لاہور: پاکستان میں انٹرنیشنل کرکٹ کی بحالی کی امید جاگ گئی،چئیرمین پی سی بی شہریار خان کہتے ہیں زمبابوے کی ٹیم پاکستان آنے کے لئے تیار ہے،خوشخبری جلد ملے گی۔
چئیرمین پی سی بی شہریار خان نے خوشخبری سنادی انہوں نے کہا کہ زمبابوے کی ٹیم پاکستان آنے کے لئے تیار ہے، آئی سی سی میٹنگ میں معاملات طے کرلئے جائیں گے۔
شہریار خان کا کہنا تھا کہ بڑی ٹیموں کو ابھی نہیں بلارہے لیکن دروازے آہستہ آہستہ کھل رہے ہیں، چئیرمین پی سی بی نے کہا کہ جو کھلاڑی فٹ ہوں گے وہ ہی ٹیم کا حصہ ہوں گے۔
لاہور: پاکستان کرکٹ بورڈ نے معین خان کو چیف سلیکٹر کے عہدے سے ہٹانے کا باقاعدہ نوٹس بھیج دیا۔
پاکستان کرکٹ بورڈ نے نئے چیف سلیکٹر کی تقرری کے بعد معین خان کو فارغ کردیا ہے، معاہدہ کے تحت بورڈ معین خان کو ایک ماہ کی تنخواہ دے گا۔
پی سی بی ترجمان کے مطابق بورڈ کا معین خان سے تیس اپریل تک کا معاہدہ ہے، اس دوران انہیں تمام مراعات ملتی رہیں گی۔
ورلڈ کپ کے دوران کیسنیو جانے کے واقعے کے بعد بورڈ کا معین خان کو برقرار رکھنا مشکل ہوگیا تھا۔
واضح رہے کہ معین خان کو کیسینو جانے پر ورلڈ کپ کے دوران واپس بلالیا گیا تھا۔
لاہور: پاکستان کرکٹ بورڈ نے چیف سلیکٹر معین خان کو کیسینو جانے کے معاملے پر کلین چٹ دے دی۔ چئیرمین بورڈ شہریار خان کا کہنا ہے معین نے وضاحت کردی اب معاملہ ختم ہوگیا۔
تفصیلات کے مطابق قذافی اسٹیڈیم لاہور میں معین خان نے چالیس منٹ تک چئیرمین پی سی بی شہریار خان سے ملاقات کی اور انہیں کیسینو جانے پر وضاحت پیش کی ۔
بعد ازاں میڈیا سے گفتگو میں چئیرمین بورڈ کا کہنا تھا کہ معین اب بھی اپنے مؤقف پر قائم ہیں کہ انہوں نے کیسینو جانے کی غلطی کی ہے لیکن جواء نہیں کھیلا۔
چئیرمین پی سی بی نے کہا کہ ان کی تفتیش کے مطابق معین خان کا موقف غلط نہیں ہے۔ بورڈ کے کاغذوں میں وہ پاک صاف ہیں۔
شہریار خان نے کہا کہ معین خان نے کیسینو جانے پر وضاحت پیش کردی ہے ، اب معاملہ ختم ہوگیا ہے۔ چئیرمین پی سی بی نے گفتگو کے دوران کہا کہ معیں خان میڈیا کا سامنا نہیں کرنا چاہتے ۔اس دوران معین خان کو پچھلے دروازے سے نکال دیا گیا ۔
واضح رہے کہ اے آر وائی نیوز نے معین خان کے کیسینو جانے پر سب سے پہلے نیوز بریک کی تھی،اور وہاں موجود عینی شاہد کا بیان بھی آن ائیر کیا تھا،جس پر چیئرمین پی سی بی نے خبر کا نوٹس لے کر ان سے وضاحت طلب کرتے ہوئے معین خان کووطن واپس بلا لیا تھا۔
لاہور : معین خان نے شہر یارخان سے ملنے سے معذرت کا اظہارکردیا، تفصیلات کے مطابق قومی کرکٹ ٹیم کے چیف سلیکٹر معین خان اور چیئرمین پی سی بی شہریار خان کے درمیان آج لاہور میں ہونے والی ملاقات ملتوی کردی گئی۔
چیف سلیکٹر معین خان کی ملاقات چیئرمین پی سی بی شہریار خان سے شیڈول کے مطابق تھی، لیکن خرابی صحت کی وجہ سے معین خان نے لاہور آنے سے معذرت کرلی ہے۔
واضح رہے کہ معین خان پر الزام ہے کہ وہ ورلڈ کپ میں پاکستان اور ویسٹ انڈیز کے میچ سے ایک روز قبل کرائسٹ چرچ کے ایک کیسینو میں گئے تھے۔
جہاں انہوں نے مبینہ طور پر جواء بھی کھیلا تھا،چیئرمین پی سی بی نے معاملے کی وضاحت طلب کرنے کیلئے معین خان کو فوری طور پر وطن واپس بلالیا تھا۔
مذکورہ خبر اے آروائی نیوز نے بریک کی تھی، اورعینی شاہد کا بیان بھی نشر کیا تھا،جس کی تصدیق کرتے ہوئے چیف سلیکٹر نے کیسینو جانے کا اعتراف بھی کیا تھا اور وہ پاکستانی قوم سےاپنی اس غلطی پرمعافی بھی مانگ چکے ہیں۔
برسبین : پاکستان کرکٹ ٹیم کے کپتان مصباح الحق کا کہنا ہے کہ معین خان اسکینڈل سے کھلاڑیوں کو کوئی فرق نہیں پڑتا۔ منفی پروپگینڈا نہیں چاہیئے، سابق کھلاڑیوں کو ملک کا سوچنا چاہیے۔
ان خیالات کا اظہار انہوں نے برسبین میں نیوز کانفرنس کرتے ہوئے کیا مصباح الحق نے کہا کہ زمبابوے کے خلاف میچ اہم ہے، جیتنا ضروری ہے، کارکردگی میں سب کو بہتری لانا ہوگی۔
انہوں نے کہا کہ ٹاپ آرڈر کو وکٹ پر رکنا ہوگا،پہلے دونوں میچوں میں ناکامی کے بعد کھلاڑی دباؤ میں ہیں۔ ان کا کہنا تھا کہ منفی پروپیگنڈا نہیں چاہیے، سابق کھلاڑیوں کو ملک کا سوچنا چاہیے۔
ایک سوال کے جواب میں مصباح الحق نے کہا کہ زمبابوے کے خلاف ٹیم فائنل کرلی ہے۔ کون کون شامل ہوگا وہ میچ سے پہلے نہیں بتاسکتے۔
زمبابوے کے کپتان ایلٹن چگمبرا نے کہا کہ ٹیم پاکستان کو ہرانے کی پوری صلاحیت رکھتی ہے۔ بولنگ کے بارے میں فکر مند ہیں۔ پاکستان اچھی ٹیم ہے مقابلہ ٹف ہوگا۔
کراچی: چیف سلیکٹر معین خان برسبین سے براستہ دبئی کراچی پہنچ گئے، سابق کپتان ایک دن آرام کے بعد چئیرمین پی سی بی سے ملاقات کے لئے لاہور جائیں گے۔
پاکستان ٹیم کے چیف سلیکٹر معین خان گزشتہ شب برسبین سے پاکستان کیلئے روانہ ہوگئے تھے، طویل فاصلہ طے کرنے کے بعد معین خان فلائیٹ ای کے سکس زیرو ایٹ کے ذریعے براستہ دبئی کراچی پہنچ گئے ہیں۔ جہاں وہ میڈیا سے نظرے چرا کر خاموشی سے گھر کے لئے روانہ ہوگئے۔
دوسری جانب ناراض شائقین کا غصہکم ہونے کا نام ہی نہیں لے راہا ہے، ٹیم کی ناقص کارکردگی اور معین خان کی کسینو جانے پر ناراض شائقین گندے انڈوں کے ساتھ ان کا استقبال کرنے کے لئے آئیر پورٹ پہنچے گئے۔
ناراض شائقین کی معین خان سے ملاقات نہ ہوسکی تو احتجاجی طور پر انڈے اپنے ہی سر پر پھوڑ ڈالے۔
شائقین کا کہنا ہے کہ ٹیم کی کارکردگی صفر ہے اور چیف سلیکٹر کسینو میں رنگ رلیاں منا رہے ہیں، معین خان ایک روز کراچی میں قیام کے بعد لاہور جاکر چیئرمین پی سی بی کو تحریری معافی نامہ پیش کرینگے،ذرائع کے مطابق چیف سلیکٹر عہدے سے مستعفی ہونے کا اعلان بھی کرسکتے ہیں۔
لاہور : قومی کرکٹ ٹیم کے چیف سلیکٹرمعین خان کا کیسینو جانا مہنگا پڑگیا، اے آر وائی نیوز کی خبر پر پی سی بی کا فوری ایکشن، سابق کرکٹر کو وطن واپسی کا پروانہ تھما دیا گیا۔
تفصیلات کے مطابق چیئرمین پی سی بی چیئرمین پی سی بی شہریار خان کی زیر صدارت لاہورقذافی اسٹیڈیم میں ہونے والے اجلاس میں فیصلہ کیا گیا کہ معین خان کو فوری طور پروطن واپس بلایا جائے۔
انہوں نے اس بات کا بھی اعلان کیا کہ نوید اکرم چیمہ ٹیم مینجر کے ساتھ ٹوور سلیکشن کمیٹی کے سربراہ بھی ہونگے۔
چیئرمین پی سی بی کرکٹ سربراہ اس بات ثابت قدم رہے کہ معین خان کھانا کھانے کیلئے کیسینو گئے،جوا کھیلنے نہیں۔ انہوں نے کہا کہ اس بات کا اثر پاکستان ٹیم پر نہیں پڑے گا۔
لاہور: پاکستان کرکٹ ٹیم کے چیف سلیکٹرمعین خان نے کہا ہے کہ میں کیسینو ضرور گیا تھا صرف کھانا کھانے کیلئے لیکن وہاں جاکرجواء نہیں کھیلا۔
یہ بات انہوں نے پی سی بی کو بھیجی گئی ای میل میں کیا۔ تفصیلات کے مطابق چیف سلیکٹرپی سی بی معین خان نے اے آر وائی کی خبر کی تصدیق کردی۔
پی سی بی کو ای میل کئے گئے اپنے وضاحتی بیان میں انہوں نے اعتراف کرلیا کہ میں کیسینو صرف کھانا کھانے کیلئے گیا تھا، وہاں جاکر جواء نہیں کھیلا۔
انہوں نے اپنے پہلے بیان کہ ’’میں کھلاڑیوں کو چیک کرنے گیا تھا” پر معافی بھی مانگ لی۔ اب پاکستان کرکٹ بورڈ اس بات کا فیصلہ کرے گا کہ قانون کے مطابق کیا کارروائی کی جائے۔
جبکہ چئرمین پی سی بی شہر یار خان کا کہنا ہے کہ اگر معین خان جواء کھیلنے کے حوالے سے قصور وار پائے گئے تو تو سخت تادیبی کارروائی کی جائے گی۔
اس حوالے سے سابق ٹیسٹ کرکٹرباسط علی کا کہنا ہے کہ معین خان کا ما ضی بے داغ ہے، انہوں نے جو بیان دیا وہ سچ ہے۔
لاہور : پاکستان کرکٹ ٹیم میں ایک بار پھر گروپ بندی کی خبروں نے زور پکڑ لیا ہے۔ آخرگروپ بندی کی وجہ کیا ہے. پاکستان ٹیم کو وہی پرانی بیماری گروپ بندی کی کیوں لگ گئی ہے؟
ذرائع کے مطابق قیادت کی جنگ ایک بار پھر لڑائی کی وجہ بن رہی ہے۔ جس کی وجہ سے پاکستانی ٹیم ایک بار پھر سے گروپ بندی کا شکار ہے۔
گتھیاں الجھنے کے بجائے اب سلجھتی جارہی ہیں۔ چیف سلیکٹر معین خان ورلڈ کپ میں شاہد آفریدی کو کپتان بنانا چاہتے تھے لیکن بورڈ نے مصباح الحق پر اعتماد کیا۔
ذرائع کے مطابق چیف سلیکٹر معین خان، شاہد آفریدی، احمد شہزاد اور کچھ کھلاڑیوں کا گٹھ جوڑ ہے۔ تو ٹیم میں دیگر کھلاڑی مصباح الحق کو سپورٹ کررہے ہیں۔
ہیڈ کوچ وقار یونس مصباح الحق کو کپتان برقرار رکھنے کے حق میں رہے۔ آفریدی کو کپتان بنانے کی انہوں نے مخالفت کی۔ ٹیم میں گروپ بندی کا منفی اثرٹیم کی کارکردگی پرپڑرہا ہے۔
جو ابتدائی دومیچزمیں سب نے دیکھ بھی لیا۔ دال تھوڑی نہیں پوری ہی کالی ہے۔ پاکستان کرکٹ بورڈ کے چئیرمین شہریار خان کہہ چکے ہیں ورلڈ کپ سے واپسی پر ٹیم کا محاسبہ کیا جائے گا۔
لیکن سوال یہ ہے کہ ہمیشہ ورلڈ کپ سے قبل ہی ٹیم میں گروپ بندی کیوں ہوتی ہے؟
کراسٹ چرچ: عینی شاہد نے معین خان کا بھانڈا پھوڑ دیا معین خان نے کسینو کے وی آئی پی لاؤنج میں جوا کھیلا تھا۔
اے آر وائی نیوز سے خصوصی گفتگو کرتے عینی شاہد کا کہنا تھا کہ میچ سے ایک رات قبل معین خان کافی دیر تک کرائسٹ چرچ کے کسینو میں رہے۔
عینی شاہد نےاےآروائی نیوزکی خبرکی تصدیق کرتے ہوئے کہا کہ معین خان رات 2 بجے سے تقریباَ ساڑھے 3 بجے تک کسینو کےوی آئی پی لاؤنج میں تھے،ان کےپاس بڑی رقم تھی ،دس سےپندرہ ہزارڈالر کاجوا کھیلا ہوگا۔
عینی شاہد نے ایک اور انکشاف کیا کہ کیسینو میں معین خان کے ساتھ جیونیوز کے اینکر یحیٰی حسینی بھی تھے۔
عینی شاہد نے بتایا کہ میں نے خود بیگم معین خان کو بھی کیسینو میں بڑی رقم کے ساتھ جواء کھیلتے ہوئے دیکھا تھا۔
ایک سوال کے جواب میں عینی شاہد کا کہنا تھا کہ معین خان کسینو کےوی آئی پی لاؤنج میں تھے اور وی آئی پی لاونج میں داخلے کے لئے کم از کم دس سے پندرا ہزار ڈالر درکار ہوتے ہیں۔
کیسینو میں موجود ایک پاکستانی نژاد ڈاکٹر نے بھی معین خان کو تنقید کا نشانہ بناتے ہوئے کہا کہ پاکستان ٹیم کی بدترین شکست کے بعد چیف سلیکٹر کو کیسینو میں دیکھ کر حیرت ہوئی۔
عینی شاہد نے بتایا کہ ان کے کچھ ساتھیوں نے بھی معین خان کے ساتھ تصویریں بنوائی ہیں جہیں حاصل کرنے کی کوشش کی جارہی ہے تاکہ بطور ثبوت اے آر وائی نیوز کو پیش کی جاسکیں۔