتہ دنیا کے سامنے سب سے پہلے یہ مؤقف پیش کیا کہ کرونا کی عالمگیر وبا کے دوران اپنی معیشتوں کے لیے جدوجہد کرنے والے ممالک کے قرضوں میں آسانیاں پیدا کرنی چاہیئں، ترقی پذیر ممالک کے قرضوں میں آسانیاں ہی ان کی مدد ہوگی۔

قرضوں میں ریلیف،وزیراعظم کا جی 20 ممالک، آئی ایم ایف اور ورلڈ بینک کے اقدامات کا خیر مقدم

فواد چوہدری نے ٹویٹ میں لکھا کہ عمران خان کی اس اپیل پر جی 20 ممالک کا ردعمل انتہائی حوصلہ افزا ہے، ادائیگی کی قسطوں میں ایک سال کی چھوٹ بڑا ریلیف ہے۔

خیال رہے کہ ترقی یافتہ ممالک کے گروہ جی ٹوینٹی نے پاکستان سمیت 76 ممالک پر واجب الادا قرضے مؤخر کرنے کی منظوری دے دی ہے، ان ممالک پر رواں سال یکم مئی سے 31 دسمبر تک واجب الادا قرضے مؤخر کیے گئے ہیں، یہ ادائیگیاں اب جون 2022 سے 2024 کے درمیان کرنا ہوں گی۔

قرضوں کی ادائیگی کو مؤخر کرنے کا مقصد ترقی پذیر ممالک کی کرونا کی وبا سے پیدا ہونے والے صحت اور معاشی بحرانوں سے نمٹنے میں مدد کرنا ہے، یہ سہولت ان ممالک کو ملے گی جو عالمی بینک کی انٹرنیشنل ڈیویلپمنٹ ایسوسی ایشن کے تحت قرضوں میں ریلیف کے اہل ہیں، ان میں پاکستان بھی شامل ہے۔

اسلام آباد: وزیراعظم عمران خان کا کہنا ہے کہ جتنا ہو سکے غریب طبقے پر مہنگائی کا بوجھ کم کیا جائے، اسمگلنگ ،ذخیرہ اندوزی کی روک تھام پر خصوصی توجہ دی جائے۔

تفصیلات کے مطابق وزیراعظم عمران خان کی زیر صدارت مہنگائی میں کمی پر اجلاس ہوا جس میں اسد عمر،خسرو بختیار، عبدالحفیظ شیخ، رزاق داؤد، فردوس عاشق اعوان سمیت متعلقہ وفاقی سیکریٹریز اور سینئر افسران نے شرکت کی۔

اس موقع پر وزیراعظم عمران خان کا کہنا تھا کہ اشیائے ضروریہ کی قیمتوں میں استحکام،ممکنہ حد تک کمی حکومتی ترجیح ہے،حکومت کی تمام تر توجہ غریب عوام کو ریلیف فراہم کرنے پر مرکوز ہے۔ انہوں نے کہا کہ ضروری ہے بنیادی اشیائے ضروریہ مناسب قیمت پر میسر آئیں، جتنا ہو سکے غریب طبقے پر مہنگائی کا بوجھ کم کیا جائے۔

وزیراعظم نے کہا کہ اشیائے ضروریہ کے اسٹاک کاحقیقی ڈیٹا ،طلب و رسد کے درست تخمینے پر توجہ دی جائے، بنیادی اشیا کی فراہمی کو یقینی بنانے کے لیے پیشگی انتظامات کرنے کے ساتھ اسمگلنگ ،ذخیرہ اندوزی کی حوصلہ شکنی،روک تھام پرخصوصی توجہ دی جائے۔

انہوں نے مزید کہا کہ صوبائی حکومتیں گندم کی قیمتوں میں کمی کے لیے تجاویز پر فوری طور پرغور کریں، تجاویز کی روشنی میں جامع پالیسی کا باقاعدہ اعلان کیا جائے۔