Tag: معیشت

اسلام آباد: وزیراعظم عمران خان کا کہنا ہے کہ ہمارا وژن ملک کو پائیدار معاشی ترقی کی راہ پر گامزن کرنا ہے، بھرپور کوشش ہے استحکام کا آئندہ مرحلہ معاشی ترقی کی شکل اختیار کرے۔

تفصیلات کے مطابق وفاقی دارالحکومت اسلام آباد میں وزیراعظم عمران خان کی زیرصدارت اجلاس ہوا جس میں اسد عمر، شفقت محمود، خسرو بختیار، فردوس عاشق اعوان، ڈپٹی چیئرمین مین پلاننگ کمیشن، سیکرٹری پلاننگ اور سینئر افسران نے بھی شرکت کی۔

وزیرِ اعظم کو پی ایس ڈی پی کی پہلی اور دوسری سہ ماہی کی پیش رفت پر بریفنگ دی گئی، مختلف وزارتوں کی کی کارکردگی کی تفصیلی رپورٹ بھی وزیرِ اعظم کو پیش کی گئی۔ بریفنگ کے دوران بتا یا گیا کہ رواں مالی سال پی ایس ڈی پی کے تحت 380 نئی اسکیموں کا اجرا کیا گیا۔

اس موقع پر وزیراعظم عمران خان نے کہا کہ مشکل معاشی حالات کے باوجود معاشی استحکام حاصل کیا، بھرپورکوشش ہے استحکام کا آئندہ مرحلہ معاشی ترقی کی شکل اختیار کرے، ہمارا وژن ملک کو پائیدار معاشی ترقی کی راہ پر گامزن کرنا ہے۔

وزیراعظم پاکستان نے کہا کہ طویل مدت جامع منصوبہ بندی نہایت اہمیت کی حامل ہے، بین الوزارتی روابط اور کوآرڈینیشن کلیدی اہمیت کے حامل ہیں، منصوبوں کی بر وقت تکمیل سے معاشی عمل تیز کرنے میں مدد ملے گی۔

انہوں نے کہا کہ نوکریوں کے زیادہ سے زیادہ مواقع پیدا ہو سکیں گے، مختلف منصوبوں پرعمل درآمدکی رفتار پر مسلسل نظر رکھی جائے، کوئی ترقیاتی منصوبہ یا اسکیم سرخ فیتے کی بنا پر تاخیر کا شکار نہ ہو۔

وزیراعظم عمران خان نے کہا کہ حکومت ترقیاتی کاموں میں نجی شعبے کو بھی شامل کرنا چاہتی ہے، حکومت ہر ممکنہ سہولت فراہم کرنے کے لیے پر عزم ہے۔

اسلام آباد: وزیرخارجہ شاہ محمود قریشی کا کہنا ہے کہ معاشی استحکام کے لیے کسانوں کی معاشی حالت کا مستحکم ہونا ضروری ہے، حکومت کسانوں کی فلاح و بہود ،مسائل کو ترجیحی بنیاد پر حل کے لیے پرعزم ہے۔

تفصیلات کے مطابق وزیرخارجہ شاہ محمود قریشی کسانوں کے قومی دن پر اپنے پیغام میں کہا کہ پاکستان میں آج کسانوں کا قومی دن منایا جا رہا ہے، زراعت کی ترقی کسان کی محنت سے منسلک ہے۔

شاہ محمود قریشی نے کہا کہ پاکستان میں زراعت ملکی معیشت میں ریڑھ کی ہڈی کی حیثیت رکھتی ہے، کسان دن رات محنت کر کے معاشی ترقی میں کردار ادا کر رہے ہیں، مجھے خوشی ہے میرا تعلق بھی اسی قبیلے سے ہے۔

وزیر خارجہ نے کہا کہ معاشی استحکام کے لیے کسانوں کی معاشی حالت کا مستحکم ہونا ضروری ہے، حکومت کسانوں کی فلاح و بہود، مسائل کو ترجیحی بنیاد پر حل کے لیے پرعزم ہے۔

شاہ محمود قریشی نے مزید کہا کہ کسانوں کے قومی دن پر قوم محنت کش بھائیوں کی عظمت کو سلام پیش کرتی ہے۔

واضح رہے کہ پاکستان میں آج کسانوں کا قومی دن منایا جا رہا ہے، اس دن کو منانے کا مقصد کسانوں کی اہمیت اور ان کو درپیش مسائل کو اجاگر کرنا ہے۔